ប៉ៃលិន ៖ ឯកឧត្តម កើត សុធា អភិបាលខេត្តប៉ៃលិនបានធ្វើការអំពាវនាវដល់ប្រជាពលរដ្ឋគ្រប់រូបត្រូវចូលរួមដាំដើមឈើឡើងវិញដើម្បីការពារបរិស្ថាន និងត្រូវបញ្ឈប់ជាបន្ទាន់នូវកសកម្មភាពកាប់បំផ្លាញព្រៃឈើ ប្រសិនបើនៅតែបន្តទៀតនិងត្រូវចាត់វិធានការទៅតាមផ្លូវច្បាប់ ។
ប្រសាសន៍នេះត្រូវបានឡើងក្នុងពិធីអបអរសាទរបុណ្យរុក្ខទិវា ៩ កក្កដា ២០១៥ កាលពីព្រឹកថ្ងៃទី១២ ខែសីហា ឆ្នាំ២០១៥ នៅបរិវេណវត្តរតនសោភ័ណ ហៅវត្តកោងកាង ស្ថតិក្នុងភូមិវត្ត សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
លោក ជូរ ចន្ទតារាឫទ្ធិ នាយកខណ្ឌរដ្ឋបាលព្រៃឈើខេត្តប៉ៃលិន បានឲ្យដឹងថានៅខេត្តប៉ៃលិនចាប់ពីឆ្នាំ១៩៩៩ រហូតមកតែងតែប្រារព្ធបុណ្យរុក្ខទិវា ជារៀងរាល់ឆ្នាំបើគិតមកដល់ឆ្នាំ២០១៥ នេះយើងបានដាំដើមឈើបានចំនួន៤០,១៥០ ដើម និងដាំដើមឈើក្រោមរូបភាពចលនាប្រជាជនបានចំនួន១២០,០០០ ដើម ។
លោកបានបន្តថា នៅខេត្តប៉ៃលិនមានព្រៃស្រោងចំនួន៣៧,៩៨៤ ហិកតា ព្រៃពាក់កណ្តាលស្រោងចំនួន ៤,៤៩៩ ហិកតា ព្រៃរបោះចំនួន១០.០១៦ ហិតតា ព្រៃផ្សេងៗចំនួន៥៦៩ ហិកតា និងដីមិនមែនព្រៃចំនួន៥៤,៥៩៩ ហិកតា ។ ដីព្រៃសរុបចំនួន៥៣,១១២ ហិកតា ស្នើនឹង៥០ ភាគរយនៃផ្ទៃដីសរុបរបស់ខេត្ត ដែលមានទំហំ១០៧,៧១១ ហិកតា ។បច្ចុប្បន្ននេះព្រៃឈើនៅខេត្តប៉ៃលិនត្រូវទទួលរងនូវការបាត់បងអស់មួយចំនួនធំ។ ការបាត់បងព្រៃឈើបានធ្វើឲ្យប៉ះពាល់យ៉ាងធ្ងន់ធ្ងរដល់ប្រព័ន្ធអេកូឡូស៊ី និងបណ្តាលឲ្យមានការប្រែនប្រួល អាកាសធាតុយ៉ាងខ្លាំង ។
លោកបានបញ្ជាក់ថា ខណ្ឌរដ្ឋបាលព្រៃឈើបានរៀបចំកូនឈើប្រភេទ គគីរ បេង ក្ងោក លឿងរាជ សរុបចំនួន៣៥០០ ដើមសម្រាប់ដាំ និងចែកជូនបណ្តាលមន្ទីរអង្គភាព វត្តអារាម សាលារៀន និងប្រជាពលរដ្ឋ ក្នុងកម្មវិធីបុណ្យរុក្ខទិវា ក្នុងឆ្នាំ២០១៥ នេះ ។
ឯកឧត្តម កើត សុធា អភិបាលខេត្តប៉ៃលិនបានធ្វើការអំពាវនាវដល់គ្រប់វត្តអារាម បណ្តាមន្ទីរអង្គភាព និងប្រជាពលរដ្ឋគ្រប់រូបត្រូវចូលរួមដាំដើមឈើឡើងវិញ និងត្រូវបញ្ឈប់ជាបន្ទាន់ នូវសកម្មភាពកាប់បំផ្លាញ់ព្រៃឈើគ្រប់ប្រភេទ ។ ប្រសិនបើនៅតែបន្តសកម្មភាពកាប់បំផ្លាញ់ព្រៃឈើទៀតនោះ គឺនឹងចាត់វិធានការទៅតាមផ្លូវច្បាប់ ។
ឯកឧត្តមបានបញ្ជាក់ថា គ្រប់អង្គភាពកងកម្លាំងប្រដាប់អាវុធ និងអង្គភាពពាក់ព័ន្ធត្រូវបន្តយកចិត្តទុកដាក់អនុវត្តយ៉ាងម៉ឺងម៉ាត់ នូវបទបញ្ជាលេខ០១ និងបទបញ្ជាលេខ០២ របស់រាជដ្ឋាភិបាលកម្ពុជា ក្នុងស្មារតីទទួលខុសត្រូវខ្ពស់បំផុត ដើម្បីឈានទៅទប់ស្កាត់អោយបានដាច់ខាតនូវបទល្មើសព្រៃឈើ ។ អាជ្ញាធរគ្រប់លំដាប់ថ្នាក់ត្រូវធ្វើការណែនាំដល់ប្រជាពលរដ្ឋអោយបានយល់ច្បាស់ អំពីផលវិបាកនៃការកាប់បំផ្លាញព្រៃឈើ ។ ខណ្ឌរដ្ឋបាលព្រៃឈើត្រូវ រៀបចំការងារបណ្តុះកូនឈើអោយបានច្រើនថែមទៀតសម្រាប់ដាំ និងចែកជូនដល់ប្រជាពលរដ្ឋដាំនៅតាមមូលដ្ឋាន ត្រូវយកចិត្តទុកគ្រប់គ្រង និងថែរក្សាកូនឈើ ដែលដាំរួចអោយលូតលាស់បានល្អ និងនៅគង់វង្សយូរអង្វែងតទៅ ៕
