ភ្នំពេញ ៖ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានបញ្ជាក់ពីវិធានការដ៏ម៉ឺងម៉ាត់ នៃការបង្ក្រាបល្បែងស៊ីសងគ្រប់ប្រភេទ នៅរាជធានីភ្នំពេញ ដែលកំពុងកើតមានឡើង និងកំពុងលេងភ្នាល់គ្នាយ៉ាងគគិកគគ្រេង។
ផែនការបង្ក្រាបល្បែងស៊ីសងទាំងនេះ អភិបាលរាជធានីភ្នំពេញ នឹងបើកកិច្ចប្រជុំគណៈបញ្ជាការឯកភាពរបស់ខ្លួន នៅពេលខាងមុខដ៏ខ្លីនេះផងដែរ។
នៅព្រឹកថ្ងៃទី១៨ ខែឧសភា ឆ្នាំ២០១៩នេះ ឯកឧត្តម បានថ្លែងប្រាប់បណ្ដាញព័ត៌មានក្នុងស្រុកថា លោកបានដាក់ផែនការឲ្យស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវ ហើយឈានទៅដល់ការបង្ក្រាបល្បែងនៅរាជធានីភ្នំពេញ។
ឯកឧត្តម បានបញ្ជាក់ថា «ខ្ញុំបានដាក់ផែនការនេះ ឲ្យស្នងការរាជធានីភ្នំពេញ ចុះធ្វើការស្រាវជ្រាវ ហើយឈានទៅដល់ការបង្ក្រាបតែម្ដង ពីព្រោះវាដូចជាគគិកគគ្រេងពេក ហើយខ្ញុំនឹងបើកកិច្ចប្រជុំ គណៈបញ្ជាការឯកភាពលើរឿងនេះផងដែរ»។
ជាក់ស្ដែង កាលពីម្សិលមិញ លោកអភិបាល បានបញ្ជាឲ្យអាជ្ញាធរខណ្ឌដូនពេញ ចុះបង្ក្រាបទីតាំងលួចបើកហ្គេម និងចាក់បាល់មួយកន្លែង គ្មានស្លាកយីហោ នៅសង្កាត់ផ្សារថ្មី១ ខណ្ឌដូនពេញ ដោយឃាត់ខ្លួនអ្នកប្រចាំការប្រុសស្រីចំនួន ០២នាក់ ព្រមទាំងវត្ថុតាងមួយចំនួនទៀត ៕
