ខេត្តប៉ៃលិន ៖ ប្រជាពលរដ្ឋ២១៤គ្រួសារ រស់អនាធិបតេយ្យលើដីឯកជន ចំណុចសំបុកចាប ភូមិផ្សារព្រំ ត្រូវបានគណៈកម្មការខេត្តប៉ៃលិន ដោះស្រាយ និងបង្ហាញទីតាំងលំនៅដ្ឋានថ្មី កាលពីរសៀលថ្ងៃទី២០ ខែសីហា ឆ្នាំ២០១៥ ទៅចំណុចតំបន់អភិវឌ្ឍន៍ឃ្លាំងចាស់ ភូមិផ្សារព្រំ ឃុំស្ទឹងកាច់ ស្រុកសាលាក្រៅវិញ ។
លោក ស៊ួ ឌីណា អនុប្រធានគណៈកម្មាការខេត្ត និងជាសមាជិកក្រុមប្រឹក្សាខេត្តប៉ៃលិនបានអោយដឹងថា ដោយការយកចិត្តទុកដាក់ពីលោកកើត សុធា អភិបាលខេត្ត អាណិតដល់ប្រជាពលរដ្ឋក្រីក្រ អត់ដីនិងរស់នៅលើដីឯកជនយ៉ាងអនាធិបតេយ្យ ចំណុចសំបុកចាបភូមិផ្សារព្រំ ឃុំស្ទឹងកាច់ ស្រុកសាលាក្រៅ បានសម្រេចចិត្តចំណាយប្រាក់ទិញដីមួយកន្លែងរៀបចំ ប្រពន្ធលូទឹកដាក់ភ្លើងអគ្គីសនីអោយប្រជាពលរដ្ឋចំនួន២១៤គ្រួសារ ។ ប្រជាពលរដ្ឋនៅចំណុចសំបុកចាបជាដំបូងមានចំនួនប្រហែល ១០០ គ្រួសារ ក្រោយពីដឹងថា មានការអភិវឌ្ឍន៍និងថ្នាក់ខេត្តជួយផងនោះ បាននាំគ្នាចូលមករស់នៅជាង៣០០គ្រួសារ បច្ចុប្បន្ន គណៈកម្មការខេត្តបានធ្វើការដោះដូរបាន ៨០ ភាគរយ ចំពោះ២០ភាគរយ សេសសល់ត្រូវបានដោះស្រាយ ៣ ដំណាក់កាលទៀត ។ ប្រជាពលរដ្ឋមួយគ្រួសារ ទទួលបានដីទំហំ ១៦ ម៉ែត្រគុណ ៥ ម៉ែត្រ ថ្លៃរុះរើ ២០០ ដុល្លា ចំពោះការដឹកជញ្ជូនអីវ៉ាន់រថយន្ត របស់គណៈកម្មាការខេត្តជាដឹកអោយឥតគិតថ្លៃ ។
លោក កើត សុធា អភិបាលខេត្តប៉ៃលិនបានអោយដឹងថា ការប្តូរទីតាំងថ្មីរបស់ប្រជាពលរដ្ឋចំណុចសំបុកចាប ភូមិផ្សារព្រំ ទៅចំណុចតំបន់អភិវឌ្ឍន៍ឃ្លាំងចាស់ ភូមិផ្សារព្រំ ឃុំស្ទឹងកាច់ ស្រុកសាលាក្រៅវិញ ទី១ជួយអោយពួកគាត់រស់នៅមានផាសុខភាពល្អ ដោយគ្មានសំរាមភក់ជ្រាំ ទី២ អោយពួកគាត់មានដីផ្ទាល់ខ្លួន និងមានប័ណ្ណកម្មសិទ្ធិ ទី៣ ពួកគាត់រស់នៅមានសេរីភាព មិនមានការដេញ ឬការគាបសង្កត់ពីម្ចាស់ដីដូចមុន អាចប្រកបរបចិញ្ចឹមក្រុមគ្រួសារដោយសុខស្រួល ។ ជាចុងក្រោយ សូមបងប្អូនដែលមិនទាន់សម្រេចចិត្តទៅនៅកន្លែងដីថ្មី ដែលគណកម្មាការខេត្ត ក៏ដូចជារាជរដ្ឋាភិបាលរៀបចំដោះស្រាយជូន កុំប្រឆាំង ឬកុំទារសំណងខ្ពស់ពេក គួរតែជ្រើសរើសដូចប្រជាពលរដ្ឋ២១៤គ្រួសារ ដើម្បីអោយការអភិវឌ្ឍន៍មានដំណើរការលូនសំរាប់ខេត្តយើង ៕
