ខេត្តកែប ៖ បុរសពីរនាក់ដែលគេស្គាល់ថាជាឪពុកធម៌ និងកូនធម៌នឹងគ្នា គ្រាន់តែមានទំនាស់តូចតាច ក៏បានបង្កហិង្សាដាក់គ្នាបណ្តាលឱ្យឪពុកធម៌រងរបួសធ្ងន់ត្រូវបានសាច់ញាតិដឹកបញ្ជូនទៅសង្គ្រោះនៅឯមន្ទីរពេទ្យ ចំណែកកូនធម៌ត្រូវបានសមត្ថកិច្ចឃាត់ខ្លួនមកសាកសួរភ្លាមៗ។
ករណីបង្កហិង្សាបណ្តាលឱ្យបុរសចំណាស់ម្នាក់រងរបួសធ្ងន់ខាងលើបានកើតឡើងកាលពីវេលាម៉ោង២និង៣០នាទីរសៀល ថ្ងៃទី២៣ខែកញ្ញា ឆ្នាំ២០១៨ ស្ថិតនៅភូមិដំណាក់ចង្អើរ សង្កាត់ព្រៃធំ ក្រុង-ខេត្តកែប។
តាមប្រភពព័ត៌មានពីសមត្ថកិច្ចមូលដ្ឋានបានឱ្យដឹងថា ករណីឈានដល់ការកាប់ប្រហារគ្នាបណ្តាលឱ្យបុរសចំណាស់ម្នាក់រងរបួសធ្ងន់នេះ គឺជាករណីបង្កហិង្សា ផ្តើមមុនដំបូងគឺបុរសជាឪពុកធម៌ទៅរករឿងបុរសជាកូនធម៌មុន ទើបខណៈនោះបុរសជាកូនធម៌ទ្រាំមិនបាន ក៏យកកាំបិតទៅកាប់ឪពុកធម៌ឱ្យរងរបួសធ្ងន់តែម្តង។សមត្ថកិច្ចបានបញ្ជាក់ទៀតថា បុរសដែលជាជនដៃស់ដល់ ឈ្មោះ សំ សុង ភេទប្រុស អាយុ៣៩ឆ្នាំ មុខរបរកសិករ រស់នៅភូមិដំណាក់ចង្អើរ សង្កាត់ព្រៃធំ ក្រុងកែប។ចំណែកបុរសរងគ្រោះ ឈ្មោះ សូង ឡាង ភេទប្រុស អាយុ៥៨ឆ្នាំ មុខរបរកសិករ មានទីលំនៅភូមិ ឃុំ កើតហេតុខាងលើជាមួយគ្នា។
បច្ចប្បន្ន ជនដៃដល់ជាកូនធម៌ត្រូវបានសមត្ថកិច្ចនាំទៅសាកសួរនៅក្នុងអធិការដ្ឋាននគរបាលក្រុងកែប។ដោយឡែក បុរសចំណាស់រងគ្រោះត្រូវបានបងប្អូន សាច់ញាតិដឹកទៅសង្គ្រោះនៅឯមន្ទីរពេទ្យខេត្តកំពត៕
សេង ណារិទ្ធ
