(ខេត្តកែប)៖សហភាពសហព័ន្ធយុវជនកម្ពុជា គឺជាតំណាង ការពារសិទ្ធិ និងផលប្រយោជន៍ដ៏ត្រឹមត្រូវរបស់យុវជនកម្ពុជា ទាំងខាងជីវភាព ស្មារតី និងសង្គមផងដែរ។
នេះជាប្រសាសន៍ដ៏មានន័យរបស់ លោក កែន សត្ថា អភិបាល នៃគណៈអភិបាលខេត្តកែប បានថ្លែងកាលពីរសៀលថ្ងៃពុធ ៨រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៧ ខែកុម្ភៈ ឆ្នាំ២០១៩ ក្នុងពិធីផ្សព្វផ្សាយសេចក្ដីសម្រេចនៃមហាសន្និបាតដំណាងទូទាំងប្រទេសលើកទី៤ របស់សហភាពសហព័ន្ធយុវជនកម្ពុជា និងបូកសរុបលទ្ធផលការងាររបស់សហភាពសហព័ន្ធយុវជនកម្ពុជា(ស.ស.យ.ក)ខេត្តកែប។
លោកអភិបាលខេត្តកែបបានបន្តទៀតថា លើសពីនេះដើម្បីបង្កើនការងារឲ្យកាន់តែប្រសើរឡើងថែមទៀត យើងត្រូវមានការទំនាក់ទំនង និងសហការល្អជាមួយអង្គការ សង្គម សហគម និងសហព័ន្ធដែលធ្វើសកម្មភាពពាក់ព័ន្ធនឹងយុវជន សំដៅអប់រំលើកទឹកចិត្តយុវជនក្នុងការរៀនសូត្រ ពលកម្ម កំសាន្ត សប្បាយ ព្រមទាំងចូលរួមលើកកម្ពស់ការអប់រំ ថែទាំសុខភាពរបស់កុមារកម្ពុជា។ជាមួយនេះសហភាពសហព័ន្ធយុវជនកម្ពុជា ក៏មានតួនាទីទំនាក់ទំនងជាមិត្តភាព និងសហប្រតិបតិ្តការទូលំទូលាយជាមួយអង្គការជាតិ អន្តរជាតិ បុគ្គល ប្រជាជន និងយុវជននៃប្រទេសនានាលើសកលលោកក្នុងការតស៊ូ ដើម្បីសន្តិភាព ឯករាជ្យ ប្រជាធិបតេយ្យ វឌ្ឍនភាពសង្គម និងអនាគតស្រស់បំព្រងរបស់យុវវ័យ។
ជាមួយគ្នានេះ លោក កែន សត្ថា អភិបាលខេត្តកែប ក៏បានថ្លែងការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ថ្នាក់ដឹកនាំ សមាជិក សមាជិកា សហភាពសហព័ន្ធយុវជនកម្ពុជាគ្រប់រូបដែលបានបំពេញតួនាទី និងចូលរួមយ៉ាងសកម្ម ក្នុងសកម្មភាពសង្គមនាពេលកន្លងមកសម្រេចបានផលជាផ្លែផ្កា គួរជាទីមោទនភាពយ៉ាងក្រៃលែង ហើយសង្ឃឹមថា ក្នុងឆ្នាំបន្តបន្ទាប់ខាងមុខ ដោយផ្អែកតាមទិសដៅដែលបានដាក់ចេញ សហភាពសហព័ន្ធយុវជនកម្ពុជាខេត្តកែប នឹងសម្រេចបាននូវសមិទ្ធផលថ្មីៗជាច្រើនទៀតមិនខាន៕
សេង ណារិទ្ធ
