(ខេត្តកែប)៖ នៅរសៀលថ្ងៃទី១៩ ខែមិថុនា ឆ្នាំ២០១៩នេះ លោក កែន សត្ថា អភិបាល នៃគណៈអភិបាលខេត្តកែប បានដឹកនាំមន្ត្រីរាជការគ្រប់អង្គភាពទូទាំងខេត្តប្រមាណជាង២០០នាក់ ដើម្បីចូលរួមដាំដើមរំដួលបន្ថែមចំនួន១០០ដើមទៀត ស្ថិតតាមសួនច្បារសម្តេចតេជោ ហ៊ុន សែន ត្រង់ចំណុចវិមានឯករាជ្យ នៃទីប្រជុំជនខេត្តកែប។
មានប្រសាសន៍ក្នុងឱកាសនោះ លោក កែន សត្ថា អភិបាលខេត្តកែប បានឱ្យដឹងថា កន្លងមករដ្ឋបាលខេត្តបានធ្វើពិធីដាំដើមរំដួលប្រមាណជាង៤០០ដើមរួចមកហើយ តែដើម្បីជួយកែលម្អទីក្រុងទេសចរណ៍ឱ្យកាន់តែមានសក្តានុពលខ្លាំងក្លាថែមទៀតនោះ រដ្ឋបាលខេត្តក៏បន្តដាំដើមរំដួលបន្ថែមចំនួន១០០ដើមទៀត ដោយមានមន្ត្រីរាជការគ្រប់ជាន់ថ្នាក់ចូលរួមប្រមាណជាង២០០នាក់។
លោកអភិបាលខេត្តបានបន្តថា ចំពោះអ្នកដែលបានចូលរួមដាំដើមឈើ(ដើមរំដួល)នេះត្រូវតែនាំគ្នាថែទាំ ដូចជាស្រោចទឹកដើម្បីឱ្យដើមឈើនេះលូតលាស់ល្អរហូតដល់វាចេញផ្កា ហើយរំដួលនេះជាតំណាងឱ្យជាតិកម្ពុជារបស់យើងផងដែរ។
លោក កែន សត្ថា បានរម្លឹកថា កាលពីឆ្នាំ២០១៤ ព្រះមហាក្សត្របានប្រទាននូវដើមក្រញូងដល់រដ្ឋបាលខេត្តកែបសម្រាប់យកមកដាំនៅលើសួនច្បារសម្តេចតេជោ ហ៊ុន សែន ហើយពេលនេះដើមក្រញូងនេះក៏បានរីកលូតលាស់ល្អផ្តល់ម្លប់យ៉ាងត្រជាក់ទៀតផង។
ជាមួយនេះយើងត្រូវតែយកដើមឈើដែលព្រះមហាក្សត្រប្រទាននេះទុកជានិមិត្តរូប និងសម្រាប់ចារជាប្រវតិ្តសាស្ត្រ ដែលមានទីតាំងសម្គាល់ស្ថិតចំណុចវិមានឯករាជ ដោយប្រវតិ្តសាស្ត្រនេះក៏បានរម្លឹកឡើងវិញនូវបូជនីយកិច្ចនៃព្រះមហាក្សត្រខ្មែរ ដែលបានទទួលឯករាជ្យហើយទទួលបានជ័យជម្នះលើបារាំងក្នុងឆ្នាំ១៩៥៣ផងដែរ។
លោកអភិបាលខេត្តបានបញ្ជាក់ទៀតថា នៅរៀងរាល់ឆ្នាំ ពិធីនៃរុក្ខទិវា ព្រះមហាក្សត្រតែងតែបានធ្វើពិធីជារៀងរាល់ឆ្នាំ ដើម្បីបំផុសប្រជាពលរដ្ឋជាប្រជារាស្ត្ររបស់ព្រះអង្គឱ្យចូលរួមដាំដើមឈើ ថែរក្សាដើមឈើ ស្រលាញ់ដើមឈើ។ទិវានេះមានន័យជាប្រវត្តិសាស្ត្រ ដូច្នេះយើងទាំងអស់គ្នាត្រូវចងចាំថា ដើមឈើពិតជាមានតម្លៃណាស់ ជាពិសេសខេត្តកែបរបស់យើងត្រូវបានលម្អតាក់តែងដោយសួនផ្កាចម្រុះពណ៌ពេញទីក្រុងកែបតែម្តង៕ សេង ណារិទ្ធ
3
