(ខេត្តកំពត)៖ កំណាត់ផ្លូវជាតិលេខ៣៣ ត្រង់ចំណុចផ្សារជុំគ្រៀល នៃភូមិសាស្ត្រស្រុកទឹកឈូ ដែលរងការខូចខាតជាបន្តបន្ទាប់នោះ ពេលនេះត្រូវបានក្រុមជំនាញកំពុងឈូសឆាយជួសជុលយ៉ាងមមាញឹក ដោយចាប់ពីអនុវត្តនៅព្រឹកថ្ងៃទី២១ ខែឧសភា ឆ្នាំ២០១៩នេះ។
គេបានកត់សម្គាល់ឃើញថា ចំណុចផ្លូវជាតិលេខ៣៣ចំណុចខាងកើតទីរួមខេត្តកំពត ដែលកំពុងរងការខូចខាតជាច្រើនអន្លើនោះ គឺស្ថិតត្រង់ចំណុចចាប់ពីផ្លូវភ្លោះភូមិតាអេង រហូតមកដល់ភូមិសាស្ត្រឃុំជុំគ្រៀល ស្រុកទឹកឈូ ខេត្តកំពត ដែលមានចម្ងាយប្រមាណជាងបួនគីឡូម៉ែត្រ។
យោងតាមការរៀបរាប់ពីក្រុមមន្ត្រីជំនាញ បានឲ្យដឹងថា កំណាត់ផ្លូវនានាស្ថិតតាមភូមិសាស្ត្រខេត្តកំពត ក្រោយពីរងការខូចខាតកន្លងមក មន្ត្រីជំនាញបានខិតខំយកចិត្តទុកដាក់សម្រុកជួសជុលយ៉ាងសស្រាក់សស្រាំ ប៉ុន្តែមួយរយៈមុនដោយសារមានភ្លៀងធ្លាក់កក់ខែជាបន្តបន្ទាប់ទើបបង្កឲ្យមានការរាំងស្ទះក្នុងការជួសជុល។
មន្ត្រីជំនាញដដែលបានអះអាងថា ចំពោះកំណាត់ផ្លូវជាតិលេខ៣៣ ចំណុចភូមិសាស្ត្រឃុំជុំគ្រៀល ដែលកំពុងរងការខូចខាតស្ទើទាំងស្រុងនោះ ពេលនេះមន្ត្រីជំនាញចាប់ផ្តើមប្រើគ្រឿងចក្រឈូសឆាយស្ថាបនាជាថ្មីចាប់ពីពេលនេះតទៅ ដើម្បីជួយសម្រួលការធ្វើដំណើររបស់ពលរដ្ឋឲ្យកាន់តែមានភាពប្រសើរជាងមុន។
សូមបញ្ជាក់ថា កំណាត់ផ្លូវជាតិលេខ៣៣ ចាប់ពីទីប្រជុំជនភូមិតាអេង រហូតមកដល់សហគមន៍អ្នកផលិតអំបិលកំពត-កែប បច្ចុប្បន្នបាននិងកំពុងរងការខូចខាតជាច្រើនអន្លើ ដោយសាររថយន្តធុនធ្ងន់ផ្ទុកលើសចំណុះដែលតែងបើកបរឆ្លងកាត់ទាំងយប់ទាំងថ្ងៃ ហើយកន្លងមកគេសង្កេតឃើញអង្គភាពជំនាញ ធ្វើការជួសជុលជាបន្តបន្ទាប់ ស្ទើគ្មានពេលទំនេរឡើយ៕ សេង ណារិទ្ធ
