បន្ទាយមានជ័យ ៖ លោក ប្រាក់ ប៉ូលីត្រូវបានក្រសួងប្រកាសជាប្រធានមន្ទីររៀបចំដែនដីនគរោបនីយកម្មសំណង់ និងសុរិយោដីជំនួសលោក លី សារី ដោយលោក លី សារី ទៅកាន់តំណែងថ្មី ក្រោមអធិបតីភាពលោក ឆាន់សាផាន រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ ,លោក គោស៊ុំ សារឿត អភិបាលខេត្តបន្ទាយមានជ័យ ,លោក អ៊ុង អឿនប្រធានក្រុមប្រឹក្សាខេត្តបន្ទាយមានជ័យនៅល្ងាចថ្ងៃទី១០ ខែសីហា ឆ្នាំ២០១៥នៅសាលប្រជុំសាលាខេត្តបន្ទាយមានជ័យ ។
វត្តមានអញ្ជើញចូលរួមជាកិត្តិយសមានអនុប្រធាន ប្រធានមន្ទីរជុំវិញសាលាខេត្តបន្ទាយមានជ័យ កងកម្លាំងប្រដាប់អាវុធគ្រប់ប្រភេទ មន្ត្រីសាលាស្រុក-ក្រុងអ្នកមុខអ្នកការជាច្រើននាក់ទៀត។
លោក លីវ ពិសិដ្ឋ អនុប្រធាននាយកដ្ឋានបុគ្គលិកបានឡើងអានសេចក្តីប្រកាសលេខ ១ ៦២ ប្រ ក/ បុ ចុះថ្ងៃទី៣១ខែកក្កដាឆ្នាំ២០១៥ ដោយទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិង សំណង់ អ៊ឹម ឈុនលឹម ស្ដីពីប្រកាសតែងតាំងលោក ប្រាក់ ប៉ូលីមុខងារជាប្រធានភូមិបាលក្រុងប៉ោយប៉ែតឲ្យឡើងទៅកាន់ជាប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តបន្ទាយមានជ័យចាប់ពីថ្ងៃប្រកាសនេះតទៅ។
លោក ប្រាក់ ប៉ូលី ប្រធានមន្ទីររៀបចំដែនដីនគរោបនីយកម្មសំណង់ និងសុរិយោដីទើបឡើងកាន់តំណែងថ្មីបានឡើងធ្វើសេចក្តីប្តេជ្ញាចិត្តថាគោរពរដ្ឋធម្មនុញ្ញនៃព្រះរាជាណាចក្រកម្ពុជា។ ខិតខំអនុវត្តគោលនយោយបាយរបស់ក្រសួងដាក់អោយ ជាពិសេសអនុវត្តន៍អោយបានប្រសើរនូវយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលនិងធ្វើខ្លួន អោយក្លាយជាអ្នកបម្រើសេវ៉ាដ៏ល្អលើវិស័យរៀបចំដែនដីនគរូបនីយកម្ម សំណង់ និងសុរិយោដីជូនប្រជាពលរដ្ឋ ។
បម្រើការងារអោយអស់កម្លាំងចិត្តកម្លាំងកាយដោយសហការអោយបានជិតស្និទ្ធជាមួយអាជ្ញាធរដែនដីគ្រប់លំដាប់ថ្នាក់និងមន្ទីរជុំវិញខេត្ត ។ ពង្រឹងសាមគ្គីភាពផ្ទៃក្នុងជាមន្ត្រីក្រោមឱវាទរបស់មន្ទីរអោយបានស្អិតរមួត និងខិតខំអនុវត្តសម្រេចរាល់ភារកិច្ចដោយមានមនសិការវិជ្ជាជីវៈខ្ពស់ ។ បន្តជម្រុញការងាររៀបចំប្លង់គោល ទីប្រជុំជន ការរៀបចំផែការប្រើប្រាស់ដីធ្លីទាំងទីប្រជុំជននិងទីជនបទ ការគ្រប់គ្រងការងារសំណង់ ការងារចុះបញ្ជីដីធ្លីនិងដោះស្រាយទំនាស់ដីធ្លី ។
លោក ឆាន់ សាផាន រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ បានមានប្រសាសន៍ដាស់តឿនដល់លោក ប្រាក់ ប៉ូលី ដែលទើបឡើងកាន់តំណែងជាប្រធានមន្ទីរថ្មីត្រូវបន្តជំរុញការងាររៀបចំប្លង់គោល ទីប្រជុំជនការរៀបចំផែនការប្រើប្រាស់ដីធ្លីទាំងទីប្រជុំជន និងនៅតាមជនបទការគ្រប់គ្រងសំណង់ការងារចុះបញ្ជីដីធ្លីនិងការដោះស្រាយទំនាស់ដីធ្លីផ្សេងៗឲ្យបានចប់សព្វគ្រប់ជៀសវាងមានទំនាស់បន្តរបស់ប្រជាជន និងសហការយោគយល់ស្ថាប័ន្ធពាក់ប័ន្ធអោយបានប្រសើរ៕
