រដ្ឋលេខាធិការ សេង ឈួន ដឹកនាំមន្ត្រីជំនាញ ចុះពិនិត្យ និងស្រាវជ្រាវករណីមានក្រុមជញ្ជីងចល័តក្លែងបន្លំ នៅស្រុកវាលវែង ខេត្តពោធិ៍សាត់

(ពោធិ៍សាត់)៖ ដោយមានការចង្អុលបង្ហាញពីលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បន្ទាប់ពីទទួលព័ត៌មានថាមានក្រុមជញ្ជីងចល័តមួយក្រុមចុះធ្វើសកម្មភាពឃាត់រថយន្តត្រួតពិនិត្យទម្ងន់ និងគំរាមយកប្រាក់នៅផ្លូវជាតិលេខ៥៥ ស្រុកវាលវែង ខេត្តពោធិ៍សាត់, លោក សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ និងជាប្រធានក្រុមការងារត្រួតពិនិត្យចល័តចម្រុះ នាថ្ងៃទី១៥ ខែតុលា ឆ្នាំ២០២៤បានដឹកនាំក្រុមការងារចល័តចម្រុះ និងមន្រ្តីស្ថានីយជញ្ជីងអចល័តឃ្លាំងមឿង ខេត្តពោធិ៍សាត់ ចុះមកពិនិត្យ ស្រាវជ្រាវដល់ចំណុចទីតាំងនេះតែម្តង

នាឱកាសនោះ លោក សេង ឈួន បានណែនាំដល់អាជ្ញាធរពាក់ព័ន្ធទាំងអស់ ចូលរួមទប់ស្កាត់នូវរាល់សកម្មភាពត្រួតពិនិត្យទម្ងន់យានយន្តពីក្រុមជញ្ជីងចល័តក្លែងបន្លំខុសច្បាប់ទាំងអស់នេះ ដែលបានធ្វើ​ឱ្យប៉ះពាល់​ដល់កិត្តិយស និងភាពស្អាតស្អំរបស់ក្រុមការងារត្រួតពិនិត្យចល័តចម្រុះពិតប្រាកដ ក៏ដូចជាក្រសួងសាធារណការ និងដឹកជញ្ជូន ទាំងមូលផងដែរ។

គូរបញ្ជាក់ដែរថា សព្វថ្ងៃក្រុមត្រួតពិនិត្យយានយន្តចល័តចម្រុះ គឺមានតែមួយក្រុមប៉ុណ្ណោះ ដែលបង្កើតឡើងដោយសេចក្តីសម្រេចរបស់ក្រសួងសាធារណការ និងដឹកជញ្ជូន ព្រមទាំងមានលិខិតបញ្ជាបេសកកម្មពី លោករដ្ឋមន្រ្តីផ្ទាល់ និងរាល់ពេលចុះប្រតិបត្តិការត្រួតពិនិត្យយានយន្ត មន្រ្តីអនុវត្តន៍ត្រូវតែមានឯកសណ្ឋាន និងបណ្ណសម្គាល់ខ្លួនត្រឹមត្រូវ និងច្បាស់លាស់ ដោយអនុលោមតាមអនុក្រឹត្យលេខ ២៤ អនក្រ.បក ចុះថ្ងៃទី១០ ខែមីនា ឆ្នាំ២០១៥ ស្តីពីឯកសណ្ឋាន និងបណ្ណសម្គាល់ខ្លួនរបស់មន្រ្តីអធិការកិច្ចផ្លូវថ្នល់។ ដូចនេះបើសិនមានក្រុមជញ្ជីងចល័តផ្សេងចុះឃាត់ត្រួតពិនិត្យយានយន្ត ដោយពុំមានឯកសណ្ឋាន និងលិខិតបញ្ជាបេសកកម្មត្រឹមត្រូវនោះទេ គឺជាក្រុមជញ្ជីងចល័តក្លែងបន្លំ ដែលជាអំពើខុសច្បាប់ទាំងស្រុង។

ឆ្លៀតក្នុងឱកាសនេះ ក្រសួងសាធារណការ និងដឹកជញ្ជូន សូមអំពាវនាវ និងផ្សព្វផ្សាយដល់ប្រជាពលរដ្ឋ ពិសេសអាជ្ញាធរដែនដីគ្រប់បណ្តារាជធានី ខេត្តផ្សេងៗទៀត ប្រសិនបានឃើញសកម្មភាព​ឃាត់ត្រួតពិនិត្យទម្ងន់យានយន្ត​ខុសច្បាប់ពីក្រុមជញ្ជីងក្លែងបន្លំ សូមរាយការណ៍មកលេខាធិការដ្ឋាននៃគណៈកម្មាធិការសម្របសម្រួលអចិន្ត្រៃយ៍ ឬតាមរយៈហ្វេសប៊ុកផេកផ្លូវការ​របស់ក្រសួងសាធារណការនិងដឹកជញ្ជូន៖(https://www.facebook.com/ mpwt.gov.kh) ឬទូរស័ព្ទលេខៈ១២៧៥ ដើម្បីចាត់វិធានការតាមផ្លូវច្បាប់ជាធរមាន៕