កំពង់ឆ្នាំង ៖ កម្លាំងចម្រុះបានចុះប្រតិបត្តិការបង្ក្រាបបទល្មើសជលផលដែលបានកើតឡើងនៅរដូវបិទការនេសាទ ដែលជារដូវត្រីពងកូន ។ ការបង្ក្រាបនេះបានធ្វើឡើងនៅចំណុចបីកន្លែង ដែលអ្នកនេសាទពុំបានគោរពទៅតាមច្បាប់ ស្តីពីជលផល ។
សេចក្តីរាយការណ៍ពីខេត្តកំពង់ឆ្នាំងបានឱ្យដឹងថា កម្លាំងចម្រុះដែលសហការគ្នាមានមន្ត្រីអភិរក្សជលផលចំនួន ៥នាក់ មន្ត្រីសហគមន៍នេសាទចំនួន ០២រូប, ទាហាន ១រូប, លោក ប៉ាង សុខុន ជា មន្ត្រីជលផលមួយរូប និងលោក ចេវ ចាន់ថុន ជាមន្ត្រីកងរាជអាវុធហត្ថ ព្រមទាំងលោក អូ សោភ័ណ្ឌ នាយផ្នែករដ្ឋបាលជលផលកំពង់ឆ្នាំង បានរួមគ្នាបង្ក្រាបបទល្មើសជលផលនៅឃុំពីរក្នុងស្រុកជលគីរី ខេត្តកំពង់ឆ្នាំង កាលពីថ្ងៃទី ២០ ខែសីហា ឆ្នាំ២០១៥ កន្លងមកនេះ ។
សេចក្តីរាយការណ៍ដដែលបានឱ្យដឹងទៀតថា ដោយមានការចង្អុលបង្ហាញពី ឯកឧត្តម ឈួរ ច័ន្ទឌឿន គណៈបញ្ជាការ ឯកភាពខេត្ត និងជាអភិបាលនៃគណៈអភិបាលខេត្តកំពង់ឆ្នាំង លោក សោម រុន នាយខណ្ឌរដ្ឋបាលជលផលខេត្ត, លោក យឹម សាវ៉េន អភិបាលស្រុកជលគីរី ឱ្យធ្វើការបង្ក្រាបសកម្មភាពល្មើសច្បាប់ជលផលដែលបានកើតឡើងនៅ ក្នុងស្រុកជលគីរី ខេត្តកំពង់ឆ្នាំង ដែលបានកើតឡើងដោយក្រុមអ្នកនេសាទពុំគោរពច្បាប់ស្តីពីជលផលធ្វើឱ្យធនធាន ធម្មជាតិបានចុះថយដោយសារតែទង្វើល្មើសច្បាប់ទាំងអស់នោះ ។
សេចក្តីរាយការណ៍បានឱ្យដឹងទៀតថា កម្លាំងចម្រុះដែលដឹកនាំដោយលោក ប៉ាង សុខុន មន្ត្រីរដ្ឋបាលជលផលប្រចាំ ស្រុកជលគីរី និងលោក អូ សោភ័ណ្ឌ នាយផ្នែករដ្ឋបាលជលផលកំពង់ឆ្នាំង បានធ្វើសកម្មភាពចាប់ឧបករណ៍នេសាទនៅចំណុចមេទឹក ភូមិកោះធំ ឃុំព្រៃគី និងនៅចំណុចព្រែកសេះ ភូមិពាមឆ្កោក ឃុំពាមឆ្កោក ស្រុកជលគីរី ខេត្តកំពង់ឆ្នាំង រឹបអូសបានស្បៃមុង ២១មាត់ ប្រវែង ៣០០ម៉ែត្រ បង្គោល ២៥០ដើម កូនត្រីចម្រុះចំនួន ១តោន ។
សេចក្តីរាយការណ៍បានបន្តទៀតឱ្យដឹងថា ក្រុមចម្រុះដដែលដឹកនាំដោយលោក ប៉ាង សុខុន សហការជាមួយ លោក អ៊ូ សោភ័ណ្ឌ នាយផ្នែករដ្ឋជលផលខេត្តកំពង់ឆ្នាំង បានចាប់រឹបអូសរបាំងស្បៃមុងចំនួន ៣០០មែត្រ ដែលបានដាក់នៅ ១៥កន្លែង លូស្បៃមុងចំណួន ១៥គ្រឿង បង្គោលចំនួន ២៥០ដើម ត្រីចម្រុះ ១តោន ។ ការបង្ក្រាបនេះធ្វើនៅចំណុចត្រាំកំបោរ ភូមិកោះធំ ឃុំព្រៃគ្រី ស្រុកជលគីរី ខេត្តកំពង់ឆ្នាំងនាថ្ងៃដដែល ។
សេចក្តីរាយការណ៍បានបន្តទៀតថា កម្លាំងចម្រុះដែលចូលរួមពីគ្រប់សហគមន៍ និងមន្ត្រីជំនាញរួមទាំងសមត្ថកិច្ចគ្រប់ បណ្តាអង្គភាព បានប្រើប្រាស់មធ្យោ បាយកាណូតចំនួនពីរគ្រឿងទើបអាចសម្រេចបេសកកម្មបង្ក្រាបបទល្មើស ច្បាប់ស្តីពីជលផលនៅក្នុងស្រុកជលគីរី នៅរដូវបិទការនេសាទនេះបានដោយជោគជ័យ ។ ចំណែកឯសម្ភារៈដែល កម្លាំងចម្រុះរឹបអូសបាននោះបានយកទៅទុកនៅខណ្ឌរដ្ឋបាលជលផលធ្វើជាវត្ថុតាង និងរងចាំការសម្រេចពីថ្នាក់លើ ថា ត្រូវចាត់ការយ៉ាងណានោះ ៕
