(ខេត្តកែប)៖ នៅរសៀលថ្ងៃអាទិត្យ ៨កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៣ ខែមករា ឆ្នាំ២០១៩ នេះ រដ្ឋបាលខេត្តកែប បានរៀបចំពិធីបញ្ចុះបឋមសិលាកសាងរោងបុណ្យអំពីបេតុងអាមេដំបូលបុស្បុកនៅមុខអាស្រមលោកយាយម៉ៅ ដោយពិធីនេះប្រារព្វធ្វើឡើងក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្ដមសេនីយ៍សន្តិបណ្ឌិត ម៉ៅ ច័ន្ទតារា រដ្ឋលេខាធិការក្រសួងមហាផ្ទៃ និងលោកជំទាវ លោក កែន សត្ថា អភិបាល នៃគណៈអភិបាលខេត្តកែប លោក សំ សារីន ប្រធានក្រុមប្រឹក្សាខេត្ត ព្រមទាំង លោក លោកស្រី ជាសមាជិកក្រុមប្រឹក្សាខេត្ត អភិបាលរងខេត្ត លោក លោកស្រី អភិបាល អភិបាលរងក្រុង ស្រុក ប្រធាន អនុប្រធានមន្ទីរអង្គភាពជំវិញខេត្ត កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ អាជីវករ និងបងប្អូនប្រជាពលរដ្ឋក្នុងខេត្តកែបជាច្រើននាក់។
ជាការកត់សម្គាល់ ជានិច្ចកាលរដ្ឋបាលខេត្តកែប តែងតែបានប្រារព្វ រៀបចំពិធីសែនព្រេន បន់ស្រន់នៅចំពោះមុខអាស្រមលោកយាយម៉ៅ ដើម្បីសុំសេចក្តីសុខ សេចក្តីចម្រើន ជូនដល់ប្រមុខដឹកនាំប្រទេស និងភ្ញៀវជាតិ-អន្តរជាតិ ក៏ដូចជាប្រជាពលរដ្ឋក្នុងភូមិសាស្ត្រខេត្តកែបទាំងមូល។ដូច្នេះដើម្បីជាភាពងាយស្រួលដល់ការរៀបចំពិធីសក្ការៈបូជាផ្សេងៗ រដ្ឋបាលខេត្តកែប ក៏បានផ្តួចផ្តើមកសាងនូវរោងបុណ្យដោយប្រើបេតុងអាមេ(បេតុងសរសៃដែក) ដំបូលក្បឿងស្រកាត្រីនិងមានបុស្បុកនៅពីលើ ដោយក្បាច់រចនាយ៉ាងល្អវិចិត្រ។
សូមបញ្ជាក់ថា៖ ការកសាងរោងបុណ្យអំពីបេតុងអាមេ(បេតុប្រើសរសៃដែក)ដំបូលមានបុស្បុកនៅពីលើ ស្ថិតមុខអាស្រមលោកយាយម៉ៅនេះ គឺជាការផ្តួចផ្តើមឡើងពីសំណាក់ ឯកឧត្តម នាយឧត្តមសេនីយ៍ សន្តិបណ្ឌិត ម៉ៅ ច័ន្ទតារា រដ្ឋលេខាធិការក្រសួងមហាផ្ទៃនិងលោកជំទាវ និងលោក កែន សត្ថា អភិបាល នៃគណៈអភិបាលខេត្តកែប៕
សេង ណារិទ្ធ
