កំពង់ឆ្នាំង ៖ ថ្ងៃពុធ ០៨ ខែ ភទ្របទ ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី២៥ ខែកញ្ញា ឆ្នាំ២០២៤ ខណ្ឌរដ្ឋបាលជលផលកំពង់ឆ្នាំងក្រោមការណែនាំ និងចង្អុលទិសរបស់ លី ឡា បានបន្តសកម្មភាពចុះល្បាត និងបង្ក្រាបបទល្មើសនេសាទដឹកនាំដោយ លោក អ៊ូ សោភ័ណ នាយរងខណ្ឌ សហការជាមួយអធិការនគបាលស្រុក កំពង់លែង ។ ក្នុងប្រតិបត្តិការនេះ កម្លាំងល្បាតបានប្រើប្រាស់មធ្យោបាយទូក ០៣ គ្រឿង កំលាំង ១៥ នាក់ ដោយបានចុះប្រតិបត្តិការក្នុងភូមិសាស្ត្រឃុំច្រណូក ស្រុកកំពង់លែង ចាប់ពីចំណុចភ្នំត្រង់ ទៅដល់ផ្លូវ ៥០C នៅពេលនោះបានប្រទះឃើញ របាំងស្បៃមុង ដែលជាបទល្មើសជលផល។
ជាបន្តទៀត កម្លាំងចម្រុះបានបន្តល្បាតដោយសហការជាមួយសហគមន៍នេសាទភូមិពាមពពេច ដឹកនាំដោយ លោក នួន ឬទ្ធី នាយផ្នែករដ្ឋបាលជលផលកំពង់ប្រាសាទ និងទទួលបានកម្លាំងចូលរួមសរុប ៥ នាក់ និងមធ្យោបាយកាណូត ០១ គ្រឿង បន្ថែមហើយបានចុះប្រតិបត្តិការជាបន្ត ស្ថិតនៅចំណុចមេទឹកដីក្រហម មេទឹកសារកា ភូមិកោះថ្កួវ ឃុំកោះថ្កូវ ស្រុកជលគិរី ខេត្ត កំពង់ឆ្នាំង ដែលខុសទៅនឹងច្បាប់ស្តីពីជលផល ក្នុងនោះកម្លាំងចម្រុះបានប្រទះឃើញការធ្វើនេសាទដោយឧបករណ៍របាំងស្បៃមុងខុសច្បាប់បន្ថែមទៀត ។
ជាលទ្ធផល សមត្ថកិច្ចយើងបានឯកភាពគ្នា ធ្វើការរុះរើ បំផ្លាញចោលនៅនឹងកន្លែង នូវវត្ថុតាងរួមមានរុះរើរបាំងស្បៃមុងចំនួន ០២ ករណី ស្មើនឹង ៦១ កន្លែង ប្រវែង ១៣៥០ ម៉ែត្រ លូស្បៃមុងចំនួន ៦១ គ្រឿង បង្គោលចំនួន ៦៥០ ដើមនិងចាក់លែងត្រីចម្រុះចូលដែននេសាទវិញចំនួន ៧០ គីឡូក្រាម ៕
