សៀមរាប ៖ បច្ចុប្បន្ន ក្រុងសៀមរាប ក៏ដូចជាតាមបណ្តាស្រុកមួយចំនួនទូទាំងខេត្តសៀមរាប ត្រូវបានប្រជាពលរដ្ឋរាយការណ៍ថា មានបទល្មើសល្បែងស៊ីសងគ្រប់ប្រភេទ ដូចជា កន្ទុយលេខ បៀរ អាប៉ោង សង្វៀនជល់មាន់ជាដើម កំពុងដំណើរការយ៉ាងរលូន ដោយសារតែអាជ្ញាធរនិងសមត្ថកិច្ចពាក់ព័ន្ធមិនអើពើមិនធ្វើការបង្ក្រាប ឬទប់ស្កាត់បនល្បែងស៊ីសងទាំងនេះឡើយ ។
ជាក់ស្តែង ទីតាំងចាក់ឆ្នោតកន្ទុយលេខមួយកន្លែងនៅចំខាងក្រោយផ្សារលើធំថ្មី ក្រុងសៀមរាប ដែលគេសញកាល់ថា ម្ចាស់ឆ្នោតមានឈ្មោះថា លោកតារុន ដែលមានទីតាំងស្ថិតនៅភូមិតាវៀន សង្កាត់ស្លក្រាម ក្រុងសៀមរាប ខេត្តសៀមរាប បានដំណើរការជាយូរណាស់មកហើយ គ្មានអាជ្ញាធរ ឬកម្លាំងសមត្ថកិច្ចណាចុះបង្ក្រាបនោះទេ ។
ប្រភពដដែលបានបន្តថា ក្នុងមួយថ្ងៃៗ គេសង្កេតឃើញអ្នកញៀននឹងល្បែងចាក់ឆ្នោតតែងតែចេញចូលចាក់កន្ទុយលេខទីនោះមិនដាច់ ។
ប្រជាពលរដ្ឋម្នាក់ក្នុងក្រុងសៀមរាបបានបង្ហើបឲ្យដឹងថា សព្វថ្ងៃ គាត់មានការព្រួយបារម្ភយ៉ាងខ្លាំង ដោយសារបនល្បែងស៊ីសងចេះតែកើនឡើង ក្នុងក្រុងសៀមរាប យ៉ាងអនាធិបតេយ្យ និងធ្វើឲ្យប្រជាពលរដ្ឋមានការភ័យខ្លាច នូវអំពើចោរលួច ឆក់ ប្លន់ ដែលរីករាលដាលដោយសារល្បែងស៊ីសងទាំងនេះ ។
ប្រជាពលរដ្ឋក្នុងក្រុងសៀមរាប ក៏បានធ្វើការសំណូមពរដល់លោកអភិបាលនៃគណៈអភិបាលខេត្ត ឃឹម ប៊ុនសុង និងស្នងការដ្ឋាននគរបាល លោក ស៊ត ណាឌី មេត្តាចាត់វិធានការបង្ក្រាប និងទប់ស្កាត់រាល់ល្បែងស៊ីសងទាំងនេះក៏ដូចជាបទល្មើសផ្សេងទៀត ឲ្យមានប្រសិទ្ធភាពខ្ពស់បំផុត ដើម្បីឲ្យប្រជាពលរដ្ឋរស់នៅបានសុខសាន្ត ណិងមានស្ថេរភាពក្នុងសង្គម ឲ្យស្របទៅតាមបទបញ្ជារបស់រាជរដ្ឋាភិបាល ដែលថា ភូមិ-ឃុំ មានសុវត្ថិភាពទាំងប្រាំបួនចំណុចនោះ ៕
