ឯកឧត្តម ខូយ ឃុនហួរ អភិបាលខេត្តកំពត បានចុះបើកការដ្ឋានជាមួយលោក លឹម សំបូរ ដែលជាប្រធាន ក្រសួងសាធារណៈការ និងដឹកជញ្ជូនខេត្តកំពត ដើម្បីជួសជុលផ្លូវក្រាលគ្រួសក្រហមដែលមានប្រវែង ២ពាន់ម៉ែត្រ ស្ថិតនៅក្នុងភូមិកំពង់ត្រាចខាងកើត ឃុំកំពង់ត្រាច ស្រុកកំពង់ត្រាច ខេត្តកំពត ។
នៅក្នុងនោះ មានការចូលរួមពីលោកអភិបាលស្រុក លោក អ៊ុម ស៊ីណាត លោកអធិការ ប៊ុត សុខមន្នី និងលោកប្រធានកងរាជអាវុធហត្ថស្រុក និងមន្ត្រីជំនាញជាច្រើនរូបទៀត នៅពេលនោះឯកឧត្តម ខូយ ឃុនហួរ អភិបាលខេត្តកំពត ក៏បានមានប្រសាសន៍ថា ការជួសជុលផ្លូវក្រាលគ្រួសក្រហមនេះ គឺជាការអភិវឌ្ឍន៍មួយដ៏ល្អ ប្រសើរ សម្រាប់ប្រជាពលរដ្ឋទាំងអស់គ្នា និងក៏ជាកន្លែងតំបន់ទេសចរណ៍មួយសម្រាប់ភ្ញៀវក្នុងប្រទេស និងក្រៅប្រទេសទៀតផង ។
ទន្ទឹមជាមួយគ្នានោះដែរ លោកអភិបាលស្រុក អ៊ុម ស៊ីណាត ក៏បានមានប្រសាសន៍ថា ការជួសជុលផ្លូវលំ ក្រាលគ្រួសក្រហមនេះ គឺជាការអភិវឌ្ឍន៍មួយរបស់រាជរដ្ឋាភិបាល ដើម្បីធ្វើឱ្យប្រជាពលរដ្ឋមានភាពងាយស្រួល ធ្វើដំណើរទៅមក និងប្រកបមុខរបរអាជីវកម្មផ្សេងៗ ហើយមានភាពល្អប្រសើរទៀតផង ។
ទន្ទឹមនឹងគ្នា ពេលនោះប្រជាពលរដ្ឋដែលរស់នៅក្នុងភូមិកំពង់ត្រាច ឃុំកំពង់ត្រាច ស្រុកកំពង់ត្រាច ខេត្តកំពត មានការកក់ក្តៅយ៉ាងខ្លាំងចំពោះ ឯកឧត្តម ខូយ ឃុនហួរ អភិបាលខេត្តកំពត និងលោកអភិបាលស្រុក អ៊ុម ស៊ីណាត ដែលបានស្នើសុំថ្នាក់ខេត្តជាច្រើនលើកមកហើយ តែនៅពេលនេះ សំណើសុំរបស់លោកអភិបាលស្រុក ក៏បានល្អប្រសើរ ហើយប្រជាពលរដ្ឋដែលរស់នៅទីនោះមានការត្រេកអរយ៉ាងខ្លាំង ចំពោះឯកឧត្តម អភិបាលខេត្ត និងលោកអភិបាលស្រុក ហើយនឹងលោកប្រធាន លឹម សំបូរ ក្រសួងសាធារណៈការ និងដឹកជញ្ជូនខេត្ត ជាមួយនឹងភរិយារបស់គាត់ ។
នៅទីបញ្ចប់នេះ ប្រជាពលរដ្ឋដែលរស់នៅស្រុកកំពង់ត្រាចទាំងអស់ សូមប្រសិទ្ធពរជ័យដល់ឯកឧត្តម ខូយ ឃុនហួរ អភិបាលខេត្តកំពត និងលោកអភិបាលស្រុក អ៊ុម ស៊ីណាត និងមន្ត្រីជំនាញទាំងអស់ឱ្យជួបប្រទះតែសេចក្តី សុខទាំងឡាយបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។/
ហេង ដារ៉ា
