(ខេត្តកែប)៖ នៅព្រឹកថ្ងៃព្រហស្បតិ៍ ២រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២១ ខែកុម្ភៈ ឆ្នាំ២០១៩ រដ្ឋបាលខេត្តកែប បានរៀបចំពិធីប្រកាសចូលកាន់តំណែងមន្ត្រីរាជការស៊ីវិលខេត្តកែប និងប្រគល់ប័ណ្ណសមាជិកបេឡាជាតិរបបសន្តិសុខសង្គម(ប.ស.ស)ជូនមន្ត្រីរាជការសាលាខេត្ត សាលាក្រុង សាលាស្រុក ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្ត និង លោក សំ សារីន ប្រធានក្រុមប្រឹក្សាខេត្ត ព្រមទាំងមានការចូលរួមពីសំណាក់លោកអភិបាលរងខេត្ត អភិបាលក្រុង ស្រុក ប្រធាន អនុប្រធាន មន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបី និងមន្ត្រីរាជការចំណុះសាលាខេត្តកែប សរុបប្រមាណ៣២៧នាក់។
យោងតាមសេចក្តីប្រកាសរបស់ក្រសួងមហាផ្ទៃ មន្ត្រីរាជការសីុវិលក្នុងខេត្តកែបប្រមាណជាង៥០នាក់ ត្រូវបានប្រកាសឲ្យចូលកាន់តំណែងដើម្បីទទួលបន្ទុកការងារក្នុងរដ្ឋបាលខេត្តឬអង្គភាពផ្សេងៗ នៃរដ្ឋបាលថ្នាក់ក្រោមជាតិ។
លោក កែន សត្ថា អភិបាលខេត្ត បានឲ្យដឹងថា ដើម្បីឆ្លើយតបនូវតម្រូវការ នៃការផ្លាស់ប្តូរថ្មី ក្រុមប្រឹក្សានៅតាមថ្នាក់រដ្ឋបាល នៃរដ្ឋបាលថ្នាក់ក្រោមជាតិមានរចនាសម្ព័ន្ធ ប្រព័ន្ធ និងនីតិវិធីប្រតិបតិ្តច្បាស់លាស់ ធ្វើឲ្យរដ្ឋបាលរបស់យើង និងការអភិវឌ្ឍប្រកបដោយនិរន្តរភាព។ជាមួយនេះថ្នាក់ជាតិបាននិងកំពុងផ្ទេរមុខងារ និងធនធានមកឲ្យរដ្ឋបាលថ្នាក់ក្រោមជាតិកាន់តែច្រើនឡើង ដូច្នេះក្រុមប្រឹក្សាត្រូវតែមានបុគ្គលិកប្រកបដោយគុណភាព មានសមត្ថភាព មានបទពិសោធន៍គ្រប់គ្រាន់និងឆន្ទៈ ដើម្បីបំពេញការងារគ្រប់វិស័យ និងអនុវត្តសេចក្តីសម្រេចនានារបស់ក្រុមប្រឹក្សានៅតាមថ្នាក់និមួយៗ។លោកបានបញ្ជាក់ទៀតថា ការរៀបចំឲ្យមានក្របខ័ណ្ឌ និងលក្ខខណ្ឌការងារបុគ្គលិករបស់ក្រុមប្រឹក្សា គឺជាដំណើរការមួយដែលផ្សាភ្ជាប់ជាមួយការផ្ទេរមុខងារ និងធនធានទាំងនោះ។លើសពីនេះ រដ្ឋបាលខេត្តបានខិតខំអនុវត្តតួនាទី ភារកិច្ចស្របតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ច្បាប់និងលិខិតបទដ្ឋានគតិយុត្តនានា ក្នុងស្មារតីទទួលខុសត្រូវខ្ពស់ និងទទួលបានលទ្ធផលគួរជាទីមោទនៈ។ជាក់ស្តែការងារសន្តិសុខ សណ្តាប់ធ្នាប់ សុវត្ថិភាព របៀបរៀបរយសាធារណៈ ក្នុងភូមិសាស្ត្រខេត្តមានភាពល្អប្រសើរ មន្ត្រីរាជការ បុគ្គលិក មានការផ្លាស់ប្តូរផ្នត់គំនិត ឥរិយាបថជាបណ្តើរៗ និងគោរពវិន័យបានល្អ ការផ្តល់សេវារដ្ឋបាល និងសេវាសាធារណៈជូនប្រជាពលរដ្ឋរបស់រដ្ឋបាលថ្នាក់និមួយៗនិងមន្ទីរអង្គភាពពាក់ព័ន្ធមានភាពល្អប្រសើរជាងមុនផងដែរ។
សូមជម្រាបថា ក្នុងពិធីប្រកាសចូលកាន់តំណែងព្រឹកនេះ ត្រូវបានតែងតាំងលោក អីុង វុទ្ធី ជានាយករដ្ឋបាលសាលាខេត្តកែប ហើយមន្ត្រីរាជការប្រមាណជាង៥០រូបផ្សេងទៀត ក៏ត្រូវបានប្រកាសចាត់តាំងឲ្យចូលកាន់មុខតំណែងទៅតាមផ្នែកនិមួយៗ៕ សេង ណារិទ្ធ
