ខេត្តកំពត ៖ លោក ជាវ តាយ អភិបាលនៃគណៈអភិបាលខេត្តកំពត បានមានប្រសាសន៍ដោយចាត់ទុកវិស័យពុទ្ធចក្រក៏មានតួនាទីយ៉ាងសំខាន់ក្នុងសង្គមជាតិផងដែរព្រោះថាព្រះពុទ្ធសាសនាក្រៅពីការអប់រំប្រៀនប្រដៅឱ្យមនុស្សស្គាល់បុណ្យនិងបាបក៏បានរួមចំណែកលើការបណ្ដុះបណ្ដាលធនធានមនុស្សនិងកិច្ចការសង្គមទៀតផង។ លោក ជាវ តាយបានមានប្រសាសន៍លើកឡើងដូចនេះ នៅក្នុងកិច្ចជួបសំណេះសំណាលជាមួយព្រះសង្ឃ និងថ្នាក់ដឹកនាំមន្ត្រីរាជការ ពុទ្ធបរិស័ទនាឱកាសនៃពិធីវេនកាន់បិណ្ឌទី១កាលពីវេលាល្ងាចថ្ងៃច័ន្ទ១៥កើត ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៤ខែកញ្ញាឆ្នាំ២០១៨ នៅវត្តពិជ័យឧត្តុង្គហៅវត្តកំពង់បាយសង្កាត់ក្រាំងអំពិល ក្រុងកំពតខេត្តកំពត។
លោក ជាវ តាយ អភិបាលខេត្ត បានបញ្ជាក់ថា ដោយមើលឃើញពីសារៈសំខាន់នៃវិស័យពុទ្ធចក្រនេះហើយទើបត្រូវបានព្រះរាជាណាចក្រកម្ពុជាយើងបានជ្រោងលើកកម្ពស់ចាត់ចូលក្នុងរដ្ឋធម្មនុញ្ញជាតិសាសនាព្រះពុទ្ធជាសាសនារបស់រដ្ឋ។
លោកអភិបាលខេត្តក៏បានចាត់ទុកពិធីកាន់បិណ្ឌនាពេលនេះពិតជាបាននាំមកនូវយ៉ាងសំខាន់ក្រៅពីការនាំមកនូវគ្រឿងឧបភោគបរិភោគទេយ្យវត្ថុរួមនឹងបច្ច័យដើម្បីផ្គត់ផ្គងជីវភាពព្រះសង្ឃគង់ចាំព្រះវស្សានិងការបំពេញកុសលផលបុណ្យឧទ្ទិសជូនដល់បុព្វការីជនដែលបានចែកឋានទៅកាន់បរលោកដែលពិធីនេះធ្វើឡើងទៅតាមប្រពៃណីកាន់បិណ្ឌនៃព្រះពុទ្ធសាសនាយើងក្ដី ពិធីនេះក៏ជាចំណែកមួយនាំមកនូវបច្ច័យមួយចំណែកដើម្បីកសាងនូវហេដ្ឋារចនាសម្ព័ន្ធក្នុងទីអារាមវត្តឱ្យបានស័ក្តសមជាទីសក្ការៈបូជារបស់ពុទ្ធបរិស័ទផងដែរ។
ក្នុងឱកាសនោះ លោក ជាវ តាយ និងលោកស្រី ដោយមើលឃើញពីតម្រូវការនូវហេដ្ឋារចនាសម្ព័ន្ធក្នុងទីអារាមវត្តនេះឱ្យស័ក្តសមជាវត្តមួយមានវ័យចំណាស់នៅកណ្ដាលក្រុងកំពតផងនោះ លោកអភិបាលខេត្តក៏បានប្រកាសជួយកសាងផ្លូវបេតុងចូលទីធ្លាវត្តពិជ័យឧត្តុង្គនេះមានចំងាយប្រមាណជិត២០០ម៉ែត្រផងដែរ។ ក្នុងឱកាសនោះដែរ លោក ជាវ តាយនិងលោកស្រី ព្រមទាំងសហការី ក៏បាននាំមកនូវបច្ច័យគ្រឿងឧបភោគបរិភោគភេសជ្ជៈដើម្បីប្រគេនព្រះសង្ឃចំនួន៤០អង្គក្នុង០១អង្គបច្ច័យ៥ម៉ឺនរៀលនិងគ្រឿងឧបភោគបរិភោគភេសជ្ជៈមួយចំនួន និងប្រគេនបច្ច័យព្រះសង្ឃសម្រាប់ក្នុងវេនកាន់បិណ្ឌទី១នេះចំនួន៦លានរៀល និងក៏បានជូននូវថវិកាមួយចំនួនសម្រាប់ដល់លោកយាយលោកតានិងប្រជាពុទ្ធបរិស័ទចូលរួមនាពេលនេះផងដែរ។
សូមបញ្ជាក់ថា ពិធីកាន់បិណ្ឌវេនទី១នេះក៏មានការចូលរួមពីសំណាក់ លោក អ៉ឹង ម៉េងហួរ ប្រធានក្រុមប្រឹក្សាខេត្ត និង លោក លោកស្រី សមាជិកក្រុមប្រឹក្សាខេត្តអភិបាលរងខេត្តព្រមទាំងថ្នាក់ដឹកនាំមន្ត្រីរាជការមន្ទីរ អង្គភាពជុំវិញខេត្តនិងប្រជាពលរដ្ឋ ពុទ្ធបរិស័ទចំណុះយ៉ាងជើងផងដែរ៕
សេង ណារិទ្ធ
