ខេត្តកែប៖ នៅព្រឹកថ្ងៃពុធ ៩រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៦ ខែមិថុនា ឆ្នាំ២០១៩ ក្រុមប្រឹក្សាខេត្តកែប អាណត្តិទី៣ បានបើកកិច្ចប្រជុំសាមញ្ញលើកទី១ ដែលប្រព្រឹត្តិទៅក្រោមអធិបតីភាព ឯកឧត្តម សំ សារីន ប្រធានក្រុមប្រឹក្សាខេត្ត និងឯកឧត្តម អ៊ឹង ឆាយ អភិបាលខេត្តស្តីទី និងដោយមានការអញ្ជើញចូលរួមពីសំណាក់ឯកឧត្តម លោកជំទាវ សមាជិក សមាជិកាក្រុមប្រឹក្សាខេត្តចំនួន១៥នាក់ លោក លោកស្រីអភិបាលរងនៃគណះអភិបាលខេត្ត លោកនាយក នាយរងរដ្ឋបាល លោកក លោកស្រីនាយកទីចាត់ការ ប្រធានអង្គភាពចំណុះរចនាសម្ព័ន្ធសាលាខេត្ត លោក លោកស្រីប្រធានមន្ទីរ អង្គភាព និងអភិបាលក្រុង ស្រុក។
កិច្ចប្រជុំនេះបានដំណេីរការទៅដោយមានរបៀបវារៈចំនួន៤រួមមាន៖
ទី១-ផ្សព្វផ្សាយ សេចក្តីណែនាំលេខ០១៥សណន ចុះថ្ងៃទី២៨ ខែឧសភា ឆ្នាំ២០១៩ របស់ក្រសួងមហាផ្ទៃ ស្តីពីការរៀបចំបទបញ្ជាផ្ទៃក្នុង និងគំរូបទបញ្ជាផ្ទៃក្នុងរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ។
ទី២-ការផ្តួចផ្តើមរៀបចំសេចក្តីព្រាងប្រតិទិន ស្តីពីកិច្ចប្រជុំសាមញ្ញលេីកទី២របស់ក្រុមប្រឹក្សាខេត្តអាណត្តិទី៣។
ទី៣-របាយការណ៍របស់ឯកឧត្តមអភិបាលនៃគណៈអភិបាលខេត្ត អំពីលទ្ធផលការងាររបស់រដ្ឋបាលខេត្តក្នុងអាណត្តិទី២របស់ក្រុមប្រឹក្សាខេត្ត និងការងារសេសសល់រយះពេលបីខែ ដែលសម្រេចដោយក្រុមប្រឹក្សាអាណត្តិទី២ និងទិសដៅអនុវត្តបន្ត។
៤-បញ្ហាផ្សេងៗ។
មានប្រសាសន៍ក្នុងកិច្ចប្រជុំលើកទី១នេះ ឯកឧត្តម សំ សារីន បានលើកឡើងថា កិច្ចប្រជុំសាមញ្ញលើកទី១នេះ ជាការបង្ហាញរបៀបវារៈដែលក្រុមប្រឹក្សាត្រូវអនុម័តនៅកិច្ចប្រជុំលើកក្រោយ។ ដោយឡែកកិច្ចប្រជុំពេលនេះមិនមានការអនុម័ត ជាគោលការណ៍ណាមួយឡើយ។
នាឱកាសនោះដែរ ឯកឧត្តម អ៊ឹង ឆាយ បានមានប្រសាសន៍លើកឡើងអំពីស្នាដៃការងាររបស់រដ្ឋបាលខេត្តក្នុងអាណត្តិទី២ របស់ក្រុមក្រុមប្រឹក្សាលើការអភិវឌ្ឍ ការកសាងហេដ្ឋារចនាសម្ពន្ធ័ក្នុងខេត្ត ការបំរើសេវាសាធារណៈជូនប្រជាពលរដ្ឋ និងការងារទប់ស្កាត់បទល្មើសផ្សេងៗ ដើម្បីធ្វើឲ្យភូមិ-សង្កាត់ មានសុវត្ថិភាពជាមួយ និងការដាក់ទិសដៅការងាររយៈពេល៣ខែបន្ត ក្នុងអាណត្តិទី៣ផងដែរ៕
