(ខេត្តកំពត)៖ យុទ្ធនាការសម្អាតបរិស្ថានដើម្បីកំចាត់មូសខ្លាក្រោមប្រធានបទ”ខ្ញុំ និងគ្រួសារខ្ញុំ ជាគ្រួសារគំរូ ព្រោះផ្ទះខ្ញុំ និងលំនៅដ្ឋានរបស់ខ្ញុំ គ្មានដង្កូវទឹក” ត្រូវបានរដ្ឋបាលខេត្តកំពតរៀបចំឡើង នៅព្រឹកថ្ងៃអង្គារ ៧រោច ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៣ ខែកក្កដា ឆ្នាំ២០១៩ នៅសាលសន្និសីទខេត្តកំពត ក្រោមអធិបតីភាពដ៏ខ្ពង់ខ្ពស់ លោក ជាវ តាយ អភិបាលនៃគណៈអភិបាលខេត្តកំពត និងជាប្រធានកិត្តិយសសាខាកាកបាទក្រហមកម្ពុជា ខេត្តកំពត។
អញ្ជើញចូលរួមក្នុងពិធីនេះរួមមាន លោកស្រីនាយិការងនាយកដ្ឋានធនធានមនុស្សកាកបាទក្រហមកម្ពុជា សមាជិកគណៈកម្មាធិការសាខា ប្រធានមន្ទី អង្គភាព ជុំវិញខេត្ត ក្រុមប្រតិបត្តិសាខា អនុសាខាកាកបាទក្រហមក្រុង ស្រុក យុវជន និងអ្នកស្ម័គ្រចិត្តកាកបាទក្រហម អាជ្ញាធរភូមិ ឃុំ សង្កាត់ និងប្រជាពលរដ្ឋ សិស្សានុសិស្ស សរុប ៤០៣នាក់។
នាឱកាសដ៏ថ្លៃថ្លានេះ លោក ជាវ តាយ អភិបាលខេត្តកំពត បានមានប្រសាសន៍ថា ក្នុងនាមកាកបាទក្រហមកម្ពុជា ជាជំនួយការឲ្យអាជ្ញាធរសាធារណៈលើវិស័យមនុស្សធម៌ យើងនាំគ្នាធ្វើសកម្មភាព អប់រំផ្សព្វផ្សាយបន្តតាមរយៈកម្លាំងអ្នកស្ម័គ្រចិត្ត និងយុវជនកាកបាទក្រហម នៅតាមសាលាគោលដៅនិងសហមន៍ ហើយថ្ងៃនេះ សាខាកាកបាទក្រហមកម្ពុជាខេត្តកំពត បានសហការជាមួយមន្ទីរសុខាភិបាលខេត្តរៀបចំយុទ្ធនាការលុបបំបាត់ជម្រកមូសខ្លានេះឡើង ក្នុងគោលបំណងផ្សព្វផ្សាយដល់ប្រជាពលរដ្ឋ សិស្ស និស្សិត អាជីវករ និងសាធារណៈជន ឲ្យចូលរួមចលនាកាត់បន្ថយ និងទប់ស្កាត់ការកកើតសត្វមូស ដោយប្រកាន់ភ្ជាប់នូវគោលជំហរប្រជាជនគំរូមួយរូបគឺ (ខ្ញុំ និងគ្រួសារខ្ញុំ ជាគ្រួសារគំរូ ព្រោះផ្ទះខ្ញុំ និងលំនៅដ្ឋានរបស់ខ្ញុំ គ្មានដង្កូវទឹក)។
លោកអភិបាលខេត្តបានបន្តថា យើងត្រូវចូលរួមទាំងអស់គ្នាដើម្បី សហគមន៍យើង គ្មានដង្កូវទឹក គ្មានមូសខ្លា គ្មានជំងឺគ្រុនឈាម។ដូច្នេះដើម្បីកាត់បន្ថយអត្រាឈឺនិងស្លាប់ ដោយសារជំងឺគ្រុនឈាមនេះបាន ទាល់តែយើងទាំងអស់គ្នា ជួយចូលរួមចំណែកនិងសហការគ្នា ទើបទទួលបានជោគជ័យ។
សូមជម្រាបថា ក្រោយពីមានមតិសំណេះសំណាល គណៈអធិបតីក៏បានដឹកនាំមន្ត្រីរាជការ សិស្ស និស្សិត ព្រមទាំងអាជីវករ បើកយុទ្ធនាការសម្អាតបរិស្ថានដើម្បីកំចាត់ជម្រកមូសខ្លា៕
សេង ណារិទ្ធ
