កាលពីព្រឹកថ្ងៃទី ១៩ ខែសីហា ឆ្នាំ២០១ កន្លងទៅថ្មីៗនេះ ប្រធានក្លឹបអ្នកកាសែតឯករាជ្យ លោក ហ៊ុន សុខា អមដំណើរដោយលោក ថាន វុត្ថា ប្រធានសមាគមសារព័ត៌មានជាតិកម្ពុជា បានដឹកនាំប្រតិភូមួយក្រុមមានគ្នាជាង ១០នាក់ បានមកសាកសួរសុខទុក្ខលោក ជ័យ យ៉ាណូ ចាងហ្វាងកាសែតសុជីវធម៌ ដែលកំពុងមានជំងឺយ៉ាងធ្ងន់ធ្ងរ ។
កន្លងមកថ្មីៗនេះ លោក ជ័យ យ៉ាណូ បានទៅសម្រាកព្យាបាលនៅមន្ទីរពេទ្យកាល់ម៉ែត្រ និងសំរាកការព្យាបាលនៅមន្ទីរពេទ្យប្រទេសវៀតណាម ។ ប៉ុន្តែនាពេលនេះដែរឃើញថា អាការៈរោគរបស់លោក ជ័យ យ៉ាណូ បានធូរស្រាលមកវិញ ហើយដោយគោរពតាមបញ្ជារបស់គ្រូពេទ្យ នៅតែលេបថ្នាំជាបន្តរាល់ថ្ងៃ តាមពេលកំណត់ដោយមិនឱ្យខកខាននោះទេ ។ ជាមួយនេះដែរ ចំពោះបញ្ហាជីវភាពរបស់គាត់ (ជ័យ យ៉ាណូ)ក៏កំពុងមានការខ្វះខាតយ៉ាងខ្លាំងក្នុងឱកាសនៃការព្យាបាលជំងឺផ្ទាល់ខ្លួននោះផងដែរ ។ ប៉ុន្តែកន្លងមក ក៏គេឃើញសប្បុរសជននានាក្នុងស្រុកក៏បានជួយឧបត្ថម្ភតាមកម្លាំងសទ្ធាផងដែរ ដើម្បីបាន សោហ៊ុយក្នុងការព្យាបាលជំងឺ ដោយការសម្រាកនៅមន្ទីពេទ្យ ។
ក្នុងឱកាសនោះនោះដែរ លោក ហ៊ុន សុខា ប្រធានក្លឹបអ្នកកាសែតឯករាជ្យ ព្រមទាំងប្រតិភូជាអ្នករួម អាជីពនៃសារព័ត៌មាន បានសម្តែងនូវមនោសញ្ចេតនាអាណិតអាសូរដល់លោក ជ័យ យ៉ាណូ ដែលមានអាការៈ ស្គមស្គាំស្លេកស្លាំង កម្លាំងថមថយ ដែលមានអាការៈរោគបង្ហាញតាមរយៈគ្រូពេទ្យបានឱ្យដឹងថា ជាជំងឺបេះដូង និងលើសឈាមផង ព្រមទាំងមានបញ្ហាជាតិស្ករក្នុងឈាម បណ្តាលឱ្យមានជំងឺទឹកនោមផ្អែមផង ។
ជាក់ស្តែងនៅថ្ងៃទី ១៩ ខែសីហា ឆ្នាំ២០១៥ លោក ហ៊ុន សុខា និងប្រតិភូទាំងអស់បានអញ្ជើញមកសួរ សុខទុក្ខ ព្រមទាំងបានឧបត្ថម្ភសម្ភារៈមួយចំនួន និងថវិកា ១០០ដុល្លារ ដោយការជូនផ្ទាល់ដៃដល់លោក ជ័យ យ៉ាណូ តែម្តង ។ ទន្ទឹមនឹងនេះដែរ លោកជ័យ យ៉ាណូ ដែលមានអាយុ ៧៤ឆ្នាំ ហើយដែលគាត់មានអាជីពជាអ្នកកាសែត ស្ទើរ តែមួយជីវិតគាត់នោះ ក៏មានចិត្តរំភើបអបអរ និងបានសម្តែងនូវការទទួលស្វាគមន៍យ៉ាងកក់ក្តៅដល់លោក ប្រធាន ហ៊ុន សុខា និងប្រតិភូទាំងអស់នាពេលនេះ ។ បន្ទាប់មកលោក ជ័យ យ៉ាណូ បានលើកដៃសំពះជូនពរដល់ ប្រតិភូទាំងអស់ សូមឱ្យបានទទួលនូវពុទ្ធពរទាំង ៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។/
ដោយ ៖ សារ៉េត
