ខេត្តប៉ៃលិន ៖ ព្រឹកថ្ងៃ១រោច ខែមាឃ ឆ្នាំច សំរឹទ្ធិស័ពនក ព.ស.២៥៦២ ត្រូវនឹងថ្ងៃទី២០ ខែកុម្ភៈ ឆ្នាំ២០១៩ នៅសាលាប្រជុំធំសាលាខេត្តប៉ៃលិន មានរៀបចំសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅបន្តឆ្នាំ២០១៩ របស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ស្ថិតក្រោមអធិបតីភាពឯកឧត្តម លី វណ្ណសូត្រ អនុរដ្ឋលេខាធិការក្រសួងរៀបចំដែនដី នគរូបនីយកម្ម សំណង់ និងសុរិយោដី តំណាងឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងឯកឧត្តម ផាន់ ចាន់ធុល អភិបាលនៃគណៈអភិបាលខេត្តប៉ៃលិន ដោយមានការអញ្ជើញចូលរួមពីប្រតិភូថ្នាក់ក្រសួង ប្រធាន អនុប្រធានមន្ទីរ អង្គភាពជុំវិញខេត្ត មន្ត្រីពាក់ព័ន្ធគ្រប់ផ្នែក នៃមន្ទីរដែនដីខេត្តប៉ៃលិន សរុប១៣០នាក់ ។
លោក សូ សុខុន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តប៉ៃលិន បានឲ្យដឹងថា៖ ភារកិច្ចចម្បងរបស់មន្ទីរគឺបានផ្តល់សេវាសាធារណៈជូនប្រជាពលរដ្ឋ លើការងាររៀបចំដែនដី នគរូបនីយកម្ម សំណង់ និងសុរិយោដី ព្រមទាំងការងារដោះស្រាយវិវាទដីធ្លីជាដើម ក្នុងនោះដែរមន្ទីរបានរៀបផែនការអនុវត្តន៍គោលការណ៍ចម្បង៣យ៉ាងគឺ ការរៀបចំដែនដី នគរូបនីយកម្ម ,ការគ្រប់គ្រង់សំណង់ និងការងារគ្រប់គ្រង់ដីធ្លី ។ថ្លែងក្នុងការបើកសន្និបាតនាពេលនោះដែរឯកឧត្តម ផាន់ ចាន់ធុល អភិបាលនៃគណៈអភិបាលខេត្តប៉ៃលិន មានប្រសាសន៍ណែនាំ និងសុំឲ្យមន្ទីរ ត្រូវខិតខំប្រឹងប្រែងបន្ថែមទៀត ក្នុងការអនុវត្តប្រកាស ក៏ ដូចជាសេចក្តីណែនាំ របស់ក្រសួង ជាពិសេស ត្រូវមានសាមគ្គី ឯកភាព និងត្រូវសហការ ជាមួយ អាជ្ញាធរ សមត្ថកិច្ចពាក់ព័ន្ធ ក្នុងការអនុវត្តឲ្យបានល្អ នូវផែនការការងាររបស់ខ្លួន សំដៅជំរុញ ការ កែទម្រង់ស៊ីជម្រៅរបស់រាជរដ្ឋាភិបាលកម្ពុជា សំដៅការផ្តល់សេវាសាធារណៈប្រកប ដោយតម្លាភាព ប្រសិទ្ធភាព និងភាពងាយស្រួល រហ័ស ដល់ប្រជាពលរដ្ឋយើង។
ថ្លែងនៅក្នុងពិធីបិទសន្និបាតនេះដែរឯកឧត្តម លី វណ្ណសូត្រ អនុរដ្ឋលេខាធិការក្រសួងរៀបចំដែនដី នគរូបនីយកម្ម សំណង់ និងសុរិយោដី តំណាងឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៍មានប្រសាសន៍ជម្រុដល់មន្ត្រីរៀបចំដែនដីទាំងអស់ ត្រូវយកចិត្តទុកដាក់ ក្នុងការដោះស្រាយ បញ្ហាទំនាស់ដីធ្លី តាមរយៈការចុះបញ្ជីដី ដើម្បីអោយ ស្របតាមផែនការ ដែលក្រសួងបានកំណត់, បន្តតាមដាន ត្រួតពិនិត្យ និងធ្វើស្ថិតិប្រជាពលរដ្ឋ ដែលបានមករស់នៅ ធ្វើកាន់កាប់ដីនៅខេត្តប៉ៃលិន ព្រមទាំងបន្តខិតខំយកចិត្តទុកដាក់ លើការងារត្រួតពិនិត្យសំណង់ និងលក្ខណៈបច្ចេកទេសសំណង់ និងសោភណ្ឌភាព សណ្តាប់ធ្នាប់ នៃសំណង់ និងបន្តត្រួតពិនិត្យសំណង់ខុសច្បាប់ ដោយផ្សារភ្ជាប់ ជាមួយការងារផ្សព្វផ្សាយលិខិតបទដ្ឋានគតិយុត្តជាធរមានផងដែរ៕
