ខេត្តប៉ៃលិន៖ កាលពីរសៀលថ្ងៃទី២០ ខែសីហា ឆ្នាំ២០១៥ ត្រូវបានគណៈកម្មាធិការខេត្តប៉ៃលិន ដោះស្រាយ ប្តូរទៅទីតាំងថ្មី ចំងាយពីគ្នាប្រហែល៥០០ម៉ែត្រ ទៅចំណុចតំបន់អភិវឌ្ឍន៍ឃ្លាំងចាស់ ភូមិផ្សារព្រំ ឃុំស្ទឹងកាច់ ស្រុកសាលាក្រៅ អោយលំនៅដ្ឋានប្រជាពលរដ្ឋ២១៤គ្រួសារ រស់អណាធិបតេយ្យ លើដីចំណុចសំបុកចាប ភូមិផ្សារព្រំ ពោរពេញដោយសំរាម ខ្វះអនាម័យ និងមាន ទំនាស់ជាមួយម្ចាស់ដី ។
លោក ស៊ួ ឌីណា អនុប្រធានគណៈកម្មាធិការខេត្ត និងជាសមាជិកក្រុមប្រឹក្សាខេត្តប៉ៃលិន បានអោយដឹងថា ដោយការយកចិត្តទុកដាក់ពី ឯកឧត្តម កើត សុធា អភិបាលខេត្តប៉ៃលិន អាណិតអាសូរ ដល់ប្រជាពលរដ្ឋក្រីក្រ អត់ដី និងរស់នៅយ៉ាងអាណាធិបតេយ្យលើដីឯកជន ព្រមទាំងម្ចាស់ដីគេដេញច្រើនដង និងមានទំនាស់មិនព្រមចេញ នៅចំណុចសំបុកចាប ភូមិផ្សារព្រំ ឃុំស្ទឹងកាច់ ស្រុកសាលាក្រៅ ឯកឧត្តមអភិបាលខេត្តបាន សម្រេចចិត្តចំណាយប្រាក់ទិញដីមួយកន្លែង រៀបចំប្រព័ន្ធលូទឹកដាក់ភ្លើងអគ្គិសនី អោយប្រជាពលរដ្ឋចំនួន២១៤គ្រួសារ ។
ឯកឧត្តម កើត សុធា អភិបាលខេត្តប៉ៃលិនបានអោយដឹងថា ការប្តូរទីតាំងថ្មីរបស់ប្រជាពលរដ្ឋ ចំណុចសំបុកចាប ភូមិផ្សារព្រំទៅចំណុចតំបន់អភិវឌ្ឍន៍ឃ្លាំងចាស់ ភូមិផ្សារព្រំ ឃុំស្ទឹងកាច់ ស្រុកសាលាក្រៅវិញ ទី១ ជួយអោយពួកគាត់រស់នៅមាន ផាសុខភាពល្អ ដោយគ្មានសំរាមភក់ជ្រាំ ទី២អោយពួកគាត់មានដីផ្ទាល់ខ្លួន និងមានប័ណ្ណកម្មសិទ្ធ ទី៣ ពួកគាត់រស់នៅមានសេរីភាព មិនមានការដេញ ឬការគាបសង្កត់ពីម្ចាស់ដីដូចមុនអាច ប្រកបរបចិញ្ចឹមក្រុមគ្រួសារដោយសុខស្រួល ។
ប្រជាពលរដ្ឋនៅចំណុចសំបុកចាប ជាដំបូងមានចំនួនប្រហែល១០០គ្រួសារ ក្រោយពីដឹងថា មានការអភិវឌ្ឍ និងថ្នាក់ខេត្តជួយផងនោះ បាននាំគ្នាចូលមករស់នៅជាង៣០០គ្រួសារ បច្ចុប្បន្ន គណៈកម្មាធិការ ខេត្តបានដោះដូរបាន៨០ភាគរយ ចំពោះ២០ភាគរយ សេសសល់ត្រូវបានដោះស្រាយ៣ដំណាក់កាលទៀត ។ ប្រជាពលរដ្ឋមួយ គ្រួសារទទួលបានដីទំហំ១៦ម៉ែត្រ គុណ៥ម៉ែត្រ ថ្លៃរុះរើ២០០ដុល្លារ ។
ជាចុងក្រោយសូមបងប្អូនដែលមិនទាន់សម្រេចចិត្ត ទៅនៅកន្លែងដីថ្មីដែលគណៈកម្មាធិការខេត្ត ក៏ដូចជារាជរដ្ឋាភិបាលរៀបចំដោះស្រាយជូន គួរតែជ្រើសរើស ដូចប្រជាពលរដ្ឋ២១៤គ្រួសារ ដើម្បីអោយការអភិវឌ្ឍមានដំណើរការលូន ៕
