(ខេត្តកែប)៖ នៅរសៀលថ្ងៃព្រហស្បតិ៍ ២រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២១ ខែកុម្ភៈ ឆ្នាំ២០១៩ លោក កែន សត្ថា អភិបាល នៃគណៈអភិបាលខេត្តកែប បានទទួលបដិសណ្ឋារកិច្ចគណៈប្រតិភូគណៈកម្មការទី៧ នៃព្រឹទ្ធសភា ដែលចុះបំពេញបេសកកម្មក្នុងខេត្តកែប។
ក្នុងពិធីនេះ ក៏មានការអញ្ជើញចូលរួមពីសំណាក់លោកអភិបាលេ់រងខេត្ត ជាច្រើនរូប ព្រមទាំងលោកប្រធាន អនុប្រធានអង្គភាពចំណុះសាលាខេត្តផងដែរ។
ក្នុងឱកាសនោះ លោក កែន សត្ថា អភិបាល នៃគណៈអភិបាលខេត្ត បានមានប្រសាសន៍គោរពជូន ប្រតិភូគណៈគណកម្មការទី៧ នៃព្រឹទ្ធសភា ដោយមានខ្លឹមសារថា ក្នុងឆ្នាំ២០១៨ កន្លងទៅនេះ រដ្ឋបាលខេត្តកែប បានយកចិត្តទុកដាក់ខិតខំពង្រឹង ពង្រីកថែទាំ និងកែលម្អប្រព័ន្ធហេដ្ឋារចនាសម្ព័ន្ធ ទាំងក្នុងតំបន់ទីក្រុង និងជនបទ ដើម្បីឆ្លើយតបនឹងតម្រូវការចាំបាច់ប្រចាំថ្ងៃរបស់បងប្អូនប្រជាពលរដ្ឋ ភ្ញៀវទេសចរ និងអ្នកវិនិយោគ ហើយសមិទ្ធផលដែលរដ្ឋបាលខេត្តសម្រេចបានគឺការចូលរួមចំណែកដ៏ល្អ មិនអាចខ្វះបានរបស់បងប្អូនប្រជាពលរដ្ឋ អាជ្ញាធរមូលដ្ឋាន អង្គភាពជំនាញ កម្លាំងសមត្ថកិច្ច និងអ្នកពាក់ព័ន្ធទាំងអស់ ក្នុងស្មារតីនៃសាមគ្គីភាព ឆ្ពោះទៅសម្រេចគោលដៅតែមួយ គឺវឌ្ឍនៈភាពរបស់ខេត្តកែបទាំងមូល។
លោកអភិបាលខេត្តបានបញ្ជាក់ទៀតថា ក្នុងឆ្នាំ ២០១៩ នេះដើម្បីឆ្លើយតបទៅនឹងភារកិច្ចនេះរដ្ឋបាលខេត្ត បានដាក់ចេញនូវផែនការសកម្មភាពសំខាន់ៗជាអាទិភាព សម្រាប់ត្រៀមលក្ខណៈរៀបចំព្រឹត្តិការណ៍ផ្សេងៗឲ្យបានល្អប្រសើរ និងទទួលភ្ញៀវទេសចរឲ្យបានច្រើនជាងមុន៕
សេង ណារិទ្ធ
