នាព្រឹកថ្ងៃពុធ ១រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២០ ខែកុម្ភៈ ឆ្នាំ២០១៩
ឯកឧត្តម ហ៊ុន សុខា នាយករងមជ្ឃមណ្ឌលស្រាវជ្រាវ និងបណ្ណាល័យ និងជាជំនួយការអមទីស្តីការគណៈរដ្ឋមន្ត្រី បានអញ្ជើញជាអធិបតីក្នុងពិធីបុណ្យឆ្លងកុដិ បន្ទប់ទឹក និងអាងទឹកនៅក្នុងវត្តព្រហ្មវិហារធម៌តេជោជប់រង្សីសរ៉ារាម (ហៅវត្តអង្គការអេដស៍) ស្ថិតក្នុងភូមិអង្គការអេដស៍ ឃុំកន្ទួត ស្រុកជាំក្សាន្ត ខេត្តព្រះវិហារ។
ពិធីបុណ្យឆ្លងនេះបានផ្តួចផ្តើមធ្វើឡើងដោយលោកគ្រូ រស់ សុខរាជ ព្រះចៅអធិការវត្តព្រហ្មវិហារធម៌តេជោជប់រង្សីសរ៉ារាម (ហៅវត្តអង្គការអេដស៍) រួមនឹងភិក្ខុសង្ឃ គណៈកម្មការ អាចារ្យវត្ត ប្រជាពុទ្ធបរិស័ទចំណុះជើងវត្ត និងប្រជាពុទ្ធបរិស័ទមកពីគ្រប់ទិសទី លោកគ្រូ អ្នកគ្រូ សិស្សានុសិស្សជាច្រើនរយនាក់។
ឯកឧត្តម ហ៊ុន សុខា បាននាំយកអំណោយមួយចំនួនចែកជូនដល់សិស្សានុសិស្ស លោកគ្រូ អ្នកគ្រូ លោកយាយ លោកតាជាពុទ្ធបរិស័ទចំណុះជើងវត្តរួមមាន ÷ ប្រគេនបច្ច័យព្រះសង្ឃចំនួន ៤០,០០០រៀលក្នុងមួយអង្គ លោកយាយ លោកតា ទទួលបានសារុង ម្នាក់១ លោកគ្រូ អ្នកគ្រូ ទទួលបានថវិកាចំនួន ៤០,០០០រៀលក្នុងម្នាក់ សិស្សានុសិស្សក្នុងម្នាក់ទទួលបានសៀវភៅ ១ក្បាល ប៊ិក ១ដើម ខ្មៅដៃ ១ដើម និងថវិកា ២,០០០រៀល។
ជាមួយគ្នានេះ ឯកឧត្តម ហ៊ុន សុខា បានប្រគេនបច្ច័យចំនួន ២,០០០ដុល្លារ ទុកសម្រាប់កសាងវត្តព្រហ្មវិហារធម៌តេជោជប់រង្សីសរ៉ារាម (ហៅវត្តអង្គការអេដស៍) រួមនឹងទូរទស្សន៍ ១ឈុត និងបានជួយឧបត្ថម្ភកុំព្យូទ័រ ១គ្រឿងជូនដល់អនុវិទ្យាល័យស្រអែម ដើម្បីជួលសម្រួលកិច្ចការងាររដ្ឋបាលសាលាផងដែរ៕
