មណ្ឌលគិរី ៖ ឯកឧត្តម ងី ចន្ទ្រផល រដ្ឋលេខាធិការក្រសួងមហាផ្ទៃ ថ្លែងបែបនេះ ក្នុងពិធីប្រកាសចូលកាន់មុខតំណែងក្រុមប្រឹក្សាខេត្ត ចំនួន១៥រូប ដោយមានការចូលរួមពីសំណាក់ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី ព្រមទាំងឯកឧត្តម លោកជំទាវ ក្រុមការងារចុះជួយខេត្តមណ្ឌលគិរី សមាជិកក្រុមប្រឹក្សាខេត្ត អភិបាលរងខេត្ត លោក លោកស្រី ប្រធាន អនុប្រធានមន្ទីរ កងកម្លាំងប្រដាប់អាវុធទាំងបីប្រភេទ អភិបាល អភិបាលរងក្រុង ស្រុក ទាំងប្រាំ នឹងមន្ត្រីរាជការសាលាខេត្ត ដែលប្រព្រឹត្តទៅនៅសាលប្រជុំអាគារក្រុមប្រឹក្សាខេត្ត នាព្រឹកថ្ងៃច័ន្ទ ១៥កើត ខែ ជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែមិថុនា ឆ្នាំ២០១៩។
រដ្ឋលេខាធិការក្រសួងមហាផ្ទៃ ឯកឧត្តម ងី ចន្ទ្រផល បានជម្រុញដល់គណៈអភិបាលខេត្ត រួមទាំងក្រុមប្រឹក្សាខេត្ត ត្រូវបន្តលើកទឹកចិត្តដល់ប្រជាពលរដ្ឋគ្រប់មជ្ឈដ្ឋានអោយចូលរួមនូវគោលនយោបាយ ភូមិ/ឃុំមានសុវត្ថិភាព ដើម្បីរួមចំណែកបង្ការទប់ស្កាត់បទល្មើសគ្រប់ប្រភេទដែលកើតមាននៅតាមមូលដ្ឋាន ពិសេសបទលើ្មសគ្រឿងញៀន ការជួញដូរមនុស្ស អំពើចោរកម្ម ល្បែងស៊ីសងជាដើម ត្រូវខិតខំពង្រឹងវិធានការរដ្ឋបាលនិង វិធានការច្បាប់អោយម៉ឺងម៉ាត់ បន្តលើកកម្ពស់សណ្តាប់ធ្នាប់ សុវត្ថិភាពសាធារណៈ ពិសេសត្រូវបន្តធ្វើការផ្សព្វផ្សាយអប់រំច្បាប់ចរាចរណ៍ផ្លូវគោក ឲ្យបានទូលំទូលាយ និងប្រើប្រាស់វិធានការផ្លូវច្បាប់ ដើម្បីបញ្ចៀសកុំឲ្យមានគ្រោះថ្នាក់ចរាចរណ៍ និងត្រូវមានការទទួលខុសត្រូវក្នុងការលុបបំបាត់ប៉ុស៍ត្រួតពិនិត្យមិនស្របច្បាប់ដែលកើតមានឡើងក្នុងដែនសមត្ថកិច្ចរបស់ខ្លួន។ ក្រុមការងារចុះមូលដ្ឋាន ត្រូវយកចិត្តទុកដាក់ សម្របសម្រួលរៀបចំវេទិកាសាធារណៈ ដើម្បីផ្តល់ឱកាសដល់
ប្រជាពលរដ្ឋបញ្ចេញមតិ និងលើកឡើងនូវបញ្ហាប្រឈមនានា ដែលកើតមានឡើងនៅមូលដ្ឋានរបស់ពួកគាត់ និងការរកដំណោះស្រាយផ្សេងៗ។
ឯកឧត្តម ស្វាយ សំអ៊ាង អភិបាលខេត្ត បានមានប្រសាសន៍ថា ការប្រកាសចូលកាន់មុខតំណែងរបស់ក្រុមប្រឹក្សាខេត្ត សម្រាប់អាណត្តិទី៣នេះ ពិតជាមានសារៈសំខាន់ណាស់ ក្នុងការបន្តសុពលភាពនៃក្រុមប្រឹក្សាខេត្ត និងបន្តធ្វើការដឹកនាំការងារនៅក្នុងអាណត្តិថ្មីរបស់ខ្លួន។ ឯកឧត្តម ក៏បានស្នើដល់ក្រុមប្រឹក្សាខេត្ត ដែលទើបទទួលចូលកាន់មុខតំណែងថ្មី សូមបន្តពង្រឹងទំនាក់ទំនងផ្ទៃក្នុងក្រុមប្រឹក្សា និងទំនាក់ទំនងល្អជាមួយគណៈអភិបាលខេត្ត ឲ្យបានកាន់តែជិតស្និទ្ធនៅក្នុងជួរថ្នាក់ដឹកនាំ ព្រមទាំងជាមួយមន្ត្រីរាជការទាំងអស់ ដោយគោរពទៅតាមតួនាទី ភារកិច្ច និងឋានានុក្រមការងារ ក្តាប់នូវសភាពការណ៍ ដើម្បីដឹងពីសុខទុក្ខរបស់ប្រជាពលរដ្ឋ ចូលរួមជម្រុញលើកទឹកចិត្ត និងលើកកម្ពស់កម្រិតជីវភាពរស់នៅរបស់ប្រជាពលរដ្ឋ សំដៅរួមគ្នាកសាង និងអភិវឌ្ឍន៍ខេត្ត ឲ្យកាន់តែមានការរីកចម្រើនឈានឡើងថែមទៀត ៕
