(ខេត្តកំពត-កែប)៖ ទំនប់ប្រទាក់ក្រឡា ស្ថិតក្នុងភូមិកូនសត្វ ឃុំកូនសត្វ ស្រុកទឹកឈូ ខេត្តកំពត ក្រៅពីបានបម្រើផ្នែកវិស័យទេសចរណ៍ប្រមានភាពទាក់ទាញ អនាគតនឹងក្លាយជាទីតាំងផលិតទឹកស្អាតប្រកបដោយផាសុខភាព។
ការលើកឡើងបែបនេះ ជាប្រសាសន៍របស់ ឯកឧត្តម កិត្តិសេដ្ឋា បណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ក្នុងពិធីក្រុងពាលីបើកការដ្ឋានសាងសង់ទឹកស្អាតរបស់ក្រុមហ៊ុនអានកូ វ័ធើរ សឹបផ្លាយ នៅព្រឹកថ្ងៃទី០៣ ខែកក្កដា ឆ្នាំ២០១៩ ដោយលការសាងសង់រោងចក្រផលិតទឹកស្អាតនេះ សម្រាប់ការផ្តល់សេវាកម្មចែកចាយទឹកស្អាតដល់រដ្ឋបាលខេត្តកែបដែលកន្លងមកពុំទាន់មានបណ្តាញទឹកស្អាតប្រើប្រាស់ ដូចខេត្តដ៏ទៃ។
ចំពោះវត្តមានចូលរួមក្នុងពិធីនេះរួមមាន៖ លោក ជាវ តាយ អភិបាលនៃគណៈអភិបាលខេត្តកំពត និងលោក កែន សត្ថា អភិបាល នៃគណៈអភិបាលខេត្តកែប ព្រមទាំងសហការី ដែលជាថ្នាក់ដឹកនាំនៃមន្ទីរ អង្គភាពជំនាញក្នុង រដ្ឋបាលដែនដីនៃខេត្តទាំងពីរផងដែរ។
ឯកឧត្តម កិត្តិសេដ្ឋា បណ្ឌិត ចម ប្រសិទ្ធ បានគូសបញ្ជាក់ទៀតថា រយៈពេលកន្លងមកដោយសារតែខេត្តកែប ពុំទាន់មានរោងចក្រផលិតទឹកស្អាត សម្រាប់ផ្គត់ផ្គង់ ចែកចាយជូនអតិថិជនប្រើប្រាស់ដូចខេត្តដ៏ទៃ លោកក៏បានស្វះស្វែងរកមើលទីតាំងសមស្រប ដើម្បីពិនិត្យជាក់ស្តែង ហើយតំបន់ ភូមិសាស្ត្រដែលអាចអំណោយផលសម្រាប់ផលិតទឹកនៅជិតបង្កើយគឺនៅជាប់គ្នារវាងព្រំប្រទល់ខេត្តកំពតនិងខេត្តកែប ទើបលោកជ្រើសយកតំបន់ទំនប់ប្រទាក់ក្រឡាដែលស្ថិតក្នុងឃុំកូនសត្វ ស្រុកទឹកឈូ ធ្វើជាកន្លែងផលិតទឹកស្អាត ដោយពេលនេះត្រូវបានរៀបចំពិធីក្រុងពាលីបើកការដ្ឋានសាងសង់ទឹកស្អាតដោយក្រុមហ៊ុនអានកូ វ័ធើរ សឹបផ្លាយ ហើយរោងចក្រផលិតទឹកស្អាតនេះ នឹងត្រូវដំណើរការចាប់ពីពេលនេះតទៅ៕ សេង ណារិទ្ធ
