(ខេត្តកែប)៖ លោកកែន សត្ថា អភិបាល នៃគណៈអភិបាលខេត្តកែប បានជំរុញដល់មន្ទីរអង្គភាពពាក់ព័ន្ធ ពង្រឹងកម្លាំងដើម្បីការពារ ទប់ស្កាត់កុំឲ្យមានការកាប់វាត ទន្ទ្រានដីព្រៃឧទ្យានជាតិបន្តទៀត។
លោកអភិបាលខេត្ត បានលើកឡើងបែបនេះ ក្នុងកិច្ចប្រជុំគណៈអភិបាលខេត្តបើកទូលាយ នារសៀលថ្ងៃអង្គារ ១៤រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៥ ខែមីនា ឆ្នាំ២០១៩។ ដោយកិច្ចប្រជុំនេះ ក៏មានការអញ្ជើញចូលរួមពីសំណាក់លោក លោកស្រី ជាអភិបាលរងខេត្ត លោក លោកស្រី ប្រធាន អនុប្រធានមន្ទីរជុំវិញខេត្ត កងកម្លាំងប្រដាប់អាវុធទាំងបី និងមន្ត្រីចំណុះនៃរដ្ឋបាលខេត្តកែប។
លោក អភិបាលខេត្តបានបញ្ជាក់ទៀតថា ក្រៅពីការរក្សាការពាបរិស្ថានឲ្យមានលំនឹងសម្រាប់ទប់ទល់នឹងការបម្រែបម្រួលអាកាសធាតុ មន្ត្រីជំនាញត្រូវតែការពារទប់ស្កាត់កុំឲ្យភ្លើងឆេះព្រៃ ដូចជាការដុតព្រៃ ឬការបោះចោលកន្ទុយបារីជាដើម ព្រោះពេលនេះជារដូវក្តៅងាយប្រឈមនឹងករណីឆាបឆេះបំផុត។លោកបានបញ្ជាក់ថា ចំពោះការទន្ទ្រានដីព្រៃឧទ្យានជាតិ កន្លងមកធ្លាប់កើតមាននៅតាមចំណុចមួយចំនួននៃខេត្តរបស់យើង ប៉ុន្តែលោកមិនអនុញ្ញាតឲ្យបុគ្គលខិលខូចរំលោភបំពានយកធ្វើជាកម្មសិទ្ធិបានឡើយ។
ជាមួយគ្នានេះ លោក កែន សត្ថា អភិបាលខេត្តកែប ក៏បានលើកឡើងពីបទល្មើសផ្សេងៗ ពិសេសករណីគ្រឿងញៀនដែលកើតមានឡើងកន្លងមក ដោយលោកបានជំរុញឲ្យសមត្ថកិច្ចជំនាញត្រូវទប់ស្កាត់ និងបង្ក្រាបឲ្យអស់ ដើម្បីឲ្យភូមិសាស្ត្ររបស់យើងគ្មានគ្រឿងញៀន៕
សេង ណារិទ្ធ
