(ខេត្តកែប)៖ ប្រជាពលរដ្ឋចំនួន៤០គ្រួសារដែលរងគ្រោះដោយសារខ្យល់កន្ទ្រាក់ខូចខាតផ្ទះសំបែង ស្ថិតក្នុងភូមិអំពេង ឃុំអង្កោល ស្រុកដំណាក់ចង្អើរ ខេត្តកែប ត្រូវបានលោក កែន សត្ថា អភិបាល នៃគណៈអភិបាលខេត្តកែប និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ដឹកនាំសហការីចុះសួរសុខទុក្ខ និងនាំយកអំណោយសង្គ្រោះរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន យកទៅផ្តល់ជូន នៅព្រឹកថ្ងៃទី០៤ ខែកក្កដា ឆ្នាំ២០១៩នេះ។
អំណោយដែលត្រូវប្រគល់ជូននាពេលនេះ គឺគ្រួសារដែលខូចខាតផ្ទះសំបែងមធ្យមទទួលបានថវិកាចំនួន១០០.០០០រៀល និងសម្ភារៈជាគ្រឿងឧបភោគ បរិភោគមួយចំនួន។ដោយឡែកគ្រួសារដែលរងខូចខាតផ្ទះសំបែងធ្ងន់ធ្ងរគឺទទួលបានថវិកាចំនួន១៥០.០០០រៀល ព្រមទាំងសម្ភារៈជាគ្រឿងឧបភោគ បរិភោគមួយចំនួនផងដែរ។
មានមតិសំណេះសំណាល សួរសុខទុក្ខ លោក កែន សត្ថា ប្រធានគណៈកម្មាធិការសាខាកាកបាទក្រហមខេត្ត ក៏បានពាំនាំនូវប្រសាសន៍ផ្តាំផ្ញើ សួរសុខទុក្ខរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែយកចិត្តទុកដាក់ពីទុក្ខលំបាករបស់បងប្អូនប្រជាពលរដ្ឋគ្រប់មជ្ឈដ្ឋាន ពិសេសជនងាយរងគ្រោះគ្រប់ប្រភេទ ដោយគ្មានលំអៀង មិនរើសអើង មិនប្រកាន់ពូជសាសន៍ពណ៌សម្បុរ ឬនិន្នាការនយោបាយឡើយ។
សូមជម្រាមផងដែរថា៖ កាលពីថ្ងៃទី០៣ ខែកក្កដា ឆ្នាំ២០១៩ ខណៈពេលមេឃកំពុងភ្លៀងខ្លាំង ក៏មានកម្លាំងខ្យល់បក់បោកនៅតាមភូមិសាស្ត្រឃុំអង្កោល ស្រុកដំណាក់ចង្អើរ ខេត្តកែប ដោយគ្រោះធម្មជាតិនេះ ក៏បានបណ្តាលឱ្យលំនៅដ្ឋានរបស់បងប្អូនប្រជាពលរដ្ឋស្ថិតក្នុងតំបន់ខាងលើ ត្រូវរងដោយសារខ្យល់កន្ទ្រាក់ធ្វើឱ្យផ្ទះសំបែងប្រជាពលរដ្ឋចំនួន៤០គ្រួសាររងការខូចខាតតែម្តង៕
សេង ណារិទ្ធ
