(ខេត្តកំពត)៖ នៅថ្ងៃព្រហស្បតិ៍ ០៤កើត ខែជេស្ឋ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៦ ខែមិថុនា ឆ្នាំ២០១៩ សហភាពសហព័ន្ធយុវជនកម្ពុជាខេត្តកំពត បានរៀបចំពីធីសំណេះសំណាលជាមួយសមាជិក សមាជិកា សហភាពសហព័ន្ធយុវជនកម្ពុជាខេត្តកំពតក្រោមអធិបតីភាព លោក ហ៊ុន ម៉ានី ប្រធានគណៈកម្មាការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា អមដំណើរដោយថ្នាក់ដឹកនាំសមាជិក សមាជិកា ថ្នាក់កណ្ដាល នៃសហភាពសហព័ន្ធយុវជនកម្ពុជា និងមានការអញ្ជើញចូលរួមពី លោក ជាវ តាយ អភិបាល នៃគណៈអភិបាលខេត្តកំពត និងជាប្រធានគណៈកម្មធិការគណបក្សប្រជាជនកម្ពុជាខេត្តកំពត និងលោក អឹុង ម៉េងហួរ ប្រធានក្រុមប្រឹក្សាខេត្ត និងជាប្រធានគណៈចាត់តាំងគណបក្សប្រជាជនកម្ពុជាខេត្តកំពត ព្រមទាំងសមាជិក សមាជិកា សហភាពសហព័ន្ធយុវជនកម្ពុជា ខេត្ត ក្រុង ស្រុក សរុបប្រមាណ ៩០០នាក់ ដែលបានប្រារព្ធឡើងនៅក្នុងសាលសន្និសីទខេត្តកំពត។
លោក ជាវ តាយ អភិបាលខេត្តកំពតក៏បានថ្លែងការកោតសរសើរ និងអរគុណចំពោះកិច្ចប្រឹងប្រែង ព្រមទាំងការលះបង់ទាំងស្មារតី សម្ភារៈ និងថវិកា របស់សមាជិក សមាជិកា សហភាពសហព័ន្ធយុវជនកម្ពុជាខេត្តកំពតទាំងអស់ ជាពិសេស ឯកឧត្តម ហ៊ុន ម៉ានី ក្នុងការចូលរួមចំណែកជាមួយរាជរដ្ឋាភិបាលលើវិស័យនានា ក្នុងការកាត់បន្ថយភាពក្រីក្រ លើកកម្ពស់សមត្ថភាពវិជ្ជាជីវៈ ការបណ្តុះបណ្តាលយ៉ាងសកម្មចូលរួមកែទម្រង់រដ្ឋបាលសាធារណៈស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា។
ក្នុងឱកាសនោះ លោក ហ៊ុន ម៉ានី បានមានប្រសាសន៍កោតសរសើរអំពី ស្នាដៃរបស់យុវជន សសយក ទាំងថ្នាក់កណ្តាល និងថ្នាក់ខេត្ត ក្រុងស្រុក ដែលបានអនុវត្តការងារសង្គមកន្លងមក ជាពិសេសគឺ ការបំបែកឯកត្តកម្មក្រមាវែងជាងគេបំផុតក្នុងលោក ដោយបានកំណត់ត្រាពិភពលោក ដែលលទ្ធផលនៃការជោគជ័យនេះគឺយើងបានប្រឹងប្រែងយ៉ាងខ្លាំងក្លាបំផុតក្នុងការត្បាញក្រមានេះ ជាមួយគ្នានេះផងដែរលក្ខណៈពិសេសនៃក្រមានេះមានអត្ថន័យដ៏ជ្រាលជ្រៅបំផុតគឺ ការចាប់ផ្តើមនៃសរសៃអំបោះទី១ ត្បាញដោយសម្តេចយាយ និងខ្សែរាជវង្ស ខ្សែអំបោះទី១០០០ ត្បាញដោយ សម្តេចនាយករដ្ឋមន្ដ្រី និងថ្នាក់ដឹកនាំរដ្ឋាភិបាល សមាគមន៍អង្គការ ភ្ញៀវទេសចរណ៍បរទេស និងប្រជាពលរដ្ឋខ្មែរ ដ៏ច្រើនលើសលុបបានចូលរួមត្បាញ នេះគឺបានបញ្ជាក់ថាខ្មែរពិតជាធ្វើបាន និងជាមោទនភាពជាតិទាំងមូល។
ជាចុងក្រោយ លោក ហ៊ុន ម៉ានី បានផ្តាំផ្ញើអប់រំណែនាំដល់បងប្អូនសមាជិក សមាជិកា ទាំងមូលត្រូវចូលរួមការងារសង្គមបន្តទៀត និងត្រូវបង្កើននូវចំណេះដឹងរបស់ខ្លួនឱ្យបានទូលំទូលាយដើម្បីចូលរួមចំណែកកសាងប្រទេសជាតិឱ្យរីកចម្រើនទៅមុខឥតឈប់ឈរ៕ សេង ណារិទ្ធ
