(ខេត្តកំពត)៖ ប្រព័ន្ធផ្សព្វផ្សាយគឺជាស្ពានចម្លងមួយមានសារៈសំខាន់ក្នុងការឆ្លើយតបរាល់បញ្ហាជាច្រើន ពិសេសដំណោះស្រាយនូវគ្រប់បញ្ហាស្មុគស្មាញនៅចំពោះមុខជាច្រើន។
នេះជាការលើកឡើងរបស់ លោក ថាច់ ផែន រដ្ឋលេខាធិការក្រសួងព័ត៌មាន ក្នុងឱកាសបិទសិក្ខាសាលា ស្តីពីសមិទ្ធផលនិងផែនការសកម្មភាពឆ្លើយតបនឹងអនុសាសន៍ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការអនុវត្ត គោលនយោបាយសមភាពយេនឌ័រ សម្រាប់ប្រព័ន្ធផ្សព្វផ្សាយថ្នាក់ក្រោមជាតិ នៅព្រឹកថ្ងៃទី២៤ ខែកក្កដា ឆ្នាំ២០១៩ នៅសាលាខេត្តកំពត ដែលមានសិក្ខាកាមចូលរួម មកពីខេត្តមណ្ឌលគិរី,ខេត្តក្រចេះ ,ខេត្តត្បូងឃ្មុំ ,ខេត្តកោះកុង,និងខេត្តកំពត។
លោកបានគូសបញ្ជាក់ផងដែរថា ប្រព័ន្ធផ្សព្វផ្សាយទាំងថ្នាក់ជាតិ ទាំងថ្នាក់ក្រោមជាតិគឺជាស្ពានចម្លងដ៏សំខាន់សម្រាប់ប្រជាពលរដ្ឋនិងរាជរដ្ឋាភិបាល ទាក់ទិននឹងបញ្ហាប្រឈម ឬសំណូមពរទាំងឡាយ ព្រមទាំងបំណងប្រាថ្នានានារវាងគ្នានិងគ្នា សម្រាប់យកទៅពិភាក្សា និងរកដំណោះស្រាយប្រកបដោយប្រសិទ្ធភាព។
ដោយផ្អែកលើខ្លឹមសារនេះ ប្រព័ន្ធផ្សព្វផ្សាយត្រូវលើកយកមកបង្ហាញជាសាធារណៈដើម្បីបង្ហាញរាល់សមិទ្ធផលទាំងឡាយដែលសម្រេចបានក្នុងការអនុវត្តគោលនយោបាយនេះ។ពិសេសសមភាពយេនឌ័រក្រោមអនុសញ្ញាលុបបំបាត់រាល់ទម្រង់នៃការរើសអើងប្រឆាំងនឹងនារីភេទសំដៅការពារសិទ្ធិស្ត្រីនិងកុមារជាមូលដ្ឋាន។
លោក ថាច់ ផែន បានបញ្ជាក់ទៀតថា ដើម្បីឲ្យសមភាពយេនឌ័រកើតមានស្របតាមបែបបទនៃអនុសញ្ញានេះ សារព័ត៌មានត្រូវលើកមកផ្សព្វផ្សាយរបស់រាជរដ្ឋាភិបាលនូវចំណុចចម្បងៗមួយចំនួនរួមមាន៖ ដូចជាការបង្កើនតួនាទីរបស់ស្ត្រីក្នុងវិស័យសេដ្ឋកិច្ចតាមរយៈ ការបណ្តុះបណ្តាលវិជ្ជាជីវៈ ,ជំនាញបច្ចេកទេស ការផ្តល់ឱកាសការងារនិងការសិក្សាទាំងកម្រិតមធ្យម ក៏ដូចជាឧត្តមសិក្សា។បង្កើនសមាមាត្រនៃស្ត្រីនៅស្ថាប័នសាធារណៈដើម្បីឲ្យស្ត្រីបានចូលរួមកាន់តែច្រើនក្នុងភាពជាអ្នកដឹកនាំ ,ពង្រឹងការអនុវត្តច្បាប់ស្តីពីការទប់ស្កាត់អំពើហិង្សាក្នុងគ្រួសារ ហើយសារព័ត៌មានត្រូវផ្សព្វផ្សាយប្រកបដោយក្រមសីលធម៌ វិជ្ជាជីវៈ ចៀសវាងការផ្សាយព័ត៌មានបែបញុះញង់ដែលបង្កឲ្យមានការយល់ច្រឡំ ឬរើសអើងចំពោះស្ត្រី និងកុមារ។
បន្ទាប់ពីបិទសិក្ខាសាលា គណៈអធិបតីក៏បានចែកជូននូវវិញ្ញាបនបត្រដល់សិក្ខាកាមទាំងអស់ដែលបានចូលរួមសិក្ខាសាលា ដែលចំណាយពេលអស់រយៈពេល២ថ្ងៃ គឺថ្ងៃទី២៣និង២៤ខែកក្កដា ឆ្នាំ២០១៩៕ សេង ណារិទ្ធ
