(ខេត្តកំពត)៖ ផ្ទះឈើប្រក់ដំបូលសង្កសីមួយខ្នងមានទំហំ៦ម៉ែត្រគុណនិង១៦ម៉ែត្រ ស្ថិតនៅជាប់គល់ស្ពានក្បាលរមាសត្រើយខាងលិច ក្នុងភូមិត្រពាំងធំ ឃុំជុំគ្រៀល ស្រុកទឹកឈូ ខេត្តកំពត ត្រូវអគ្គិសភ័យលេបត្របាក់ក្លាយជាផេះផង់ កាលពីវេលាម៉ោង ៥ទៀបភ្លឺ ថ្ងៃទី២៦ ខែកុម្ភៈ ឆ្នាំ២០១៩នេះ ដោយបានបំផ្លាញទ្រព្យសម្បតិ្តម្ចាស់ផ្ទះគ្មានសល់អ្វីមួយចំរៀកឡើយ។ក្នុងហេតុការណ៍នេះ គេឃើញកម្លាំងសមត្ថកិច្ចជំនាញប្រើរថយន្តពន្លត់អគ្គិសភ័យចំនួនពីរគ្រឿងផងដែរ។
តាមប្រភពព័ត៌មានពីសមត្ថកិច្ចបានឲ្យដឹងថា ក្នុងករណីឆាបឆេះនេះ មុនដំបូងគេឃើញអណ្តាតភ្លើងឆាបឆេះនៅចំណុចផ្ទះបាយយ៉ាងសន្ធោរសន្ធៅ ទើបឆេះបន្តទៅផ្ទះធំ ដោយករណីនេះសង្ស័យផ្តើមឡើងដោយសារទុស្សេខ្សែភ្លើងត្រង់ចំណុចផ្ទះបាយ ហើយផ្ទះឈើខាងលើនេះ ជាផ្ទះរបស់ ឈ្មោះ តាន់ សុផល្លី ភេទប្រុស អាយុ៦២ឆ្នាំ មុខរបរជាយោធា រស់នៅកន្លែងកើតហេតុ។ ប្រភពបានបញ្ជាក់ទៀតថា សម្ភារៈដែលក្លាយជាចំណីភ្លើងឆាបឆេះនោះរួមមាន ម៉ូតូC125 (Honda)ឆ្នាំ២០០៨មួយគ្រឿង មាស១ដំឡឹង៥ជី លុយខ្មែរចំនួន៣.៥០០.០០០រៀល ព្រមទាំងសម្ភារៈមួយចំនួនទៀត។
ប្រភពដដែលបានបន្តថា ក្នុងហេតុការណ៍ភ្លើងឆាបឆេះផ្ទះរបស់យោធាផ្នែកស្រាវជ្រាវខាងលើនេះ កម្លាំងសមត្ថកិច្ចបានប្រើរថយន្តបាញ់ទឹកពន្លត់ចំនួនពីរគ្រឿង ដោយប្រើទឹកអស់៤រថយន្តដើម្បីពន្លត់ ប៉ុន្តែបើទោះជាក្រុមសមត្ថកិច្ចបានពន្លត់ដោយជោគជ័យក្តី ចុងក្រោយផ្ទះនេះនៅសល់តែធ្យូងនិងផេះផង់តែប៉ុណ្ណោះ៕
សេង ណារិទ្ធ
