(ខេត្តកែប)៖ នៅព្រឹកថ្ងៃទី២៧ ខែកុម្ភៈ ឆ្នាំ២០១៩ លោក កែន សត្ថា អភិបាល នៃគណៈអភិបាលខេត្តកែប បានដឹកនាំមន្ត្រីរាជការនៃរដ្ឋបាលខេត្ត កងកម្លាំងប្រដាប់អាវុធ ក្រុមយុវជនកាយរិទ្ធ សម្ពន្ធយុវជនស្រលាញ់សន្តិភាព លោកគ្រូ អ្នកគ្រូ សិស្សានុសិស្ស ក្រុមអាជីវករ ចូលរួមអបអរសាទរ ទិវាជាតិទីក្រុងស្អាតលើកទី៧ ក្រោមប្រធានបទ”ទីក្រុងស្អាត៖ទីក្រុងផ្តល់ភាពកក់ក្តៅ”ឆ្នាំ២០១៩ នៅមាត់ឆ្នេរខេត្តកែប។
ក្នុងឱកាសនោះដែរ លោក កែន សត្ថា អភិបាលខេត្ត ក៏បានអានសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលមានខ្លឹមសារថា បច្ចុប្បន្នកម្ពុជាមានសុខសន្តិភាព ស្ថិរភាពនយោបាយ សណ្តាប់ធ្នាប់សាធារណៈ ប្រព័ន្ធហេដ្ឋារចនាសម្ព័ន្ធល្អប្រសើរ និងមានការអភិវឌ្ឍលើគ្រប់វិស័យ ជាមួយនឹងកំណើនសេដ្ឋកិច្ចខ្ពស់គួរឲ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ។លើសពីនេះក្នុងដំណើរឆ្ពោះទៅមុខ កម្ពុជាត្រូវបន្តខិតខំប្រឹងប្រែងឲ្យកាន់តែខ្លាំងក្លាបន្ថែមទៀតដើម្បីទទួលបាននូវភាពរីកចម្រើនសម្រេចបានតាមបំណងប្រាថ្នារបស់ខ្លួនសំដៅបន្តការកែលម្អជីវភាព និងការរស់នៅរបស់ប្រជាជន និងការរួមចំណែកថែរក្សាភពផែនដីរបស់យើងសម្រាប់កូនចៅជំនាន់ក្រោយៗទៀត។ក្នុងនោះកម្ពុជាត្រូវបន្តយកចិត្តទុកដាក់ខ្ពស់លើការងារសំខាន់ៗមានជាអាទិ៍៖ការបន្តកាត់បន្ថយភាពក្រីក្រ ការលើកកម្ពស់សុខភាព និងសុខមលភាពប្រជាជន ការគិតគូរពីចីរភាពនៅតាមបណ្តាទីក្រុង ការឆ្លើយតប និងបញ្ហាបម្រែបម្រួលអាកាសធាតុ កិច្ចការពារ និងអភិរក្សធនធានធម្មជាតិជាដើម។
ក្នុងស្មារតីឆ្លើយតបទៅនឹងការវិវត្តន៍ និងនិន្នាការអភិវឌ្ឍន៍ថ្មីៗនេះ កម្ពុជាត្រូវបន្តយកចិត្តទុកដាក់លើការដាក់ចេញ និងអនុវត្តនូវគោលនយោបាយ និងយុទ្ធសាស្ត្រអភិវឌ្ឍន៍ជាតិនានាដោយឈរលើមូលដ្ឋានសំខាន់ៗ២ ដែលត្រូវគិតគូរស្របពេលគ្នាគឺ៖ ការបង្កើនឧត្តមភាពប្រកួតប្រជែង និងការធានាចីរភាពនៃការអភិវឌ្ឍ។ ឈរលើមូលដ្ឋាននេះ កម្ពុជាក៏បានដាក់ចេញនូវយុទ្ធនាការ”ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ”ដែលជាយុទ្ធសាស្ត្រមួយដ៏សមស្របក្នុងការចូលរួមអភិវឌ្ឍវិស័យទេសចរណ៍ជាមាសបៃតងនិងនាំកម្ពុជាឆ្ពោះទៅរកភាពស្អាត និងបៃតងប្រកបដោយសុវត្ថិភាពខ្ពស់។
សូមជម្រាបថា៖ ទិវាជាតិទីក្រុងស្អាត លើកទី៧ ក្រោមប្រធានបទ”ទីក្រុងស្អាត៖ទីក្រុងផ្តល់ភាពកក់ក្តៅ”នេះ បានធ្វើឡើងដើម្បីអបអរសាទរនូវជ័យលាភី ពានរង្វាន់ទីក្រុងស្អាត ដែលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រគល់ដល់រដ្ឋបាលខេត្តកែប កាលពីថ្ងៃទី២៥ខែកុម្ភៈ ឆ្នាំ២០១៩។ នេះជាឆ្នាំលើកទី៧ហើយ ដែលយើងបានប្រារព្ធទិវាជាតិទីក្រុងស្អាត ក្រោមប្រធានបទ” ទីក្រុងស្អាត ទីក្រុងផ្តល់ភាពកក់ក្តៅ”។តាមរយៈប្រធានបទនេះឆ្លុះបញ្ចាំងយ៉ាងច្បាស់ថា ប្រជាពលរដ្ឋគ្រប់រូបតែងប្រាថ្នាចង់រស់នៅក្នុងទីក្រុងប្រកបដោយភាពវៃឆ្លាត និងមាន”ភាពស្អាត និងភាពបៃតង”យកចិត្តទុកដាក់លើកត្តាអនាម័យ មានការធានាសន្តិសុខ សុវត្ថិភាពពេញលេញ និងមានការរៀបចំសណ្តាប់ធ្នាប់ល្អប្រសើរ៕ សេង ណារិទ្ធ
