បើយោងតាមគេហទំព័រផ្លូវការរបស់លោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិកម្ពុជានៅថ្ងៃទី២១មិថុនា ឆ្នាំ២០១៩បាន លើកឡើងថា ការប្រឌិតរឿងក្លែងក្លាយតាមបណ្តាញសង្គមនៅតែបន្តកើតមានជាបន្តបន្ទាប់ ដែលជះឥទ្ធិពលអាក្រក់ដល់ការផ្សព្វផ្សាយនូវព័ត៌មានពិតប្រាកដនៅកម្ពុជាក៏ដូចជានៅលើ ពិភពលោក។
លោកនាយឧត្តមសេនីយ៍ ឈុំ សុជាតិ បានបញ្ជាក់ថា កន្លងទៅនេះ ក្រុមទុច្ចរិតបាន ប្រើប្រាស់រូបភាពថ្នាក់ដឹកនាំក្រសួងការពារជាតិក្នុងគណនីហ្វេសប៊ុក ក្លែងក្លាយរបស់ពួកគេ ដើម្បីផ្សព្វផ្សាយវាយប្រហារមួលបង្កាច់មកកាន់ថ្នាក់ដឹកនាំរាជរដ្ឋាភិបាលបង្កឱ្យសាធារណ ជនទាំងជាតិនិងអន្តរជាតិមានការភ័ន្តច្រឡំ ។ ប៉ុន្តែព័ត៌មានទាំងនេះក៏ត្រូវបានច្រានចោល ភ្លាមៗជាមួយនឹងការបំភ្លឺការពិតផងដែរ។
ពាក់ព័ន្ធនឹងករណីខាងលើនេះលោកនាយឧត្តមសេនីយ៍បានបន្ដថាយើងឃើញថាក្រុមទុច្ចរិតបានបន្តផ្សព្វផ្សាយមួលបង្កាច់មកលើថ្នាក់ដឹកនាំក្រសួងការពារជាតិយើងថែមទៀត ដោយបានប្រឌិតព័ត៌មានថា ឯកឧត្តមឧត្តមសេនីយ៍ឯកហ៊ុន ម៉ានិតអគ្គនាយក នៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិមានលុយ១០០លានដុល្លារ តម្កល់នៅធនាគារអាមេរិក។
ត្រង់ចំណុចនេះ លោកនាយឧត្តមសេនីយ៍ បានសង្កត់ធ្ងន់ថា នេះជាគឺជាដំណឹងមិនពិតទាល់តែសោះដែលក្រុមទុច្ចរិតបង្កើតឡើងដើម្បីតែលាបពណ៌ បំផ្លាញកិត្តិយសនិងកេរ្តិ៍ឈ្មោះឯកឧត្តមឧត្តមសេនីយ៍ឯកហ៊ុន ម៉ានិតតែប៉ុណ្ណោះ។ ដូច្នេះ សូមសាធារណជនទាំងអស់កុំមានការភ័ន្តច្រឡំ។ លោកនាយឧត្តមសេនីយ៍បានបន្ថែមថា ទន្ទឹមគ្នានឹងក្រុមទុច្ចរិតបង្កើតនូវព័ត៌មានក្លែងក្លាយកាន់តែច្រើន។
លោកនាយឧត្តមសេនីយ៍បានបន្ថែមថា “យើងទាំងអស់គ្នាដែលជាមនុស្សសុច្ចរិត ក៏ត្រូវរួមគ្នាប្រយុទ្ធប្រឆាំងនឹងព័ត៌មានក្លែងក្លាយនេះផងដែរ។ដូចដែលប្រសាសន៍ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងក្នុងជំនួបជាមួយអ្នកសារព័ត៌មានកន្លងមកថា ដើម្បីលុបបំបាត់ព័ត៌មានក្លែងក្លាយ គឺត្រូវរួមគ្នាផ្សព្វផ្សាយព័ត៌មានពិតចេញមក”៕
