ព្រៃវែង ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីពិធីសម្ពោធឧបដ្ឋានសាលា និងសមិទ្ធិផលនានា នៅវត្តព្រៃតាម៉ុក ស្ថិតក្នុងភូមិព្រៃតាម៉ុក ឃុំជ្រៃ ស្រុកស្វាយអន្ទរ ខេត្តព្រៃវែងនាព្រឹកថ្ងៃសៅរ៍ ៨កើត ខែជេស្ឋ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៨ ខែមិថុនា ឆ្នាំ២០១៩។
ក្នុងឱកាសនេះដែរ សម្ដេចក្រឡាហោម ស ខេង បានអំពាវនាវឲ្យប្រជាពលរដ្ឋបង្កើនការចូលរួមសហការជាមួយអាជ្ញាធរ និងប៉ុស្ត៍នគរបាលឃុំ ក្នុងការទប់ស្កាត់អំពើលួច ប្លន់ អំពើហិង្សាក្នុងគ្រួសារ ការសេព និងចែកចាយគ្រឿងញៀនក្នុងមូលដ្ឋាន និងត្រូវបើកបរគោរពច្បាប់ចរាចរណ៍ ដើម្បីឲ្យការស់នៅបានប្រកបដោយសេចក្ដីសុខ និងសុវត្ថិភាព។
ឆ្លៀតក្នុងឱកាសនេះផងដែរ សម្ដេចក្រឡាហោមបានជម្រាបអង្គពិធីថាសម្ដេច ចង់ឃើញប្រជាពលរដ្ឋបង្កើនការដាំដុះដំណាំឈើហូបផ្លែ និងបន្លែនៅតាមផ្ទះឲ្យបានច្រើន ដើម្បីកាត់បន្ថយការហូបបន្លែផ្លែឈើដែលអាចមានហានីភ័យដល់សុខភាព ខណៈរាជរដ្ឋាភិបាលក៏កំពុងខិតខំកាត់បន្ថយការនាំចូលបន្លែផ្លែឈើពីក្រៅប្រទេសដែលអាចមានសាធាតុគីមីប៉ះពាល់សុខភាពពលរដ្ឋ។
ជាចុងបញ្ចប់នៃសន្ទរកថា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសប្រគេនបច្ច័យ ឧបត្ថម្ភថវិកា និងសម្ភារជូនអង្គពិធី និងអង្គភាពពាក់ព័ន្ធនៅក្នុងពិធីនាថ្ងៃនេះ មុននឹងបំពាក់គ្រឿងឥស្សរយស និងអញ្ជើញកាត់ខ្សែបូ សម្ពោធដាក់ឲ្យប្រើប្រាស់ឧបដ្ឋានសាលា និងសមិទ្ធផលនានាក្នុងវត្តព្រៃតាម៉ុក ឃំជ្រៃ ស្រុកស្វាយអន្ទរ ខេត្តព្រៃវែង៕
