សមាគមសម្ព័ន្ធសារព័ត៌មានឯករាជ្យ ចុះ MOU ជាមួយក្រុមហ៊ុន និងសមាគម ចំនួន ២
………………
នៅព្រឹកថ្ងៃទី៥ ខែកញ្ញា ឆ្នាំ២០២៤ នេះ សមាគមសម្ព័ន្ធសារព័ត៌មានឯករាជ្យ ហៅកាត់ អាយប៉ា(IPA) បានចុះអនុស្សរណៈនៃការយោគយល់គ្នា (MOU) ជាមួយក្រុមហ៊ុន សារាសាហ្វី ខេ-ហ៊ែល ឯ.ក នៅស្នាក់ការសមាគម ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដែលចុះហត្ថលេខាដោយឯកឧត្តមបណ្ឌិត ទូច វណ្ណៈ ប្រធានសមាគម និងលោក គុយ សារ៉ាត់ អគ្គនាយកក្រុមហ៊ុន។
ក្នុងឱកាសនោះដែរ សមាគមសម្ព័ន្ធសារព័ត៌មានឯករាជ្យ ក៏បានអនុស្សរណៈនៃការយោគយល់គ្នាជាមួយសមាគមសហព័ន្ធបណ្តុះបណ្តាលវិជ្ជាជីវៈកម្ពុជា ដែលចុះហត្ថលេខាដោយឯកឧត្តមបណ្ឌិត ទូច វណ្ណៈ ប្រធានសមាគមសម្ព័ន្ធសារព័ត៌មានឯករាជ្យ និងលោក ឈួន សុវណ្ណាសាក់ ប្រធានសមាគមសហព័ន្ធបណ្តុះបណ្តាលវិជ្ជាជីវៈកម្ពុជា។
សូមបញ្ជាក់ជូនថា អនុស្សរណៈនៃការយោគយល់គ្នានេះ ធ្វើឡើងក្នុងគោលបំណងសំខាន់ៗរួមមាន៖ ទី១. សហការគ្នាដោយឈរលើស្មារតីភាពជាដៃគូដើម្បីផលប្រយោជន៍រួម ទី២. ស្វែងរកគម្រោងអភិវឌ្ឍន៍នានាដែលផ្តល់ផលប្រយោជន៍រួម ទី៣. បំពេញឱ្យគ្នានូវរាល់តម្រូវការចាំបាច់ទៅតាមលទ្ធភាព ទី៤. រក្សាផលប្រយោជន៍ជូនគ្នាដោយភាពស្មោះត្រង់ ទី៥. រក្សាតម្លៃ កិត្តិយស កេរ្តិ៍ឈ្មោះ ផ្លូវច្បាប់ឱ្យគ្នាទៅវិញទៅមក និងទី៦. រួមគ្នាធ្វើសកម្មភាពសង្គម មនុស្សធម៌ អប់រំ ជាប្រយោជន៍ដល់ប្រទេសជាតិ៕
