សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នាថ្ងៃទី៩ ខែមិថុនា ឆ្នាំ២០២៥នេះ បានឆ្លៀតផ្ញើសារពីប្រទេសបារាំងដោយបានអំពាវនាវអោយបណ្តាសារព័ត៌មាន និងប្រជាពលរដ្ឋរបស់យើងសូមរក្សាភាពស្ងៀមស្ងាត់ និងសូមជឿទុកចិត្តលើរាជរដ្ឋាភិបាល និងកងទ័ពកម្ពុជាក្នុងការការពារបូរណភាពទឹកដី និងឧត្តមប្រយោជន៍ជាតិខ្មែរយើង។
ជាពិសេស សូមជៀសវាងការបង្កើត ឬចែករំលែកព័ត៍មានមិនច្បាស់លាស់ណាមួយ ដែលនាំអោយមានការយល់ច្រឡំ និងនាំអោយបំប៉ោងសភាពការណ៏លើសពីការពិត ដែលអាចពង្រីកបញ្ហាទៅជាជម្លោះរវាងប្រជាជននិងប្រជាជននៃប្រទេសទាំងពីរ។
ការអំពាវនាវនេះបានធ្វើឡើង បន្ទាប់ពីក្រសួងការពារជាតិ បានចេញសេចក្តីប្រកាស ព័ត៌មានមួយនៅថ្ងៃចន្ទទី៩មិថុនានេះ ដោយសំណូមពរអោយបងប្អូនជនរួមជាតិ និងអ្នកសារព័ត៌មានទាំងអស់ ប្រើប្រាស់តែព័ត៌មាន ដែលមានប្រភពច្បាស់លាស់ ជាពិសេសព័ត៌មានផ្លូវការដែលចេញពីរាជរដ្ឋាភិបាលកម្ពុជា និងក្រសួងការពារជាតិ ដែលជាប្រភពព័ត៌មានមានភាពត្រឹមត្រូវ ពិតប្រាកដ និងអាចជឿទុកចិត្តបាន។
នៅក្នុងសេចក្តីប្រកាសព័ត៌មាននេះ ក្រសួងការពារជាតិបានជម្រាបជូនដល់សាធារណជន និងអ្នកសារព័ត៌មានជាតិនិងអន្តរជាតិ អំពីការវិវត្តថ្មីៗនៃស្ថានការណ៍នៅតំបន់ព្រំដែនកម្ពុជា-ថៃ ថាពុំមានការដកកងទ័ពកម្ពុជា ចេញពីតំបន់ដែលស្ថិតក្នុងដែនអធិបតេយ្យភាពរបស់កម្ពុជា ហើយដែលកងទ័ពកម្ពុជាបានឈរជើងកាន់កាប់ជាយូរមកហើយនោះទេ។
ជាមួយគ្នានេះ កងទ័ពកម្ពុជាគាំទ្រដល់ការខិតខំស្វែងរកដំណោះស្រាយបញ្ហាដោយសន្តិវិធី ប៉ុន្តែត្រៀមខ្លួនជាស្រេច ដើម្បីអនុវត្តបទបញ្ជារបស់រាជរដ្ឋាភិបាល ក្នុងការការពារបូរណភាពទឹកដី ប្រឆាំងរាល់ការប៉ុនប៉ងឈ្លានពាននានា។
សូមបញ្ជាក់ថា សេចក្តីប្រកាសព័ត៌មាននេះ បានធ្វើឡើងបន្ទាប់ពីមានមហាជននៅក្នុងបណ្តាញ សង្គមហ្វេសបុកមានការភាន់ច្រឡំថា កម្ពុជាបានដកកងទ័ពចេញពីដីខ្លួនឯង។
ការភាន់ច្រឡំនេះកើតមានឡើង បន្ទាប់ពីក្រសួងការពារជាតិបានប្រកាសថា កាលពីថ្ងៃទី៨មិថុនា កងទ័ពកម្ពុជា-ថៃបានជួបគ្នានិងបានសម្រេចកែសម្រួលកម្លាំងទាហានទាំងសង ខាងឱ្យត្រឡប់ចូលតំបន់ដែលសមស្រប ដើម្បីកាត់បន្ថយភាពតានតឹង និងប្រឈមមុខគ្នានៅតាមព្រំដែន។
ទាក់ទងបញ្ហានេះ សម្តេចតេជោ ហ៊ុន សែន បានបង្ហោះសារនៅលើបណ្តាញសង្គម ដោយបានបំភ្លឺថា មិនមែនកម្ពុជាដកកងទ័ពចេញពីដីខ្លួនឯងទេ តែជាការកែសម្រួលកម្លាំងក្នុងទឹកដីរបស់ខ្លួន។ ដីយើងនៅតែដីយើងដដែល។
សម្តេចតេជោបានបញ្ជាក់បន្ថែមថា កែសម្រួលកម្លាំង គឺខុសគ្នាជាមួយការដកកងទ័ព។ យើងកែសម្រួលដើម្បីជៀសវាងការប្រយុទ្ធបង្ហូរឈាមគ្នា រីឯការដោះស្រាយចុងក្រោយគឺតុលាការយុត្តិធម៌អន្តរជាតិ៕ អត្ថបទ៖ ពេជ ប៊ុនរ៉ា
