ប្រភពព័ត៌មានពីប្រជាពលរដ្ឋដែលរស់នៅក្បែរផ្សារឧដុង្គ និងឃុំត្បែង ស្រុកសាមគ្គីមានជ័យ បានឱ្យដឹងថា ជាយូរខែ ណាស់មកហើយ លោកថៅកែល្បែងជល់មាន់បង្កប់នូវបៀ អាប៉ោង យ៉ាងដុះស្លែមួយក្រុមបានមកបើកទីតាំងដ៏ធំៗចំនួនពីរ កន្លែងផ្សេងៗគ្នា ដែលទី ១ ស្ថិតនៅតាមបណ្តោយផ្លូវលេខ ៥១ ពីផ្សារឧដុង្គ មកផ្សារថ្នល់ទទឹង ស្រុកអង្គស្នួល ត្រង់ចំណុច ភូមិ-ឃុំត្បែងមានជ័យ ។ ទី២ស្ថិតនៅទួលខាងក្រោយបន្ទាយយោធាព្រំប្រទល់ស្រុកកំពង់ត្រឡាច ខេត្តកំពង់ឆ្នាំង និងស្រុក ពញាឮ ខេត្តកណ្តាល ។
ក្រុមអ្នកញៀនល្បែងបញ្ជល់មាន់បានឱ្យដឹងថា ទីតាំងទី១-ស្ថិតតាមបណ្តោយផ្លូវលេខ ៥១ ត្រង់ចំណុចភូមិ-ឃុំត្បែង ស្រុកសាមគ្គីមានជ័យ ខេត្តកំពង់ឆ្នាំង ជាប់ព្រំប្រទល់និងស្រុកឧដុង្គ ខេត្តកំពង់ស្ពឺ និងស្រុកពញាឮ ខេត្តកណ្តាល ។ ទីតាំងទី២នេះ ម្ចាស់វង់ល្បែងតែមួយក្រុមនោះទេ គឺឈ្មោះ តាឆង ជាមន្ត្រីយោធានិងស្តេចល្បែងដើរលេងឆ្លងខេត្ត ។ ទីតាំងចំនួនពីរនេះ តាឆង បើកលេងចល័តទៅមករៀងរាល់ថ្ងៃ ស៊ីសងចាញ់ឈ្នះរាប់លានរៀល និងពាន់ដុល្លារក្នុងមួយថ្ងៃ ។ ហើយមានមាន់ចាប់គូជល់ចាប់ពី ១០ ទៅ ២០គូឡើងទៅ ។
ប្រភពបានបន្តឱ្យដឹងទៀតថា អ្នកទៅលេងល្បែងជល់មាន់ បៀ អាប៉ោងនៅកន្លែង តាឆង នោះ សុទ្ធតែជាមន្ត្រីរាជ ការថ្នាក់ខ្ពស់ ខ្លះពាក់ផ្កាយ ជិះសុទ្ធតែរថយន្តស៊េរីទំនើបៗមកពីក្រុងភំពេញ និងខេត្តនានា មកលេងភ្លូកទឹកភ្លួកដី ខ្លះទៅវិញ ចាញ់អស់ខោខ្លី ។
អ្នកលេងល្បែងនៅទីនោះបានឱ្យដឹងថា ក្នុងមួយថ្ងៃៗតិចបំផុត ១០គូ ក្នុងមួយគូភ្នាល់ស៊ីសងចាប់ពី ១លាន ទៅ ១០លាន ទៅ ២០លានរៀល បើដុល្លារចាប់ពី ១០០០ដុល្លារ ទៅ ៥០០០ដុល្លារ ក៏មានដែរ ហើយក្នុងមួយលានរៀល ត្រូវបានម្ចាស់សង្វៀនឈ្មោះតាឆង នោះដកលុយទឹក (លុយតុង)១០ម៉ឺនរៀល ។
ក្រុមកូនចៅ តាឆង បានអួតអាងប្រាប់អ្នកញៀនល្បែងទាំងនោះថា មកលេងកន្លែងតាឆង មិនបាច់ភ័យព្រួយប៉ូលិស ប៉េអឹមខាងណាមកចាប់នោះទេ ព្រោះតាឆង ដែលជាមេពួកគេនោះបានរត់ការបង់លុយឱ្យសមត្ថកិច្ចទាំងបីខេត្ត និងទាំង៣ស្រុកខាងលើអស់ហើយ គឺទាំងនគរបាល និងទាំងប៉េអឹមទៀតផង ។
ទាក់ទិននឹងវង់ល្បែងស៊ីសងជល់មាន់របស់តាឆង មន្ត្រីយោធាបើកលេងយ៉ាងគគ្រឹកគគ្រេងនេះ ប្រជាពលរដ្ឋរស់នៅ តាមតំបន់នោះកំពុងសម្តែងក្តីព្រួយបារម្ភយ៉ាងខ្លាំងហើយបានបញ្ចោញប្រតិកម្មរិះគន់ទៅលើអាជ្ញាធរពាក់ព័ន្ធទាំង ៣ស្រុក-ខេត្តថា មិនគួរទៅត្រូវរ៉ូវគ្នាជាមួយពួកមេល្បែងទាំងនោះហើយបណ្តែយបណ្តោយឱ្យបើកលេងយ៉ាងអនាធិបតេយ្យបែបនេះ ឡើយ ។
ប្រជាពលរដ្ឋរស់នៅឃុំត្បែង ស្រុកសាមគ្គីមានជ័យ ពលរដ្ឋរស់នៅស្រុកឧដុង្គ ខេត្តកំពង់ស្ពឺ និងពលរដ្ឋនៅស្រុកពញាឮ បានលើកឡើងថា បន្ទាប់ពីមានវង់ល្បែងស៊ីសងជល់មាន់របស់តាឆង បើកលេងយ៉ាងអនាធិបតេយ្យបែបនេះ បានធ្វើឱ្យកើត នូវអសន្តិសុខសង្គម គឺភូមិ-ឃុំរបស់ពួកគាត់គ្មានសុវត្ថិភាព ពួកគាត់សម្តែងក្តីព្រួយបារម្ភយ៉ាងខ្លាំង ដោយសារតែកន្លងមកក៏ ដូចបច្ចុប្បន្ននេះ ភូមិ-ស្រុករបស់គាត់ត្រូវបានក្រុមចោរលួច និងប្លន់ទ្រព្យសម្បត្តិបាត់បង់ស្ទើររាល់ថ្ងៃ ពិសេសក្រុមចោរកាត់ សោផ្ទះលួចម៉ូតូទ្រព្យសម្បត្តិ និងការលួចគោក្របីបាត់បង់ជាញឹកញាប់ ។
ពួកគាត់ជាប្រជាពលរដ្ឋសំណូមពរយ៉ាងទទូចដល់ឯកឧត្តម អភិបាលខេត្ត និងស្រុកទាំង៣ មេត្តាជួយអន្តរាគមន៍ និងមានវិធានការចុះបង្ក្រាបនូវបទល្មើសនៃទីតាំងជល់មាន់របស់តាឆងនោះផង ។ ពួកគាត់សង្ឃឹមយ៉ាងមុតមាំថា សមត្ថកិច្ចពាក់ព័ន្ធទាំងអស់ ឯកភាពគ្នាបោសសម្អាតល្បែងជល់មាន់ខាងលើនេះជូនពួកគាត់ក្នុងពេលឆាប់ៗនេះ ៕
