(ខេត្តកំពត)៖ នៅព្រឹកថ្ងៃចន្ទ ១៤កើត ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៨ ខែកុម្ភៈ ឆ្នាំ២០១៩ សាខាកាកបាទក្រហមកម្ពុជា ខេត្តកំពត ដឹកនាំដោយលោកស្រី លាង ហៃ ជាវ តាយ អនុប្រធានកិត្តិយសសាខា តំណាងដ៏ខ្ពង់ខ្ពស់ លោក ជាវ តាយ អភិបាលនៃគណៈអភិបាលខេត្ត និងជាប្រធានកិត្តិយសសាខាកាកបាទក្រហមកម្ពុជា ខេត្តកំពត ដែលមានការអញ្ជើញចូលរួមពីសំណាក់ លោក លោកស្រី សមាជិក សមាជិកាគណៈកម្មាធិការសាខា អនុសាខា អ្នកស្ម័គ្រចិត្ត និងយុវជនកាកបាទក្រហម បានចុះប្រគល់ផ្ទះមានទំហំ៤ម៉ែត្រគុណ៦ម៉ែត្រ ចំនួន៣ខ្នង ធ្វើអំពីឈើ ដំបូលស័ង្កសី ជញ្ជាំងស័ង្កសី ជូនដល់ប្រជាពលរដ្ឋទីទ័លក្រ ចាស់ជរា ចំនួន៣គ្រួសារ នៅ ឃុំត្រពាំងរាំង និងឃុំស្នាយអញ្ជិត ស្រុកជុំគីរី ខេត្តកំពត។
នាឱកាសនេះ លោកស្រី បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋដែលជួបការលំបាក ទីទ័លក្រ មានជំងឺ ជនងាយរងគ្រោះ ជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ និងផ្តាំផ្ញើដល់បងប្អូនប្រជាពលរដ្ឋទាំងអស់ប្រកាន់យកនូវ អនាម័យល្អ រស់នៅស្អាត ហូបស្អាត ផឹកស្អាត។
អំណោយផ្តល់ជូននាពេលនេះ គឺក្នុងមួយគ្រួសារបានទទួលអង្ករ២៥គីឡូក្រាម មី១កេស ទឹកដោះគោខាប់ ២កំប៉ុង ស្ករស១គីឡូក្រាម ខោ២ សម្ភារៈសិក្សាមួយចំនួន ក្រមា១ សារុង១ មុង១ ភួយ១ និងថវិកា៤ម៉ឺនរៀល សរុប ១២ម៉ឺនរៀល៕
សេង ណារិទ្ធ
