ខេត្តសៀមរាប ៖ មេឈ្មួញឈើដុះស្លែដ៍ធំពីរូបគឺឈ្មោះ វ៉ានិង ឈ្មោះ ចាន់ណា មានរថយន្តដឹកឈើចំនួន ៨ គ្រឿងប្រភទកែឆ្នៃដែលក្នុង ១គ្រឿងៗអាចផ្ទុកឈើបានពី ៨ ទៅ ១០ ម៉ែត្រគូប និងមានរថយន្តប្រភេទ ១បាំងកន្លះជាច្រើនគ្រឿងទៀត ព្រមទាំងកាងឈើអោយឈ្មួញនាៗផងដែរ បាន ធ្វើការដឹកជញ្ជូនឈើល្មើសច្បាប់ទាំងយប់ទាំងថ្ងៃដោយសេរីយ៉ាងអនាធិបតេយ្យ ស្ទើរតែកក្រើកខេត្តសៀមរាបអស់រយៈពេលជាច្រើនឆ្នាំកន្លងទៅនេះ ដោយគ្មានវិធានការបង្ក្រាបអ្វីទាល់តែសោះ ។
ប្រភពដដែលបានបន្តថា ឈើល្មើសច្បាប់ដែលឈ្មួញទាំង២រូបធ្វើសកម្មភាពដឹកជញ្ជូនគឺចេញកមពីតំបន់ប៉ែកខាងលើភូមិអូអាកុក ជាប់ព្រំប្រទល់ខេត្តសៀមរាបនិងព្រះវិហារដោយ
ឆ្លងកាត់សង្កាត់ និងផ្នែករដ្ឋបាលព្រៃឈើជាច្រើនកន្លែង តាមបណ្តោយផ្លូវលេខ៦៧(ហាយវ៉េ)ចូលមកលក់និងចែកចាយតាមដេប៉ូនានាក្នុងក្រុងសៀមរាប និងដេប៉ូផ្ទាល់ខ្លួន ២ កន្លែងផងដែរ ។
ពាក់ព័ន្ធនឹងសកម្មភាពរកស៊ីឈើនេះ មេឈ្មួញជើងខ្លាំងទាំង ២ រូបនេះបានអួតក្អេងក្អាងថា ពួកគេដឹកជញ្ជូនឈើថ្វីត្បិតតែគ្មានច្បាប់ក៍ពិតមែន ប៉ុន្តែគេបានរត់ការបង់លុយអោយសមត្ថកិច្ចជុំនាញរាប់មិនអស់ចាប់តាំងពីកន្លែងលើកឈើ រហូតដល់កន្លែងលក់ ។ មេឈ្មួញដដែលបានអះអាងថា គេមិនខ្លាចសមត្ថកិច្ចណាទាំងអស់ព្រោះក្នុង១ជើងៗ គេចំណាយលុយរត់ការអស់រាប់ពាន់ដុល្លាពិសេសគេមានខ្នងបង្អែកលោកនាយផ្នែក ម៉ុង ប៊ុនលីម ជាបងធម៌ និងលោកនាយខណ្ឌ័ ទា គឹមសុទ្ធ នៅពីក្រោយ ។
ពាក់ព័ន្ធការដឹកជញ្ជូនឈើខាងលើ លោក ម៉ុង ប៊ុលីម បានអោយដឹងតាមទូរសព្ទ័យ៉ាងខ្លីថា គេដឹកបានគេមានច្បាប់ ហើយបិតទូរសព្ទ័យ៉ាងគ្មានសុជីវធម៌ ។
ចំណែកលោក ទា គឹមសុទ្ធ នាយខណ្ឌ័រដ្ឋបាលព្រៃឈើសៀមរាបបានអោយដឹងតាមទូរសព្ទ័ថា លោកមិនដែលស្គាល់ឈ្មោះអ្នកទាំង២នោះទេ ប៉ុន្តែលោកបានបញ្ជារអោយខាងសង្កាត់រដ្ឋបាលព្រៃឈើ និងផ្នែកបន្ទាយស្រី មានចំណាត់ការហើយ ប៉ុន្តែមិនទាន់បានមួយរយភាគរយទេ ។
ទោះបីដូចនេះក៏ដោយ លោក ទា គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាបត្រូវបានគេសង្ស័យថា អាចនៅពីក្រោយនៃការដឹកជញ្ជូនឈើល្មើសច្បាប់និងសង្ស័យមានភាគហ៊ុនជាមួយមេ ឈ្មួញឈើដុះស្លែដ៍ធំពីរូបគឺឈ្មោះ វ៉ានិង ឈ្មោះ ចាន់ ណា ទើបគ្មានការបង្ក្រាប ហើយថែមទាំងបើកដៃអោយពួកគេទាំងពីរូបធ្វើការដឹកជញ្ជូនឈើល្មើសច្បាប់ទាំងយប់ទាំងថ្ងៃដោយ សេរីយ៉ាងអនាធិបតេយ្យ ស្ទើរតែកក្រើកខេត្តសៀមរាបអស់រយៈពេលជាច្រើនឆ្នាំកន្លងទៅដោយគ្មានវិធានការបង្ក្រាបយ៉ាងដូច្នេះ ៕
