(ខេត្តកំពត)៖ ដោយអនុវត្តតាមបទបញ្ជារបស់ប្រមុខរាជរដ្ឋាភិបាលកម្ពុជា និងត្រៀមគ្រប់មធ្យោបាយក្នុងការជួយអន្តរាគមន៍ដល់ប្រជាពលរដ្ឋដែលជួបការលំបាក នៅព្រឹកថ្ងៃអង្គារ ៧រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៦ ខែកុម្ភៈ ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានអញ្ជើញជាអធិបតី ក្នុងពិធីចាក់បេតុងស្ពានស្ទឹងកោះស្លា ស្ថិតនៅភូមិកោះស្លា ឃុំតាកែន ស្រុកឈូក ប្រវែង ៥៥ម៉ែត្រ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេច កិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន។
ក្នុងពិធីនេះក៏មានការអញ្ជើញចូលរួមផងដែរពីសំណាក់ លោក លោកស្រី ជាសមាជិកក្រុមប្រឹក្សាខេត្ត អភិបាលរងខេត្ត លោក លោកស្រីនាយក នាយករងរដ្ឋបាលខេត្ត ប្រធាន អនុប្រធានមន្ទីរ អង្គភាពជុំវិញខេត្ត កងកម្លាំងទាំងបីប្រភេទ នាយក នាយករងទីចាត់ការ អង្គភាពចំណុះសាលាខេត្ត សិស្សានុសិស្ស និងប្រជាពលរដ្ឋមកពីឃុំនានា ក្នុងស្រុកឈូក សរុបប្រមាណ៥០០នាក់។
ស្ពានបេតុងមួយកន្លែងនេះ ជាស្ពានស្ថិតក្នុងអន្តរឃុំ នៅភូមិវាលក្រសាំង ឃុំតាកែន និងភូមិកោះស្លា ឃុំត្រពាំងភ្លាំង ស្រុកឈូក ដែលមានប្រវែង៥៥ម៉ែត្រ ទទឹង៣,១ម៉ែត្រ កំរាស់បេតុង ០,១៥ម៉ែត្រ មានកំពស់ ០៨ម៉ែត្រ សសរស្ពាន១០ជួរ និងចាក់ផ្លូវដីសរចូលប្រវែង ២១០ ម៉ែត្រ នៅសងខាងស្ពាន។ចំពោះសំណង់ស្ពានខាងលើនេះកន្លងមក លោកអភិបាលខេត្ត បានចុះពិនិត្យលើកទី១ ព្រមទាំងបើកការដ្ឋានសាងសង់ កាលពីថ្ងៃទី២២ ខែឆ្នូ ឆ្នាំ២០១៨កន្លងទៅ ហើយការសាងសង់ស្ពាននេះដែរ គ្រោងនឹងចំណាយថវិកាសរុបប្រមាណ ២១.០០០ដុល្លារ។
ក្នុងឱកាសនេះដែរ លោកអភិបាលខេត្ត និងលោកស្រី បានឧបត្ថម្ភដល់សិស្សានុសិស្សចំនួន ៣៧១នាក់ កងកម្លាំង១៤នាក់ និង ប្រជាការពារ ៣០នាក់ ដែលមានថវិកាសរុប ១.៦២០.០០០រៀល៕ សេង ណារិទ្ធ
