ឧត្តរមានជ័យ ៖ ការថ្លែងរបស់លោកនាយឧត្តមសេនីយ៍ គន់ គីម ប្រធានក្រុមការងារថ្នាក់ជាតិចុះជួយខេត្តឧត្តរមានជ័យ ក្នុងពិធីជួបសំណេះសំណាលជាមួយនិវត្តជនអតីតៈយុទ្ធជននៅស្រុកចុងកាល់ខេត្តឧត្តរមានជ័យ ៤៥០ នាក់ នាព្រឹកថ្ងៃទី២៧ សីហា ឆ្នាំ២០១៥ ដែលអមដំណើរដោយលោកនាយឧត្តមសេនីយ៍ ជា តារា ជាអនុប្រធានព្រមទាំងក្រុមការងារចុះជួយខេត្តជាច្រើនរូបទៀត។
នៅក្នុងមតិសំណេះសំណាលប្រកបដោយក្តីគោរពស្រឡាញ់ លោកនាយឧត្តមសេនីយ៍ គន់ គីម បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ជូនចំពោះអតីតៈយុទ្ធជន នូវគំរូវីរៈភាពដ៏អង់អាចក្លាហាន ហ៊ានលះបង់សាច់ស្រស់ឈាមស្រស់ ដើម្បីបុព្វហេតុការពារជាតិមាតុភូមិរបស់យើង ។ ដោយសារពលីកម្មនេះហើយ ដែលធ្វើឲ្យប្រទេសយើងរក្សាបាននូវឯករាជ្យជាតិ ការពារបាននូវបូរណភាពដែនដី រក្សាបាននូវសន្តិភាពស្ថេរភាព នាំមកនូវការអភិវឌ្ឍន៍រីកចំរើនដល់បច្ចុប្បន្ននេះ។
លោកនាយឧត្តមសេនីយ៍បានបញ្ជាក់ថា រាជរដ្ឋាភិបាលដឹកនាំដោយសម្តេចតេជោ ហ៊ុន សែន ជានាយករដ្ឋមន្ត្រីជានិច្ចកាលតែងតែរួមសុខទុក្ខយកចិត្តទុកដាក់គិតគូរ ដឹងគុណគោរពស្រឡាញ់ដល់និវត្តជនអតីតៈយុទ្ធជន ហើយខិតខំរិះរកគ្រប់មធ្យោបាយ ដើម្បីជួយបងប្អូនឲ្យមានជីវភាព សមរម្យ ដូចជាការបន្ថែមប្រាក់គោលរបបគោលនយោបាយជាបន្តបន្ទាប់ជូនបងប្អូនមួយជីវិត ។
លោកនាយឧត្តមសេនីយ៍ គន់ គីម បានឧបត្ថម្ភជូននិវត្តជនអតីតៈយុទ្ធជន ជាអង្ករ១០គ.ក្រ មីមួយកេស ថវិកាពីរម៉ឺនរៀលក្នុងម្នាក់ៗ ។
តាមរបាយការណ៍ឲ្យដឹងពីលោក សុខ គឹមសាន ប្រធានមន្ទីរសង្គមកិច្ចអតីតៈយុទ្ធជន និងយុវនីតិសម្បទាខេត្ត បានឲ្យដឹងថា ស្រុកចុងកាល់មានអតីតៈយុទ្ធជនកំពុងទទួលរបប១១០លានរៀល ក្នុងមួយខែដោយបងប្អូនបើកផ្ទាល់តាមរយៈធនាគារអេស៊ីលីដា ជារៀងរាល់ខែ ប្រកបដោយតម្លាភាព និងទាន់ពេលវេលា ក្នុងនោះ មានគ្រួសារយុទ្ធជនពលីមរណៈ៧៣ គ្រួសារ ជនពិការ ៩៥ នាក់ និវត្តជន ២៣៤ នាក់ បាត់បង់សមត្ថភាពការងារ ១១ នាក់ ៕
