បាត់ដំបង ៖ អាជ្ញាធរខេត្តបាត់ដំបង ណែនាំឱ្យបណ្តាច្រកទ្វារទាំង៤ ដែលនៅដំណើរការចេញ ចូល ត្រូវអនុវត្តបទបញ្ជារាជរដ្ឋាភិបាលកម្ពុជា ក្នុងការទប់ស្កាត់ការនាំចូលបន្លែ ផ្លែឈើពីប្រទេសថៃ។
នេះបើតាមផ្តល់ព័ត៌មានពីលោក សឿម ប៊ុនរិទ្ធិ អភិបាលរងខេត្ត និងជាអ្នកនាំពាក្យរដ្ឋបាលខេត្តបាត់ដំបង បានផ្តល់ព័ត៌មានតាមរយៈប្រព័ន្ធ Telegram មកក្រុមការងារប្រចាំខេត្តបាត់ដំបង នាថ្ងៃទី១៧ ខែមិថុនា ឆ្នាំ២០២៥ នេះ ។
លោក សឿម ប៊ុនរិទ្ធិ បានបញ្ជាក់ទៀតថា ទទួលបានការណែនាំពីលោក សុខ លូ អភិបាលខេត្តបាត់ដំបង ឱ្យបណ្តាច្រកទ្វារទាំង៤ ដែលនៅដំណើរការចេញ ចូល ត្រូវអនុវត្តបទបញ្ជារាជរដ្ឋាភិបាលកម្ពុជា ក្នុងការទប់ស្កាត់ការនាំចូលបន្លែ ផ្លែឈើពីប្រទេសថៃ ដោយចាប់អនុវត្តចាប់ពីថ្ងៃអង្គារ ទី១៧ ខែមិថុនា ឆ្នាំ២០២៥ ចាប់ពីម៉ោង៩៖00នាទី ព្រឹកនេះតទៅ ។
ដោយឡែកការធ្វើដំណើររបស់ប្រជាពលរដ្ឋ និងពលករខ្មែរនៅតែបន្តចេញ ចូលដដែល ។
សូមបញ្ជាក់ថា បន្ទាប់ពីសម្ដេចអគ្គមហាសេនាបតី តេជោ ហ៊ុន សែន នៅថ្ងៃទី១៦ ខែមិថុនា ឆ្នាំ២០២៥ បានថ្លែងថា កម្ពុជាទុកពេលឱ្យថៃ រយៈពេល ២៤ម៉ោង បើស្អែកមិនបើកច្រកធម្មតាវិញទេ យើងនឹងបិទច្រកព្រំដែនទូទាំងប្រទេស មិនឱ្យនាំចូលបន្លែ និងផ្លែឈើពីថៃនោះទេ ។
សម្ដេចតេជោ ហ៊ុន សែន “ ជុំវិញការបិទច្រកព្រំដែនភាគីថៃ ជាអ្នកបិទ ដូច្នេះភាគីថៃ ជាអ្នកទទួលខុសត្រូវលើការរំលោភលើកិច្ចព្រមព្រៀងរវាងប្រទេសទាំងពីរ ។ កម្ពុជាមិនអាចទទួលយកការចរចារណាមួយឡើយ ព្រោះការបិទច្រកព្រំដែននេះភាគីថៃ ជាអ្នកបិទមុនដោយឯកតោភាគី ហើយកម្ពុជាទុកពេលឱ្យថៃ ២៤ម៉ោង បើស្អែកអត់បើកច្រកធម្មតាវិញទេ យើងនឹងបិទទូទាំងព្រំដែន អត់ឱ្យនាំចូលបន្លែ និងផ្លែឈើពីថៃ” ។
សម្ដេចតេជោ បានផ្ដាំទៅកាន់ប្រជាជនថៃថា ករណីកកស្ទះទំនិញនេះបើចង់បន្ទោសត្រូវបន្ទោសទាហានថៃ ដែលបិទច្រកព្រំដែនដោយខ្លួនឯង សូមបងប្អូនប្រជាជនថៃ កុំបន្ទោស ឬខឹងសម្បារមកលើរាជរដ្ឋាភិបាលកម្ពុជា លើការបិទច្រកអន្ដរជាតិដូងនេះ ព្រោះនេះជាលទ្ធផលនៃការបំពានច្បាប់របស់ទាហានថៃ ។
សម្ដេចតេជោបានបញ្ជាក់បន្ថែមថា ” ករណីបិទច្រកព្រំដែននេះវារឿងងាយណាស់ព្រោះទាហានថៃ ជាអ្នកចេញបញ្ជាបិទច្រកព្រំដែន ដូចនេះទាហានថៃគ្រាន់តែចេញបញ្ជាបើកច្រកវិញជាការស្រេចទៅហើយ ដោយមិនបាច់ចរចារនាំអន្ទង់វែងឆ្នាំងវែងទេ អ្នកជាអ្នកចង ដូចនេះអ្នកត្រូវតែស្រាយ កុំយកកម្ពុជាទៅឡូកឡំជាមួយកំហុសរបស់អ្នកដទៃ” ៕
