(ខេត្តកំពត)៖ ជំរឿនលើកទី៣នឹងចាប់រាប់សម្ភាសន៍ ជំរឿនតាមគ្រួសារជាក់ស្ដែង នៅថ្ងៃទី០៣ ដល់ថ្ងៃទី១៣ ខែមីនា ឆ្នាំ២០១៩ ដើម្បីដឹងអំពីទិន្នន័យពេញលេញនូវចំនួនប្រជាជន និងចរិកលក្ខណៈប្រជាជននៅក្នុងប្រទេសកម្ពុជា ហើយដើម្បីឲ្យការងារនេះសម្រេចបានជោគជ័យ យើងត្រូវអំពាវនាវឲ្យមានការចូលរួម និងសហការពីប្រជាពលរដ្ឋ ផ្តល់ព័ត៌មានពិតដល់មន្ត្រីជំរឿន។
ការថ្លែងបែបនេះ ជាប្រសាសន៍របស់លោក ជាវ តាយ អភិបាល នៃគណៈអភិបាលខេត្តកំពត ក្នុងកិច្ចប្រជុំគណៈកម្មការជំរឿនទូទៅប្រជាជនខេត្តកំពតឆ្នាំ២០១៩ នៅព្រឹកថ្ងៃទី ២១ ខែកុម្ភៈ ឆ្នាំ២០១៩ នៅឯសាលាខេត្តកំពត។ លោកអភិបាលខេត្តកំពត បានមានប្រសាសន៍ទៀតថា ការធ្វើជំរឿនទូទៅប្រជាជននៅកម្ពុជាគឺជាការងារសំខាន់នឹងចាំបាច់ ដ៏ធំមួយដែលមានសារៈប្រយោជន៍សម្រាប់ប្រទេសជាតិ ដែលអាចឲ្យយើងដឹងបានពីទិន្នន័យប្រជាសាស្ត្រពិតប្រាកដ និងជួយឲ្យរដ្ឋាភិបាលអាចរៀបចំ តាក់តែងគោលនយោបាយបានត្រឹមត្រូវ និងអនុវត្តកម្មវិធីផ្សេងៗ ឲ្យទទួលបានតុល្យភាព នៃការអភិវឌ្ឍសម្រាប់ប្រជាពលរដ្ឋទូទាំងប្រទេស។ជំរឿនប្រជាជន គឺជាប្រភពតែមួយគត់ ដែលអាចផ្តល់ទិន្នន័យពេញលេញអំពីចំនួនប្រជាជន និងចរិកលក្ខណៈប្រជាជននៅក្នុងប្រទេស។
ទិន្នន័យជំរឿន នឹងផ្តល់ជាសូចនាករ តាមដាន ត្រួតពិនិត្យ ការសម្រេចបានការអនុវត្តផែនការយុទ្ធសាស្ត្រអភិវឌ្ឍន៍ជាតិ និងគោលដៅអភិវឌ្ឍន៍ប្រកបដោយចិរភាព នៃរបៀបវារៈ ឆ្នាំ ២០១៦ – ២០៣០ ដោយមិនទុកចោលអ្នកណាម្នាក់ឡើយ។
លោកអភិបាលខេត្ត ក៏បានជំរុញដល់អាជ្ញាធរមូលដ្ឋាននិងមន្ទីរ អង្គភាពពាក់ព័ន្ធត្រូវចូលរួមយកចិត្តទុកដាក់បំពេញតួនាទីភារកិច្ចសហការគ្នា ដើម្បីឲ្យដំណើរការជំរឿនទូទៅប្រជាជននៅកម្ពុជាឆ្នាំ២០១៩ ពិសេសសម្រាប់ក្នុងខេត្តកំពត ក៏ដូចជាប្រជាពលរដ្ឋទូទាំងខេត្តត្រូវចូលរួម សហការ និងផ្តល់ព័ត៌មានពិត ដល់មន្ត្រីជំរឿនដើម្បីឲ្យ ការងារជំរឿនលើកទី៣នេះ ប្រព្រឹត្តទៅបានរលូន និងទទួលបានជោគជ័យតាមសារអំពាវនាវរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អំពីការធ្វើជំរឿនទូទៅប្រជាជនកម្ពុជាឆ្នាំ២០១៩នេះ។
លោក មឿង គង្គា ប្រធានមន្ទីរផែនការខេត្ត និងជាសមាជិកអចិន្ត្រៃយ៍នៃគណៈកម្មាធិការជំរឿនទូទៅប្រជាជននៅខេត្តកំពត បានឲ្យដឹងអំពីរបាយការណ៍វឌ្ឍនភាព ជំរឿនទូទៅប្រជាជនកម្ពុជា ឆ្នាំ២០១៩ នៅខេត្តកំពត ដោយត្រូវអនុវត្តទាំង៨ក្រុង ស្រុក ស្មើ៩៣ឃុំសង្កាត់ មាន៤៨៨ភូមិ ដែលបានបែងចែកជា១.៤៨៩មណ្ឌលជំរឿន ដោយមានមន្ត្រីសម្ភាសន៍សរុបចំនួន ១.៤៨៩នាក់ មន្ដ្រីត្រួតពិនិត្យសរុប ៣៧២នាក់ និងមន្ត្រីបំរុងសរុប៣០នាក់។ ការជំរឿននេះនឹងបើកយុទ្ធនាការធ្វើបច្ចុប្បន្នភាពផែនទី មណ្ឌលជំរឿននិងចុះបញ្ជីផ្ទះដោយចាប់អនុវត្តពីថ្ងៃទី២៨ខែកុម្ភៈ ដល់ថ្ងៃទី០២ ខែមីនាឆ្នាំ ២០១៩ និងចាប់រាប់សម្ភាសន៍ជំរឿនតាមគ្រួសារជាក់ស្ដែងនៅថ្ងៃទី០៣ ដល់ថ្ងៃទី១៣ មីនា ឆ្នាំ២០១៩ ប្រមូលបញ្ជីសំណួរថ្នាក់ឃុំ ស្រុកខេត្តធ្វើនៅ ថ្ងៃទី១៤ដល់ថ្ងៃទី១៥ខែមីនា ឆ្នាំ២០១៩ និងត្រូវបញ្ជូនឯកសារបញ្ជីសំណួរទៅ ដល់វិទ្យាស្ថានជាតិស្ថិតិនៅថ្ងៃទី១៦ ដល់ថ្ងៃទី ២០ខែ មីនា ឆ្នាំ២០១៩៕
សេង ណារិទ្ធ
