ខេត្តប៉ៃលិន៖ នៅព្រឹកថ្ងៃពុធ ១០រោច ខែបុស្ស ឆ្នាំច សំរឹទ្ធិស័កព.ស២៥៦២ ត្រូវនឹងថ្ងៃទី៣០ ខែមករា ឆ្នាំ២០១៩ មន្ទីរអប់រំយុវជន និងកីឡា ខេត្តប៉ៃលិន បានប្រារព្ធពិធីបើកសន្និបាតបូកសរុប វាយ តម្លៃ ការងារអប់រំ យុវជន និងកីឡា ឆ្នាំសិក្សា២០១៧-២០១៨ និងលើកទិសដៅឆ្នាំសិក្សា ២០១៨-២០១៩ ក្រោមអធិបតីភាពលោក ចេន ញ៉ាន់ អភិបាលរងខេត្តប៉ៃលិន ដោយមានការអញ្ជើញចូលរួមពីអភិបាល អភិបាលរងក្រុង-ស្រុក អាជ្ញាធរឃុំ សង្កាត់ អង្គការដៃគូនានា និងលោកគ្រូ អ្នកគ្រូ យ៉ាងច្រើនកុះករ។
លោក តង់ ធារ៉ា ប្រធានមន្ទីអប់រំ យុវជន និងកីឡាខេត្តប៉ៃលិន បានធ្វើរបាយការណ៍សង្ខេបស្ដីពីលទ្ធផលការងារកន្លងមក គឺពិតជាមានមោទនភាព អំពីលទ្ធផលសម្រចបានទាំងផ្នែកបរិមាណ និង គុណភាពដែលជាសកម្មភាពជាអាទិភាព និងជាយុទ្ធសាស្ត្រ ដែលបានអនុវត្តន៍ ត្រូវបានផ្តោតជាសំខាន់ ទៅលើការលើកកម្ពស់គុណភាពអប់រំ តាមរយៈការពង្រឹងសមត្ថភាពគ្រូបង្រៀន សមត្ថភាពគ្រប់គ្រង អភិបាលកិច្ចល្អ ការតាមដានត្រួតពិនិត្យ ការធ្វើអធិការកិច្ច និងការវាយតម្លៃ ដើម្បីបង្កើនកាលានុវត្តភាពស្មើៗគ្នា ឱ្យដល់កុមារ ទាំងការអប់រំក្នុងប្រព័ន្ធ និងក្រៅប្រព័ន្ធ ដោយធានាឱ្យពួកគេមានឱកាសរៀនចប់កម្រិតមូលដ្ឋាន៩ឆ្នាំ ក្នុងការជំរុញនិងបណ្តុះ បណ្តាលនូវធនធានមនុស្សប្រកបដោយគុណភាព ជាពលករសម្រាប់អភិវឌ្ឍន៍ប្រទេសជាតិឱ្យ រីកចម្រើនតាមកម្មវិធីគោលនយោបាយយុទ្ធសាស្ត្រចតុកោណ របស់រាជរដ្ឋាភិបាល ។
ថ្លែងក្នុងពិធីបើកសន្និបាតបូកសរុបវាយតម្លៃការងារអប់រំ នេះដែរលោក ចេន ញ៉ាន់ អភិបាលរងខេត្តប៉ៃលិន មានប្រសាសន៍លើកឡើងថា៖សង្គមជាតិអាចរីកចម្រើនអភិវឌ្ឍន៍ទៅបាន ត្រូវពឹងផ្អែកលើការងារអប់រំ ពិសេសការកសាងធនធានមនុស្ស ក្រោមការដឹកនាំរបស់រាជរដ្ឋាភិបាលកម្ពុជា បានយកចិត្តទុកដាក់ខ្ពស់អំពីស្ថានភាព ជីវភាពរស់នៅរបស់ប្រជាពលរដ្ឋ អាជីវករ មន្ត្រីរាជការ ដោយបើកទូលាយនូវចរន្តទីផ្សារសេរី និងការតម្លើងប្រាក់បៀវត្សជូនកម្មករ មន្ត្រីរាជការជាបន្តបន្ទាប់ ហើយនៅពេលថ្មីៗនេះ រាជរដ្ឋាភិបាលកម្ពុជា បានផ្តល់នូវរបបសន្តិសុខសង្គមផ្នែកថែទាំសុខភាព ដោយឥតគិតថ្លៃ ជូនគ្រូបង្រៀន អតីតគ្រូបង្រៀន និងមន្ត្រីរាជការសាធារណៈទាំងអស់នៅតាមមន្ទីរពេទ្យបង្អែកខេត្ត ស្រុក និងប៉ុស្តិ៍សុខភាពរបស់រដ្ឋ។
លោកអភិបាលរង បានបន្តថា៖ នៅក្នុងបរិបទនេះ រាជរដ្ឋាភិបាល បានធ្វើការកែទម្រង់ លើ វិស័យជាអាទិភាពជាច្រើន ក្នុងនោះ ការកែទម្រង់រដ្ឋបាលសាធារណៈ កំពុងត្រូវបានអនុវត្តន៍យ៉ាងសកម្ម និងស៊ីជម្រៅ ទាំងនៅរដ្ឋបាលថ្នាក់ជាតិ និងថ្នាក់ក្រោមជាតិ ហើយចំពោះមុខ បណ្ដាវិស័យសំខាន់ៗមួយចំនួននៅថ្នាក់ជាតិ ត្រូវបានធ្វើវិមជ្ឈការ មកឱ្យរដ្ឋបាលថ្នាក់ក្រោមជាតិ ទទួលខុសត្រូវអនុវត្តន៍ ដើម្បីឆ្លើយតបទៅនឹងតម្រូវការជាក់ស្ដែងនៅមូលដ្ឋាន ជាពិសេសសកម្មភាព នៃការលើកកម្ពស់គុណភាព និងប្រសិទ្ធភាព នៃការផ្ដល់សេវាសាធារណៈ សេវារដ្ឋបាល និងវិស័យសំខាន់ៗមួយចំនួន ក្នុងនោះវិស័យអប់រំយុវជន និងកីឡា ក៏ជាផ្នែកមួយដ៏សំខាន់ ក្នុងគោលនយោបាយវិមជ្ឈការ ដូច្នោះ ដើម្បីអនុវត្តន៍គោលនយោបាយនេះប្រកបដោយប្រសិទ្ធិភាព ក្នុងនាមថ្នាក់ដឹកនាំទទួលខុសត្រូវមួយ មន្ត្រីសាធារណៈគ្រប់លំដាប់ថ្នាក់ត្រូវលើកកម្ពស់ការអនុវត្តតួនាទី ភារកិច្ចរបស់ខ្លួនឱ្យកាន់តែប្រសើរឡើងថែមទៀត ជាចុងបញ្ចបលោកក៍បានផ្ដាំផ្ញើ ដល់លោកគ្រូអ្នកគ្រូ ត្រូវហ្វឹកហាត់បន្ថែមទៀត ដើម្បីអភិវឌ្ឍន៍សមត្ថភាពខ្លួន ឱ្យស្របទៅ តាមការអភិវឌ្ឍ នៃបច្ចេកវិទ្យាសកលលោក ផងដែរ ៕
ដោយ សេង សុវណ្ណារិទ្ធ
