(ខេត្តកំពត)៖ នៅសាលប្រជុំសាលាខេត្តនាព្រឹកថ្ងៃច័ន្ទ ០៨រោជ ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែមករាឆ្នាំ ២០១៩នេះ មន្ទីររៀបចំដែនដី នគរូបនីយកម្ម សំណង់និងសុរិយោដីខេត្តកំពត បានបើកសន្និបាតបូកសរុបលទ្ធផលការងារឆ្នាំ ២០១៨ និងលើកទិសដៅការងារ ឆ្នាំ ២០១៩មានរយៈពេលពេញមួយថ្ងៃ ក្រោមវត្តមាន លោក បិុល កុសល អភិបាលរង តំណាង លោក ជាវ តាយ អភិបាល នៃគណៈអភិបាលខេត្តកំពត។
លោក យិន វុឌ្ឍ ប្រធានមន្ទីររៀបចំដែនដី នគរូបនីយកម្មសំណង់និងសុរិយោដីខេត្ត បានធ្វើសន្ទរកថា បញ្ជាក់ថា៖ អង្គសន្និបាតធ្វើឡើងពេលនេះគឺស្របពេលដែល ព្រះរាជាណាចក្រកម្ពុជាយើងបច្ចុប្បន្នកំពុងស្ថិតក្នុងសុខសន្តិភាពពេញបរិបូរមានសភាពការណ៍នយោបាយ សុវត្ថិភាពនិងសណ្ដាប់ធ្នាប់សង្គមល្អប្រសើរនៅទូទាំងប្រទេស។
ជាងនេះទៅទៀត កម្ពុជាក៏បាននិងកំពុងកសាង អភិវឌ្ឍសេដ្ឋកិច្ចក្នុងសន្ទុះលឿនឆាប់រហ័យ ជាពិសេសគឺការសម្រេចបាននូវការអភិវឌ្ឍសង្គម ការផ្ដល់សេចក្ដីសុខក្សេមក្សាន្តនិងវិបុលភាពជូនប្រជាជនកម្ពុជានៅទូទាំងប្រទេសក្រោមការដឹកនាំប្រកបដោយគតិបណ្ឌិតរបស់ សម្ដេចតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា។ ជាក់ស្ដែងឆ្នាំ ២០១៨ កន្លងទៅនេះ ក៏ជាឆ្នាំដ៏វិសេសវិសាល ដែលរាជរដ្ឋាភិបាលបានសម្រេចធ្វើការកែទម្រង់កាន់តែស៉ីជម្រៅសំដៅការពារផលប្រយោជន៍ដ៏ពិសិដ្ឋរបស់ប្រជាជន។ ក្នុងនោះមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តកំពត ក្នុងនាមសេនាធិការអោយក្រសួងនិងខេត្ត បានដើរតួនាទីដ៏សំខាន់ក្នុងការបំពេញបេសកកម្មសម្រេចបាននូវសមិទ្ធផលធំៗជាចម្បងមានជាអាទិ៍៖ ការងារចុះបញ្ជីដីធ្លី និងចែកប័ណ្ណកម្មសិទ្ធិជូនប្រជាជន, ការងារចុះដោះស្រាយវិវាទដីធ្លី, ការងាររៀបចំដែនដីនគរូបនីយកម្មនិងការងារគ្រប់គ្រងការអភិវឌ្ឍតំបន់ឆ្នេរសមុទ្រ ,ការងារវិស័យសំណង់និងការងារលំនៅដ្ឋាន ដែលសមិទ្ធផលដ៏ប្រពៃខាងលើនេះគឺជាកត្តាស្លាប់រស់របស់ខេត្តដែលប្រជាជនគ្រប់ស្រទាប់វណ្ណៈទទូចចង់បាន។
លោកប៉ឹល កុសលអភិបាលរងខេត្តតំណាងលោក ជាវ តាយអភិបាលនៃគណៈអភិបាលខេត្ត បានមានប្រសាសន៍បើកអង្គសន្និបាតដោយបានចាត់ទុកអង្គសន្និបាតពេលនេះគឺមានសារៈសំខាន់និងបានកោតសរសើរវាយតម្លៃខ្ពស់ចំពោះស្នាដៃនិងលទ្ធផលការងារដែលមន្ទីររៀបចំដែនដី នគរូបនីយកម្មសំណង់និងសុរិយោដីខេត្តកំពតសម្រេចបានកន្លងមក។ លោកអភិបាលរងខេត្តក៏បានផ្ដាំផ្ញើដល់អង្គសន្និបាតទាំងមូលពិសេសមន្ត្រីរាជការនិងអាជ្ញាធរមូលដ្ឋានគ្រប់លំដាប់ថ្នាក់ដែលជាអ្នកផ្ដល់សេវាសាធារណៈត្រូវមានឆន្ទៈ ម្ចាស់ការ ភក្ដីភាព មនសិការ វិជ្ជាជីវៈនិងវប្បធម៌សេវាសាធារណៈឲ្យបានកាន់តែល្អមានប្រសិទ្ធភាពនិងគុណភាពថែមទៀតដើម្បីជាការចូលរួមក្នុងការលើកស្ទួយកម្រិតជីវភាពរបស់ប្រជាពលរដ្ឋបានល្អប្រសើរឡើងដែលជាគោលបំណងរបស់រាជរដ្ឋាភិបាលក្នុងការកាត់បន្ថយភាពក្រីក្រ។ ទន្ទឹមនោះមន្ត្រីរាជការ អាជ្ញាធរមូលដ្ឋានដាច់ខាតត្រូវប្រកាន់ភ្ជាប់នូវវិន័យ និងការអនុវត្តភារកិច្ចតាមការកំណត់នៃច្បាប់ និងលិខិតបទដ្ឋានគតិយុត្តជាធរមាន៕
សេង ណារិទ្ធ
