(ខេត្តកំពត)៖ នៅព្រឹកថ្ងៃអង្គារ ៨រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៥ ខែមិថុនា ឆ្នាំ២០១៩ លោក ប៉ែន សំបូរ ទីប្រឹក្សាសម្តេចចៅហ្វាវាំង គង់ សំអុល រដ្ឋមន្ត្រីក្រសួងព្រះបរមរាជវាំង បានអញ្ជើញនាំយកព្រះរាជទ្រព្យព្រះករុណាព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ប្រោសប្រទានព្រះរាជអំណោយដល់ក្រុមគ្រួសារនៃសពកម្មករសំណង់បានស្លាប់បាត់បង់អាយុជីវិតចំនួន៦នាក់ ស្ថិតនៅក្នុងភូមិបឹងធំខាងកើត និងភូមិព្រៃទទឹង ឃុំអង្គសុរភី ស្រុកកំពង់ត្រាច ខេត្តកំពត ដែលរងគ្រោះដោយឧបទ្ទវហេតុបាក់រលំអគារសំណង់នៅខេត្តព្រះសីហនុ។
ព្រះរាជអំណោយជាថវិកា បានប្រគល់ជូនក្រុមគ្រួសារសពទាំង៦ ដោយគ្រួសារនីមួយៗទទួលបានថវិកាចំនួន៤,០០០,០០០រៀល សរុប២៤,០០០,០០០រៀល។
ជាមួយគ្នានេះដែរមន្ត្រីជំនាញរបស់បេឡាជាតិរបបសន្តិសុខសង្គម(ប.ស.ស) នៃក្រសួងការងារ និងបណ្តុះបណ្តាលវិជ្ជីវៈ បានប្រគល់ជូនថវិកាដល់ក្រុមគ្រួសារសពទាំង៦ផងដែរ ដោយក្នុងមួយគ្រួសារៗ ទទួលថវិកាចំនួន៤,០០០,០០០រៀល សរុប២៤,០០០,០០០រៀលផងដែរ។
ថវិកាផ្តល់ជូនសរុបរួមចំនួន ៤៨,០០០,០០០រៀល ក្នុងនោះគ្រួសារនីមួយៗ ទទួលថវិកាចំនួន៨,០០០,០០០រៀល។
សូមជម្រាបថា៖ ពិធីប្រគល់ថវិកានេះក៏មានការអញ្ជើញចូលរួមពីសំណាក់លោក ហាស់ សូបិន អភិបាលរងខេត្ត តំណាងដ៏ខ្ពង់ខ្ពស់ លោក ជាវ តាយ អភិបាល នៃគណៈអភិបាលខេត្តកំពត លោក អូន ខន អភិបាល នៃគណៈអភិបាលស្រុកកំពង់ត្រាច សមាជិកក្រុមប្រឹក្សាស្រុក កងកម្លាំងទាំងបីយុវជនគណបក្សស្រុក យុវជនស្រលាញ់សន្តិភាព លោកគ្រូ អ្នកគ្រូ និងសិស្សវិទ្យាល័យអង្គសុរភី រួមនិឹងអាជ្ញាធរភូមិ ឃុំផងដែរ៕ សេង ណារិទ្ធ
