(ខេត្តកំពត)៖ មនុស្សម្នាក់បានស្លាប់ភ្លាមៗនៅកន្លែងកើតហេតុ ដោយសារគ្រោះថ្នាក់ចរាចររថយន្តបុកម៉ូតូពេញទំហឹងលើដងផ្លូវជាតិលេខ៣ចន្លោះគីឡូម៉ែត្រ ១១១-១១២។
ហេតុការណ៍នេះបានកើតឡើងនៅវេលាម៉ោង១៩និង០៥នាទីយប់ ថ្ងៃទី២៣ ខែកក្កដា ២០១៩ ត្រង់ចំណុចភូមិព្រិច ឃុំបឹងនិមល ស្រុកឈូក ខេត្តកំពត រវាងរថយន្តនិងម៉ូតូក្នុងទិសដៅស្របគ្នា។
តាមប្រភពព័ត៌មានពីមន្ត្រីនគរបាលមូលដ្ឋានបានរៀបរាប់ថា កាលពីវេលាម៉ោងដូចខាងលើ មានម៉ូតូមួយគ្រឿងម៉ាកC125 ធ្វើដំណើរក្នុងទិសដៅពីលិចទៅកើត លុះមកដល់ចំណុចកើតហេតុស្រាប់តែមានរថយន្តខ្នាតធំមួយគ្រឿងបោះពួយមកពីក្រោយក្នុងទិសស្របគ្នា ហើយក៏ជ្រុលទៅបុកម៉ូតូពីក្រោយពេញទំហឹងរួចកិនពីលើបណ្តាលឲ្យអ្នកបើកបរម៉ូតូស្លាប់ភ្លាមៗនៅកន្លែងកើតហេតុ។
សមត្ថកិច្ចបានបន្តថា បន្ទាប់ពីមានករណីកើតឡើង អ្នកបើកបរបានចតរថយន្តចោលនៅកន្លែងកើតហេតុរួចដាក់មេប្រូចបាត់ស្រមោលតែម្តង។
ប្រភពដដែលបានបញ្ជាក់ថា ជនរងគ្រោះមានឈ្មោះ នាក់ មីុ ភេទប្រុស អាយុ៤២ឆ្នាំ រស់នៅភូមិដងទុង ឃុំដំបូកខ្ពស់ ស្រុកអង្គរជ័យ ខេត្តកំពត ជនរងគ្រោះជិះម៉ូតូម្នាក់ឯងម៉ាកC125 ពណ៌ខ្មៅ ពាក់ស្លាកលេខ កំពត 1G-4904។ដោយឡែករថយន្តបង្កហេតុម៉ាក ហ្យុយសូ ពណ៌ត្រួយចេក ពាក់ស្លាកលេខ កោះកុង 3A-0028 អ្នកបើកបរគេចខ្លួនបាត់។
បច្ចុប្បន្នមធ្យោបាយពាក់ព័ន្ធត្រូវបានសមត្ថកិច្ចនាំយកទៅរក្សាទុកនៅក្នុងអធិការដ្ឋាននគរបាលស្រុកឈូក សម្រាប់ដោះស្រាយនៅពេលក្រោយ។ចំណែកសពជនរងគ្រោះត្រូវក្រុមគ្រួសារមកទទួលយកទៅកាន់លំនៅដ្ឋានដើម្បីរៀបចំធ្វើបុណ្យតាមប្រពៃណី៕ សេង ណារិទ្ធ
