ខេត្តប៉ៃលិន ៖ បន្ទាប់ពីលេចចេញព័ត៌មានសេចក្តីប្រកាសមួយនាពីពេលថ្មីៗកន្លងទៅនេះ ដោយអាជ្ញាធរខេត្ត បានចាត់តាំងសមាសភាពគណៈកម្មការចុះស្រង់ទិន្នន័យចំនួនខ្នងផ្ទះប្រជាពលរដ្ឋដែលរស់នៅជាក់ស្តែង(ក្នុងចំណុចសំបុកចាប) ភូមិផ្សារព្រំ ឃុំស្ទឹងកាច់ ស្រុកសាលាក្រៅ ដើម្បីបែងចែកដីឡូត៍ជូនប្រជាពលរដ្ឋ ប្រហែល២០០-៣០០គ្រួសារឱ្យ ទៅរស់នៅចំណុចលូដាច់ ជាប់បណ្តោយផ្លូវជាតិលេខ១០ចាស់ចំងាយពីផ្លូវជាតិលេខ៥៧ ជាង១គីឡូម៉ែត្រ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ រហូតមកដល់ព្រឹកថ្ងៃទី២៤ ខែសីហា កន្លងទៅនេះ ប្រជាពលរដ្ឋជាច្រើននាក់បានប្រតិកម្មចំពោះគម្រោងមួយនេះ ។
បើតាមសម្តីប្រជាពលរដ្ឋជាង៥០នាក់ ដែលផ្ទុះប្រតិកម្មកាលពីព្រឹកថ្ងៃទី២៤ ខែសី ហា កន្លងទៅនេះ បានឱ្យដឹងថា ពួកគាត់បានចាកចេញពីស្រុកកំណើតមកពីខេត្តផ្សេងៗនៃប្រទេសកម្ពុជា ចូលមករស់នៅក្នុងខេត្តប៉ៃលិន ត្រង់ចំណុចកាស៊ីណូហ្ស៊ីហ្សា ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ តាំងពីឆ្នាំ១៩៩៦-១៩៩៧មកម្លេះ លុះក្រោយមក នៅឆ្នាំ១៩៩៨អាជ្ញាធរខេត្តបានឱ្យពួកគាត់ចេញទៅរស់នៅត្រង់ចំណុចសំបុកចាបសព្វថ្ងៃនេះពោលគឺរហូតមកដល់ពេលនេះអស់រយៈពេលជិត២០ឆ្នាំមកហើយ ។ ពួកគាត់បន្តទៀតថា ក្នុងការរស់នៅរាល់ថ្ងៃ ពួកគាត់អត់មានប័ណ្ណកម្មសិទ្ធដីធ្លីត្រឹមត្រូវនោះទេ គ្មានសិទ្ធតភ្ជាប់បណ្តាញទឹកស្អាតប្រើប្រាស់ប្រចាំថ្ងៃហើយក៏អត់មានក្រុមហ៊ុនណាចូលទៅដឹកសម្រាមនៅកន្លែងពួកគាត់ដែរ ។
ពួកគាត់មួយចំនួនបានលើកឡើងថា ក្នុងការផ្លាស់ប្តូរទីលំនៅចាស់ទៅទទួលយកទីលំនៅថ្មី ដែលអាជ្ញាធររៀបចំឱ្យពួកគាត់មានប្លង់កម្មសិទ្ធិផ្ទាល់ខ្លួន ពួកគាត់ពិតជាមានការពេញចិត្ត ប៉ុន្តែត្រូវសំណងសមរម្យ ក្នុងការឱ្យពួកគាត់រុះរើពីកន្លែងចាស់ទៅរស់នៅកន្លែងថ្មីបើសិនជាគ្រាន់តែឱ្យតិចតួចក្នុង១គ្រួសារចំនួន២០០ដុល្លារ ឬរហូតដ ល់២ពាន់ដុល្លារ ក៏ពួកគាត់ទទួលយកមិនបានដែរ ។ ម្យ៉ាងវិញទៀតអ្វីដែលគេថា ប្រជាពលរដ្ឋរស់នៅក្នុងចំណុចសំបុកចាបខាងលើរហូតដល់៧០%យល់ព្រមចាកចេញពីដីចាស់ ទៅរស់នៅលើដីថ្មី មិនពិតប្រាកដនោះទេ គឺខាងអាជ្ញាធរគ្រាន់តែដើរជំរឿនប្រជាពលរដ្ឋនីមួយៗប៉ុណ្ណោះ មិនបានប្រាប់អំពីបញ្ហាផ្លាស់ប្តូរទីលំឱ្យបានដឹងជាមុននោះឡើយ ។
ពួកគាត់ជាច្រើននាក់មិនចង់ចាកចេញពីកន្លែងចាស់ទៅរស់នៅកន្លែងថ្មីឡើយ ហើ យក៏មានសំណូមពរឱ្យអាជ្ញាធរធ្វើប្លង់ជាកម្មសិទ្ធិផ្ទាល់ខ្លួនដល់ពួកគាត់ម្នាក់ៗផងដែរ ។
ពាក់ព័ន្ធទៅនឹងបញ្ហានេះ លោក ចាវ ខាន់ នាយករងរដ្ឋបាលសាលាខេត្ត និងជា ប្រធានក្រុមការងារដោះស្រាយទំនាស់ដីធ្លី បានឱ្យដឹងតាមទូរស័ព្ទថា អាជ្ញាធរកំពុងតែរៀបចំដីថ្មី ឱ្យពួកគាត់មានលក្ខណៈងាយស្រួលក្នុងការរស់នៅ ដោយមានប្លង់ជាកម្មសិទ្ធិផ្ទាល់ខ្លួន រស់នៅស្របច្បាប់ មិនស្ថិតក្នុងភាពអនាធិបតេយ្យដូចរាល់ថ្ងៃនេះទេ ហើយបើប្រជា ពលរដ្ឋណាម្នាក់មិនទាន់យល់អំពីបញ្ហានេះ សូមឱ្យទាក់ទងទៅសួរលោកតាមទូរស័ព្ទផង ដែរ ។ លោកបញ្ជាក់ថា មុនដំបូងប្រជាពលរដ្ឋ តែងតែប្រកែកដូច្នេះហើយ តែនៅយូរបន្តិចទៀតពួកគេនឹងទទួលយកអ្វីដែលអាជ្ញាធររៀបចំ សម្រាប់ពួកគេជាក់ជាមិនខាននោះឡើយ ៕
អត្ថបទ នីយ៉ា
