ខេត្តប៉ៃលិន ៖ បុរសម្នាក់ជាភ្នាក់ងារសារព័ត៌មានឆន្ទៈខ្មែរប្រចាំខេត្តប៉ៃលិន ត្រូវលោក ជុំ សែនសទ្ធា ព្រះរាជអាជ្ញា អមសាលាដំបូងខេត្ត ចេញដីកាកោះហៅកាលពីថ្ងៃទី ២៨ ខែសីហា ឱ្យចូលខ្លួនទៅកាន់សាលាដំបូងខេត្តនៅវេលា ម៉ោង ៨ និង៣០នាទីព្រឹក ថ្ងៃទី ២១ ខែកញ្ញា ឆ្នាំ២០១៥ ដើម្បីបំភ្លឺពាក់ព័ន្ធនឹងបណ្តឹងរបស់លោកឧកញ៉ា សេង ឈុនឡេង ដែលប្តឹងពីបទ“បរិហាកេរ្តិ៍ជាសាធារណៈ”កាលពីឆ្នាំ២០១៣ ដល់ឆ្នាំ២០១៥ ។
បើតាមលោក សំ គូលីន អាយុ ៤២ឆ្នាំ ជាភ្នាក់ងារសារព័ត៌មានឆន្ទៈខ្មែរ ដែលមិនសូវល្បីឈ្មោះ រស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន រៀបរាប់ឱ្យដឹងកាលពីរសៀលថ្ងៃទី ៣១ ខែសីហា ថា លោកបានគ្រប់គ្រងដីមួយកន្លែង ដែលទិញដោយឧកញ៉ាម្នាក់រស់នៅភ្នំពេញ ។ លោកមានលិខិតបញ្ជាក់ត្រឹមត្រូវ មានការចុះហត្ថលេខាទទួលស្គាល់ពីលោក វ័រ រួម អតីតមេឃុំស្ទឹងត្រង់ និងលោក តាន់ តែម អតីតប្រធានមន្ទីររៀបចំដែនដីនគរូបនីយកម្ម និងសំណង់ខេត្តប៉ៃលិន តាំងពីឆ្នាំ២០០៨ មកម្ល៉េះ ។
ដីនោះស្ថិតនៅក្នុងភូមិអន្លង់រក្សា ឃុំស្ទឹងត្រង់ ស្រុកសាលាក្រៅ មានចំនួន ៩៥ហិកតា ដោយលោកបានដាំដំឡូងមី កាលពីឆ្នាំ២០១២-២០១៣ ចំនួន ៥០ហិកតា សល់ប៉ុន្មានទៀតទុកឱ្យទំនេរ គ្រាន់តែកាត់ស្មៅឱ្យស្រឡះប៉ុណ្ណោះ ។ ក្រោយ មកនៅចុងឆ្នាំ២០១៣ ជារដូវប្រមូលផល ខណៈលោកទៅដកដំឡូងមី ស្រាប់តែឃើញប្រជាពលរដ្ឋជាច្រើននាក់មានគោយន្ត កន្ត្រៃ និងត្រាក់ទ័រ ព្យួរដកដំឡូងមីរបស់លោកអស់រលីង ។ រឿងនេះលោកបានប្តឹងសមត្ថកិច្ចឱ្យទៅអន្តរាគមន៍ដោយឃាត់ បានគោយន្តកន្ត្រៃ ១គ្រឿង និងប្រជាពលរដ្ឋមួយចំនួន ។
ពេលសមត្ថកិច្ចសាកសួរ ប្រជាពលរដ្ឋទាំងនោះប្រាប់ថា ឈ្មោះ ពិន វណ្ណ ហៅប្រុស និងឈ្មោះ ម៉ៅ សាវី ជាមេការធ្វើ ការឱ្យលោកឧកញ៉ា សេង ឈុនឡេង ជាអ្នកបញ្ជាឱ្យពួកគាត់ទៅដកដំឡូងមីដោយសេរី ។ មិនតែប៉ុណ្ណោះ ពួកគេថែមទាំង យកត្រាក់ទ័រទៅភ្ជួររើសយកមើមដំឡូងមីអស់ពីចម្ការ ដោយសំអាងថា ជាបទបញ្ជារបស់លោក យឹម ឡាំង អតីតអភិបាល ស្រុកសាលាក្រៅ ។
ក្រោយពីលោក សំ គូលីន ចុះផ្សាយព័ត៌មាននេះ កាលពីឆ្នាំ២០១៤ ស្រាប់តែនៅព្រឹកថ្ងៃទី ២៨ ខែសីហា មានដីការចេញពីលោក ជុំ សែនសទ្ធា ព្រះរាជអាជ្ញាអមសាលាដំបូងខេត្តចេញថា លោកជាជនសង្ស័យ ឱ្យចូលបំភ្លឺពាក់ព័ន្ធ បណ្តឹងរបស់លោកឧកញ៉ា សេង ឈុនឡេង ដែលប្តឹងលោកពីបទបរិហាកេរ្តិ៍ជាសាធារណៈទៅវិញ ។
លោក សំ គូលីន កំពុងត្រៀមខ្លួនចូលបំភ្លឺតាមការកោះហៅរបស់តុលាការមិនឱ្យខកពេលឡើយ ។ លោកមានឯក សារភស្តុតាងគ្រប់គ្រាន់យកទៅបង្ហាញដូចជា ការឃាត់បានគោយន្តកំពុងដឹកដំឡូងមី និងរូបភាពត្រាក់ទ័រភ្ជួរនៅលើដីរបស់ លោក ។ លោករង់ចាំមើលថា តើតុលាការសម្រេចយ៉ាងណា ?
ដំណាំដំឡូងត្រូវបានបំផ្លាញ
