ខេត្តបាត់ដំបង ៖ កាលពីថ្ងៃទី១០ ខែសីហា មានប្រារព្ធពិធីប្រកាស់តំណែងអភិបាល នៃគណអភិបាលស្រុកសង្កែ ក្រោមអធិបតីភាពឯកឧត្តម ច័ន្ទ សុផល អភិបាលនៃគណអភិបាលខេត្តបាត់ដំបង ។ លោក គិម វណ្ណៈ វរមន្ត្រីថ្នាក់លេខ ៤ ត្រូវបានតែងតាំងឲ្យកាន់មុខតំណែងជា អភិបាលនៃគណអភិបាល ស្រុកសង្កែ ខេត្តបាត់ដំបង ជំនួសលោក សួន សាវ៉េត អតីតអភិបាលស្រុកសង្កែ ដែលបានទទួលមរណៈភាព ។
ឯកឧត្តម ច័ន្ទ សុផល បានបញ្ជាក់ថា ការតែងតាំងមុខតំណែងលោក គិម វណ្ណៈ ជាអភិបាលស្រុងសង្កែនាពេលនេះ គឺជាការបំពេញនូវរចនាសម្ពន្ធ័ដឹកនាំ គ្រប់គ្រង និងការទទួលខុសត្រូវលើការងារគ្រប់វិស័យ នៅថ្នាក់ក្រោមជាតិ ។ នាឱកាសនោះផងដែរ ឯកឧត្តមក៏បានសម្តែងនូវការកោតសរសើរ ចំពោះរដ្ឋបាលស្រុក មន្ត្រីរាជការគ្រប់សមត្ថកិច្ចពាក់ព័ន្ធ និងលោកមេឃុំទាំងអស់ ដែលបាន ខិតខំប្រឹងប្រែងបំពេញតួនាទីភារកិច្ច ក្នុងការដឹកនាំគ្រប់គ្រង ចាត់ចែង និងអនុវត្តការងារ លើ គ្រប់វិស័យដោយទទួលលទ្ធផលយ៉ាងល្អប្រសើរ ។ ឯកឧត្តមក៏បានជំរុញឲ្យអភិបាលលោកអភិបាលស្រុកទើបតែងតាំងថ្មី ត្រូវខិតខំបញ្ជេញឲ្យអស់ពីសមត្ថភាព ទេពកោសល្យ និងគំនិតច្នៃប្រឌិតខ្ពស់រស់ រវើក ត្រូវមានគណនេយ្យភាពចំពោះក្រុមប្រឹក្សារបស់ខ្លួន ក្នុងស្មារតីយកចិត្តទុកដាក់ដឹកនាំ និងទទួលខុសត្រូវខ្ពស់ ។
ក្នុងអាណត្តិទី៥នេះ រាជរដ្ឋាភិបាល បានប្រកាន់យកគោលការណ៍នៃការចាត់ចែងការងារ តាមបែបវិមជ្ឈការ និងវិសហមជ្ឈការ ដែលជាគោលការនៃការគ្រប់គ្រងរដ្ឋបាលដ៏មានប្រសិទ្ធភាពសំរាប់ប្រើប្រាស់ជាគោលដៅយូរអង្វែងក្នុងការអភិវឌ្ឍន៍ ប្រពន្ធរដ្ឋបាលសាធារណៈ ប្រកបដោយតម្លាភាព ។
ឯកឧត្តមបានផ្តល់អនុសាសន៍ល្អៗជាច្រើន ក្នុងគោលដៅជម្រុញការដឹកនាំគ្រប់គ្រងចាត់ចែងការងារ ពហុវិស័យក្នុងរដ្ឋបាលស្រុកសង្កែឲ្យកាន់តែមានភាពល្អ ប្រសើរជាបន្តទៀត ៕
