(ខេត្តកំពត) ៖ នៅរសៀលថ្ងៃចន្ទ ១២រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០១ ខែមេសា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានអញ្ជើញចូលរួមជាអធិបតីភាពក្នុងកិច្ចប្រជុំពិភាក្សារៀបចំពិធីព្រឹត្តិការណ៍កំពតសង្ក្រាន្ត២០១៩ ថ្ងៃចូលឆ្នាំថ្មី ប្រពៃណីជាតិខ្មែរ ឆ្នាំកុរ ឯកស័ក ព.ស ២៥៦៣។
សមាសភាពចូលរួមក្នុងកិច្ចប្រជុំនេះមាន អភិបាលរងខេត្ត នាយក នាយករងរដ្ឋបាលសាលាខេត្ត អភិបាលក្រុង ស្រុក ប្រធានមន្ទីរ អង្គភាពជុំវិញខេត្ត នាយកទីចាត់ការ នាយករងទីចាត់ការ ប្រធាន អនុប្រធានអង្គភាព ចំណុះសាលាខេត្ត សរុប ៥៩នាក់។
ក្និងឱកាសនោះ លោកអភិបាលខេត្តកំពត បានមានប្រសាសន៍ ណែនាំដល់មន្ទីរ អង្គភាពជុំវិញខេត្ត ក្រុង ស្រុក រៀបចំសម្អាតអនាម័យ តុបតែងភ្លើងលម្អនៅតាមមន្ទីរ អង្គភាពទូទាំងខេត្ត ជាពិសេស ជូនដំណឹងដល់ប្រជាពលរដ្ឋនៅក្នុងក្រុងកំពត រៀបចំផ្ទះសំបែងឲ្យស្អាត និងផ្សព្វផ្សាយឲ្យបានទូលំទូលាយដល់សាធារណជនចូលរួមកំសាន្តសប្បាយរីករាយក្នុងព្រឹត្តិការណ៍កំពតសង្ក្រាន្ត២០១៩ ឲ្យច្រើនកុះករ ដើម្បីទទួលអំណរសាទរឆ្នាំថ្មី ប្រពៃណីជាតិខ្មែរយើង៕
សេង ណារិទ្ធ
